އައްޑޫ ސިޓީން ކަރަންޓު ކެނޑުނީ އައްޑޫގެ 41 ނަންބަރު ސަބްސްޓޭޝަންގެ ކޭބަލަކަށް މީހަކު ގެއްލުންދޭން އުޅުމުގެ ތެރޭގައި: ފެނަކަ

ރޭ މެންދަމު އައްޑޫ ސިޓިން ކަރަންޓު ކެނޑެން މެދުވެރިވީ އައްޑޫގެ 41 ނަންބަރު ސަބްސްޓޭޝަންގެ ކޭބަލަކަށް މީހަކު ގެއްލުންދޭން އުޅުމުގެ ތެރޭގައި ކަމަށް ފެނަކަ ކޯޕަރޭޝަނުން ބުނެފި އެވެ.

ފެނަކައިން ނެރުނު ނޫސްބަޔާނެއްގައި ބުނީ ކަރަންޓު ކެނޑިފައިވަނީ އައްޑުގެ 41 ނަންބަރު ސަބްސްޓޭޝަންގެ ކޭބަލަކަށް މީހަކު ގެއްލުންދެން އުޅުމުގެތެރޭގައި ކަރަންޓު ޝޯޓެއް ހިނގައި ސެންޓްރަލް ޕަވަރ ހައުސް އެއްކޮށް ޑައުންވުމުގެ ސަބަބުންކަން ދެނެގަނެވިފައިވާ ކަމަށެވެ. އަދި މިމައްސަލައިގައި އިތުރަށް ބަލަންޖެހޭ ކަންކަން ކަމާއިބެހޭ މުއައްސަސާތަކާއި ގުޅިގެން ބަލަމުންދާކަމަށް ފެނަކައިން ބުންޏެވެ.

އަދި ރޭ މެންދަމު ގާތްގަނޑަކަށް 2:40 ހާއިރު އެކުންފުނީގެ އެލާމް ސިސްޓަމަށް ނޮޓިފިކޭޝަންތައް ލިބި އައްޑޫ ސިޓީގެ ގުޅިފައިވާ ރަށްތަކުން ކަރަންޓުގެ ޚިދުމަތް ކެނޑުނުކަން ސަމާލުކަމުން އައުމުން ވި އެންމެ އަވަހަކަށް ކަރަންޓު ޚިދުމަތް ދިނުމުގެ މަސައްކަތްކޮށް މައްސަލަ ދިމާވި ސަބަބު ދެނެގަތުމަށްޓަކައި ފެނަކައިގެ މުވައްޒަފުން ހަރަކާތްތެރިވި ކަމަށް ފެނަކައިން ބުނެ އެވެ.

މީގެ އިތުރުން އެފަދަ އަމަލުތަކަކީ ކުންފުނީގެ މުދަލަށް ގެއްލުން ލިބުމާއި އާންމު ރައްޔިތުންނަށް ތަކުލީފު ލިބުމުގެ އިތުރުން އެފަދަ އަމަލެއް ކުރާ ފަރާތްތަކަށާއި ނުވަތަ އަމަލުގައި ބައިވެރިނުވާ ފަރާތްތަކުގެ ހަށިގަނޑަށާއި ފުރާނަޔަށް ނުރައްކާވެދާނެ ފަދަ ކަންކަން ކަމަށް ވުމުން އެފަދަ އަމަލުތައް ނުކުރުމަށް އެ ކުންފުނިން ވަނީ އިލްތިމާސް ކޮށްފަ އެވެ.

ފެނަކައިން ބުނީ އައްޑު ސިޓިގައި ދެމުންގެންދާ ކަރަންޓުގެ ޚިދުމަތް ދާއިމީ ހައްލެއް ހޯދުމުގެ މަސައްކަތް އެ ކުންފުނިން ހުއްޓާނުލައި ކުރިއަށް ގެންދާކަމުގެ ޔަގީންކަން އަރުވާކަމަށާއި ކަރަންޓު ކެނޑުމުގެ ސަބަބުން ރައްޔިތުންނަށް ދިމާވި ދަތިތަކަށްޓަކައި އެ ކުންފުނީގެ ފަރާތުން މަޢާފަށް އެދޭކަމަށެވެ.