ޔަމަނުގެ ވެރި ރަށް ސަނާ އަށް އިސްރާއީލުން ހަމަލާ ދީފިއެވެ.

މިއީ ހޫޘީން އިސްރާއީލާ ދިމާއަށް ދޫކޮށްލި މިސައިލްތަކަކަށް ބަދަލު ހިފުމުގެ ގޮތުން ދިން ހަމަލާތަކެއް ކަމަށް އިސްރާއީލުން ބުނެއެވެ.

ހޫތީންގެ މީޑިއާއިން ބުނާ ގޮތުގައި މި ހަމަލާތަކުގައި މަދުވެގެން 2 މީހުން މަރުވެ، 5 މީހުންނަށް އަނިޔާވެފައިވެއެވެ.

މި ހަމަލާ އަކީ ޣައްޒާގެ ހަނގުރާމައިގެ ސަބަބުން އިސްރާއީލާއި ޔަމަނުގެ ހޫތީ ހަނގުރާމަވެރިންނާ ދެމެދު އަހަރަކަށްވުރެ ގިނަ ދުވަސް ވަންދެން ބަދަލު ކުރެވެމުންދާ ހަމަލާތަކުގެ ސިލްސިލާ އަށް އިތުރުވި ހަމަލާ އެކެވެ.

އިސްރާއީލުގެ ސިފައިންގެ ފަރާތުން ބުނެފައި ވަނީ ހަމަލާދެވުނު ތަންތަނުގެ ތެރޭގައި ރިޔާސީ ގަނޑުވަރު ހިމެނޭ އަސްކަރީ މަރުކަޒަކާއި، ކަރަންޓު އުފައްދާ ދެ އިންޖީނުގެ އާއި، ތެޔޮ ރައްކާކުރާ ތަނެއް ހިމެނޭ ކަމަށެވެ. ހޫޘީންގެ ބާރުގެ ދަށުގައިވާ ސަބާ ނިއުސް އޭޖެންސީން ބުނެފައިވަނީ މި ހަމަލާތަކުގައި މަދުވެގެން 2 މީހުން މަރުވެ، 5 މީހުންނަށް އަނިޔާވެފައިވާ ކަމަށެވެ.

"މި ހަމަލާތައް ދިނީ ހޫޘީ ޓެރަރިސްޓް ވެރިކަމުން އިސްރާއީލު ދައުލަތާއި ރައްޔިތުންނާ ދެކޮޅަށް ތަކުރާރުކޮށް ދެމުންދާ ހަމަލާތަކަށް ޖަވާބު ދިނުމުގެ ގޮތުން، އޭގެ ތެރޭގައި ފާއިތުވި ދުވަސްތަކުގައި އިސްރާއީލުގެ ސަރަހައްދަށް އަމާޒުކޮށް ދޫކޮށްލެވުނު ސާފަސް-ޓު-ސާފަސް މިސައިލްތަކާއި ޔޫއޭވީތައް ހިމެނޭ،" ކަމަށް ސިފައިންގެ ބަޔާނެއްގައި ބުނެފައިވެއެވެ.

ހުކުރު ދުވަހު ހޫޘީން ބުނެފައި ވަނީ އެމީހުން އިސްރާއީލާ ދިމާއަށް ބެލިސްޓިކް މިސައިލެއް ފޮނުވާލި ކަމަށެވެ. މިއީ އެެމީހުން ބުނާ ގޮތުގައި ޣައްޒާ ގެ ފަލަސްތީނުގެ ރައްޔިތުންނަށް އެއްބައިވަންތަކަން ދެއްކުމުގެ ގޮތުން ދިން އެންމެ ފަހުގެ ހަމަލާއެވެ. އިސްރާއީލުގެ އެއަރ ފޯސްގެ އޮފިޝަލަކު އާދީއްތަ ދުވަހު ބުނެފައިވަނީ މި މިސައިލަކީ މިސައިލް އައިސް ޖެހުމުން އެތައް ގޮވުންތަކެއް ގޮވާ ބައިތައް ހިމެނޭ ސަބް-މިއުނިޝަންތަކެއް ގެ މައްޗަށް އެކުލެވޭ މިސައިލެއް ކަމަށެވެ.

"މިއީ މިފަދަ މިސައިލެއް ޔަމަނުން ފޮނުވާލި ފުރަތަމަ ފަހަރު،" އެ އޮފިޝަލް ބުނެފައިވެއެވެ.

2023 ވަނަ އަހަރުގެ އޮކްޓޯބަރު މަހު އިސްރާއީލުން ޣައްޒާ ގައި ހަމާސްއާ ދެކޮޅަށް ފެށި ހަނގުރާމައިގެ ފަހުން، އީރާނާ ގުޅުން އޮންނަ ހޫޘީން ވަނީ ރަތް ކަނޑުގައި ދަތުރުކުރާ އުޅަނދުފަހަރަށް ހަމަލާދެމުން ގެންގޮސްފައެވެ. އެމީހުން މިކަން ކުރަމުންދާ ކަމަށް ބުނަނީ ފަލަސްތީނުގެ ރައްޔިތުންނާ އެއްބައިވަންތަކަން ދެއްކުމުގެ ގޮތުންނެވެ.

އަދި ޔަމަނުން ވަނީ އިސްރާއީލާ ދިމާއަށް ގިނަ ފަހަރު މަތިން މިސައިލް ހަމަލާތައް ދީފައެވެ. އިސްރާއީލުން މިކަމަށް ރައްދު ދީފައިވަނީ ޔަމަނުގެ ހޫޘީން ގެ ބާރުގެ ދަށުގައިވާ ސަރަހައްދުތަކަށް ހަމަލާދީގެންނެވެ. މީގެ ތެރޭގައި މުހިންމު ހުދެއިދާ ބަނދަރުވެސް ހިމެނެއެވެ.

ހޫޘީން ގެ އިސް އޮފިޝަލެއް ކަމަށްވާ އަބްދުލް ޤާދިރު އަލް-މުރްތަދާ އާދީއްތަ ދުވަހު ބުނެފައި ވަނީ ޔަމަނުގެ އާބާދީގެ ބޮޑު ބައެއްގެ މައްޗަށް ބާރު ފޯރުވާ ހޫތީން، ޣައްޒާ ގެ ފަލަސްތީނުގެ ރައްޔިތުންނާ އެއްބައިވަންތަކަން ދެއްކުމުގެ ގޮތުން މަސައްކަތްކުރުން ކުރިއަށް ގެންދާނެ ކަމަށެވެ.

"(އިސްރާއީލަށް) އެނގެން ޖެހޭނެ އަޅުގަނޑުމެން ޣައްޒާ ގައި ތިބި އަޅުގަނޑުމެންގެ އަޚުންނާ ދުރުނުވާނެކަން، ކޮންމެ ޤުރުބާނީއެއް ވާންޖެހުނު ނަމަވެސް،" އޭނާ އެކްސްގައި ބުންޏެވެ.