ވާރލްޑް ކަޕް ކޮލިފައިން: ބެލްޖިއަމް ކޮލިފައިވެއްޖެ

2018 ވަނަ އަހަރުގެ ވާރލްޑް ކަޕަށް ބެލްޖިއަމް ކޮލިފައިވެއްޖެއެވެ.

އަންނަ އަހަރު ރަޝިއާގައި އޮންނަ ވާރލްޑް ކަޕްގެ ޖާގައެއް ބެލްޖިއަމްއިން ކަށަވަރުކުރީ ގައުމުން ބޭރުގައި ގްރީސްގެ މައްޗަށް 2-1 އަކުން ކުރި ހޯދައިގެންނެވެ.

މި މެޗުގައި ބެލްޖިއަމްއިން ކުޅެން ނެރެފައިވަނީ ވަރަށް ވަރުގަދަ ފުރަތަމަ އެގާރައެކެވެ. އެގޮތުން އެޑެން ހަޒާޑާ ރޮމެލޫ ލުކާކޫއާ ކެވިން ޑެބްރައިންގެ އިތުރުން ޑްރައިސް މާޓެންސްވަނީ ފުރަތަމަ އެގާރައިގައި ހިމެނިގެން ކުޅެފައެވެ. ފުރަތަމަ ހާފުގައި ބެލްޖިއަމްއަށް ގްރީސްގެ ގޯލު ހުޅުވާނުލެވުނު ނަމަވެސް އެޓީމުން ވަނީ ގްރީސްގެ ގޯލާ އަމާޒުކޮށް ގިނަ ހަމަލާތަކެއް ފޮނުވާލާފައެވެ.

މެޗުގައި ފެނިގެންދިޔަ ތިން ގޯލުވެސް ފެނިގެން ދިޔައީ ފަސް މިނެޓުގެ ވަގުތުކޮޅެއްގެ ތެރޭގައެވެ. އެގޮތުން މެޗުގެ 70 ވަނަ މިނެޓުގައި އޭރިއާ ބޭރުން ބާރު ހަމަލާއެއް ގޯލުގެ ތެރެއަށް ފޮނުވާލައިގެން ބެލްޖިއަމްއަށް ލީޑު ނަގައިދިނީ އެ ޓީމުގެ ޑިފެންޑާ ޔާން ވަޓޮންގެންއެވެ. އެހެން ނަމަވެސް އޭގެ ތިން މިނެޓު ފަހުން ގްރެގޮއިސް ޒަވާލެސް ނަގައިދިން ހުރަހަކުން ގްރީސްގެ ޒެކާ ކާމިޔާބުކޮށްދިން ލަނޑުން މެޗުގެ ނަތީޖާ ހަމަހަމަވިއެވެ.

ބެލްޖިއަމްއިން މެޗުގެ ލީޑު އަލުން އަނބުރާ ނެގީ އޭގެ މިނެޓެއް ފަހުން ތޯމަސް މިއުނިއާ ނަގައިދިން ހުރަހަކުން، ރޮމެލޫ ލުކާކޫ ބޮލުން ކާމިޔާބު ކޮށްދިން ލަނޑުންނެވެ.

ޔޫރަޕުގެ ވާރލްޑް ކަޕް ކޮލިފައިންގެ ގްރޫޕް އެޗްގައި ބޮސްނިއާ ހަޒަގޮވީނިއާ ވަނީ ގައުމުން ބޭރުގައި ޖިބްރަލްޓާ 4-0 އަކުން ބަލިކޮށްފައެވެ. ހަމައެހެންމެ އެސްޓޯނިއާއިން ވަނީ އަމިއްލަ ގައުމުގައި 1-0 އަކުން ސައިޕްރަސްގެ މައްޗަށް ކާމިޔާބު ހޯދާފައެވެ.

ބެލްޖިއަމްއިން ވާރލްޑް ކަޕްގެ ޖާގައެއް ކަށަވަރު ކުރީ ކުޅުނު އަށް މެޗުން 22 ޕޮއިންޓް ހޯދައިގެންނެވެ. އެ ޓީމުންވަނީ މި ގްރޫޕުގެ އެއްވަނަ ޔަގީންކޮށްފައެވެ. ގްރޫޕް އެޗްގެ ދެވަނައިގައި 14 ޕޮއިންޓާއެކު ބޮސްނިއާ ހަޒަގޮވީނިއާ އޮތްއިރު ތިންވަނައިގައި 13 ޕޮއިންޓާއެކު އޮތީ ގްރީސްއެވެ.

ބެލްޖިއަމްއަކީ އަންނަ އަހަރު އޮންނަ ވާރލްޑް ކަޕުން ޖާގަ ކަށަވަރު ކުރި ހަވަނަ ޓީމެވެ. އެ ޓީމުގެ ކުރިން ބްރެޒިލް، ޖަޕާން، އީރާން، މެކްސިކޯ އަދި މުބާރާތް ބާއްވާ ގައުމު ކަމަށްވާ ރަޝިއާއިން ވަނީވާރލްޑް ކަޕުގެ ޖާގައެއް ކަށަވަރު ކޮށްފައެވެ.