މިސަރުކާރުގެ ޑޮލަރުގެ ސިޔާސަތު ފެއިލް، ދުވާލަކަށް 15 މިލިއަން ރުފިޔާއިން ރައްޔިތުން ދަރަނިވެރި ވެސް ވަނީ ކޮށްފައި: މޭޔަރު އާޒިމް

ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ މިސަރުކާރުން ގެނައި ޑޮލަރުގެ ސިޔާސަތު އެއްކޮށް ފެއިލްވެ، ދުވާލަކަށް 15 މިލިއަން ރުފިޔާއިން ދިވެހި ރައްޔިތުން ދަރަނިވެރި ކޮށްލާފައިވާ ކަމަށް މާލެސިޓީގެ މޭޔަރު އާދަމް އާޒިމް ވިދާޅުވެއްޖެއެވެ.

ރާއްޖެޓިވީގެ ޓީވީޓޯކް ޕްރޮގްރާމްގައި މޭޔަރު އާޒިމް ވިދާޅުވީ މިސަރުކާރުން ޑޮލަރުގެ ސިޔާސަތު ބަދަލުކޮށްފައިވަނީ ޑޮލަރުގެ އަގު ދަށްކޮށް، ރައްޔިތުންނަށް ފަސޭހައިން ޑޮލަރު ހޯދައިދިނުމަށް ކަމަށެވެ. ނަމަވެސް މިސިޔާސަތާއެކު ރައްޔިތުންނަށް މިހާރު ޑޮލަރު ނުލިބޭ ކަމަށާއި، ޑޮލަރުން އާމްދަނީ ލިބޭ މީހުންނަށް ވެސް ޑޮލަރުގެ ދަތިކަން ކުރިމަތިވެފައިވާ ކަމަށެވެ. އަދި އެމީހުން ވެސް އިތުރަށް ޑޮލަރު ހޯދުމަށް މަގު މައްޗަށް ނުކުންނަން ޖެހިފައިވާ ކަމަށް އާޒިމް ވިދާޅުވިއެވެ.

އާޒިމް ވިދާޅުވީ ކުރިއަށް އޮތްތަނުގައި ވެސް ޑޮލަރުގެ އަގުދާނީ މައްޗަށް ކަމަށާއި، ސަރުކާރުގެ މިސިޔާސަތު އެއްކޮށް ފެއިލްވެފައިވާ ކަމަށެވެ.

މީގެ އިތުރުން އާޒިމް ވިދާޅުވީ މިސަރުކާރުން މަޝްރޫއުތައް މިހާރު ކުރިއަށް ގެންދަނީ ގައުމާ ރައްޔިތުންނަށް ގެއްލުންވާ ގޮތަށް ކަމަށާއި، ބޭރުގެ ކުންފުނިތަކާ ހަވާލުކޮށް އަގުބޮޑު ކަމަށެވެ. އަދި ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުގައި މަޝްރޫއުތައް ކުރިއަށް ގެންދިޔަ ގޮތަށް އިޝާރާތް ކުރައްވައި އާޒިމް ވިދާޅުވީ ބޮޑެތި މަޝްރޫއުތައް ކުރިއަށް ގެންދިޔައީ އެމްޓީސީސީން ކަމަށާއި، އެމަސައްކަތް ކުރިއަށް ގެންދިޔުމަށް އަގުބޮޑެތި އިކުޕްމަންޓްސްތައް ހޯދައި އަގުހެޔޮކޮށް މަޝްރޫއުތައް ކުރިއަށް ގެންދިޔަ ކަމަށެވެ.

އެމްޓީސީސީ ހިންގި ޖުމްލަކޮށް 99 ޕްރޮޖެކްޓަކީ އާއްމު ރައްޔިތުންނަށް ކުރުމަށް އެހައި ފަސޭހަ ނޫން ޕްރޮޖެކްޓްތައް. އެއީ މިސާލަކަށް ބޮޑެތި ބަނދަރުތައް ހެދުން. މީގެ ކުރިން ބޭރުގެ ކުންފުނިތައް. އޭރުގައި މިނިސްޓަރު ވިދާޅުވީ ބޭރުގެ ކުންފުނިތަކުން ކުރި މަސައްކަތް އެމްޓީސީސީން ކުރަން ހިނގާށޭ. ތިމަންނަމެން ފައިސާ ހަމަޖައްސާނަމޭ. އިކުޕްމެންޓާ އެއްޗެހި ގަންނަން. އެގޮތަށް އަޅުގަނޑުމެން އެންމެން ގުޅިގެން އިކުޕްމަންޓް ގަނެގެން އެއީ ކުރަން ބޮސްކާލިސްއާ މިތަންތަނުން ކުރި މަސައްކަތްތައް އެމްޓީސީސީ ތެރެއަށް އަޅުގަނޑުމެން ގެނައީ. މިއަދު މާލޭގެ ބޮޑުތަކުރުފާނު މަގު ފުޅާ ކުރާ މަންޒަރު ބާރަށް ފެންނަނީ ކީއްވެތޯ އެއީ. އެއީ އަޅުގަނޑުމެންގެ ދައުރުގައި އަޅުގަނޑުމެން ބޭރު ކުންފުނިތަކުން ކުރި މަސައްކަތް ކުރަން ބޭނުންކުރި ސާމާނު، އެ ސާމާނު ގަންނަން ދައުލަތުން އަޅުގަނޑުމެންނަށް ދިނީމަ އަޅުގަނޑުމެން އެ އެއްޗެހި ގަނެގެން އެމަސައްކަތް މިއަދު ފަށާފައި ހުރީމަ. އެހެން ނޫންނަމަ މިއަދު އެމަސައްކަތް ކުރާނެ އެއްޗެހި ނުހުންނާނެ. އެއީ އަޅުގަނޑުމެން މަސައްކަތް ކުރި ގޮތަކީ.

މާލެސިޓީގެ މޭޔަރު އާދަމް އާޒިމް

އާޒިމް ވިދާޅުވީ މިސަރުކާރުގައި ތަރައްގީގެ މަޝްރޫއުތައް ކުރިއަށް ގެންދިއުމުގެ ސިޔާސަތު ވެސް އޮތީ އިތުރަށް ދަރަނިވެރިވާ ގޮތަށް ކަމަށެވެ. އަދި މިސަރުކާރުން ގައުމު ދަރަނިވެރި ކުރަމުންދާ ކަމަށާއި، ދުވާލަކަށް 15 މިލިއަން ރުފިޔާއަށް ވާވަރަށް ދަރަނިވެރިކޮށްލާފައިވާ ކަމަށް އޭނާ ވިދާޅުވިއެވެ.

މިއަދު މިފެންނަނީ އެމްޓީސީސީއަށް ކުރެވޭ މަސައްކަތްތައް ވެސް ބޭރު ކުންފުނިތަކަށް މިހާރު ބިން ހިއްކުން ކަހަލަ ކަންތައްތައް އަޅުގަނޑުމެން އޭރުގައި ތިން ޑޮލަރަށް 4 ޑޮލަރަށް ކުރި ކަންތައްތައް މިއަދު އެކުރަނީ 7 ޑޮލަރަށް 8 ޑޮލަރަށް އެކުރަނީ ބޭރު މީހުންނަށް ދީގެން. އެހެންވީމަ ސިޔާސަތު މިއޮތީ އިތުރަށް ދަރަނިވެރިވާ ގޮތަށް. މިއަދު އެމީހުން އެބަ ހަރަދުކުރޭ. ދުވާލެއްގެ މައްޗަށް ގައުމު ދަރަނިވެރިކޮށްލާފި އެމީހުން އައިފަހުން ދުވާލަކަށް 15 މިލިއަން ރުފިޔާއަށް ވާވަރަށް ދަރަނިވެރިކޮށްލާފި. ދިވެހި ރާއްޖޭގެ ރައްޔިތުން. އެއްކަމަކީ ފަރުވާ ކުޑަކަން. އަނެއް ކަމަކީ ނޭނގުން. އަނެއްކަމަކީ ކޮންމެ ގޮތެއް ވަރިހަމަކަން.

މާލެސިޓީގެ މޭޔަރު އާދަމް އާޒިމް

އާޒިމް ވިދާޅުވީ ރައްޔިތުން ވެރިކަމެއް ގެންނަނީ އެ ރައްޔިތުންނަށް އުފާވެރި ހިތްފަސޭހަ ދުވަސްތަކެއް ބޭނުންވާތީ ކަމަށާއި، ނަމަވެސް ރައީސް މުއިއްޒު ވެރިކަމާ ހަވާލުވެވަޑައިގެންނެވީއްސުރެ ރައްޔިތުންނަށް ލިބުނު ފަސޭހައެއް އުފަލެއް ހިތްހަމަ ޖެހުމެއް ނެތް ކަމަށެވެ.