ސަރުކާރު އަޑީގައި އޮވެ މީޑިއާ ކޮންޓްރޯލް ކުރުމަށް ހުށަހަޅަފައި އޮތް ބިލު ބޭރުކޮށްލަން އެދި ގިނަ ނުކުތާތަކެއް ހިމަނައި 151 ނޫސްވެރިން ސޮއިކޮށް ހުށަހެޅި ޕެޓިޝަނުގައި ހުރި ކަންބޮޑުވުންތަކަށް ސަރުކާރުން ހުށަހެޅި އިސްލާހުތަކުން ހައްލު ލިބޭ ކަމަށް ބުނެ ދޮގު ހަދައި އެ ޕެޓިޝަން މަޖިލީހުން ބޭރުކޮށްލައިފި އެވެ.

ޕެޓިޝަން ކޮމިޓީގެ ބައްދަލުވުމުގައި ނޫސްވެރިންގެ ޕެޓިޝަން ބޭރުކުރުމަށް ހުށަހެޅީ މަޑަވެލި ދާއިރާގެ މެންބަރު މުހައްމަދު ޝަމީޒެވެ. އަދި އެ ހުށަހެޅުން ފާސްކޮށްފައިވަނީ ޕެޓިޝަން ކޮމިޓީގައި އޮންނަ ޕީއެންސީގެ މެޖޯރިޓީގެ އަޣުލަބިއްޔަތުންނެވެ. މި ނިންމުމާ ދެކޮޅަށް ވޯޓު ދެއްވާފައިވަނީ އެމްޑީޕީއަށް ނިސްބަތްވާ ވައިކަރަދޫ ދާއިރާގެ މެންބަރު ހުސައިން ޒިޔާދު އެކަންޏެވެ.

މިނިވަން މުއައްސަސާތަކާ ބެހޭ ކޮމިޓީއިން ބިލަށް އިސްލާހު ގެނެސް ފާސްކުރި އިރު، އެންމެ ބޮޑު ކަންބޮޑުވުމެއްގެ ގޮތުގައި ނޫސްވެރިން ފާހަގަކޮށްފައިވާ އެއްވެސް އިސްލާހަކަށް ބަދަލުނެގެސްފަ އެއް ނުވެއެވެ. އޭގެ ތެރޭގައި ބިލުގެ ދަށުން އުފައްދާ މީޑިއާ ކޮމިޝަނުގެ ހަތް މެންބަރުންގެ ތެރެއިން ތިން މެންބަރުން ރައީސް މުހައްމަދު މުއިއްޒު އައްޔަންކުރާ ގޮތަށް އޮތް މާއްދާ ހިމެނެ އެވެ.

ބާރަށު ދާއިރާގެ މެންބަރު އިބްރާހިމް ޝުޖާއު ވިދާޅުވެފައިވަނީ ނޫސްވެރިން ޕެޓިޝަނުގައި ފާހަގަކޮށްފައިވާ ކަންކަމުގެ ފަރުވާ، ސަރުކާރުން ހުށަހެޅި އިސްލާހުތަކާ އެކު ލިބިގެން ގޮސްފައިވާ ކަމަށެވެ. ނަމަވެސް ޙަޤީޤަތަކީ ޕެޓިޝަނުގައި ހުރި އެއްވެސް ކަމަކަށް ސަރުކާރުން ހުށަހެޅި އިސްލާހުތަކުގެ ސަބަބުން ހައްލެއް ނުލިބި، އިތުރަށް ބިލު ހަރުކަށިވެފައިވާކަމެވެ.

ނޫސްވެރިންގެ ފަރާތުން ބިލާ މެދު ނުރުހުން ފާޅުކޮށްފައިވަނީ މަޖިލީހަށް ހުށަހަޅާފައިވާ ޕެޓިޝަނަށް ރިއާޔަތްނުކޮށް ވޯޓަށް އެހުމާ ގުޅިގެންނެވެ.

މި ބިލަކީ ސަރުކާރުން އަޑީގައި އޮވެގެން މީޑިއާ ކޮންޓްރޯލް ކުރުމަށް ހުށަހަޅާފައިވާ ބިލެއް ކަމަށް ނޫސްވެރިން ދެކެއެވެ. އަދި މިކަމާ ގުޅިގެން ގިނަ އިސްލާހުތަކެއް ހިމަނައި 151 ނޫސްވެރިން ސޮއިކޮށް ހުށަހެޅި ޕެޓިޝަން ބޭރުކޮށްލުމަކީ މިނިވަން ނޫސްވެރިކަމަށް ކުރިމަތިވެފައިވާ ނުރައްކަލެއް ކަމުގައި ފާހަގަކުރެވެއެވެ.