ޔުކްރެއިން އަށް ސުލްހަ ގެނައުމަށް ރަޝިޔާ ގެ ޝަރުތުތައް ހާމަ ކޮށްފި

ޔުކްރެއިން އަށް ސުލްހަ ގެނައުމަށް ރަޝިޔާ ގެ ޝަރުތު ތައް އެ ގައުމުގެ ޚާރިޖީ ވަޒީރު ހާމަ ކުރައްވައިފިއެވެ.

ޚާރިޖީ ވަޒީރު ސަރގޭ ލަވްރޯވް އާދީއްތަ ދުވަހު ވިދާޅުވެފައިވަނީ އދ.ގެ ސަލާމަތީ މަޖިލީހުގެ މެންބަރުން ހިމެނޭ ގޮތަށް ޤައުމުތަކުގެ ގްރޫޕަކުން ޔުކްރެއިންގެ ސަލާމަތާއި ރައްކާތެރިކަމުގެ ޔަޤީންކަން ދޭ ފަރާތްތަކުގެ ގޮތުގައި ވާން ޖެހޭނެ ކަމަށެވެ.

ރޮއިޓަރސް އިން މިދިޔަ ހަފްތާގައި ރިޕޯޓުކުރި ގޮތުގައި، ރަޝިޔާގެ ރައީސް ވްލަޑިމިއަރ ޕުޓިން ވަނީ ޔުކްރެއިންއިން އިރުމަތީ ޑޮންބާސް ސަރަޙައްދު އެއްކޮށް ދޫކޮށްލަން ޖެހޭނެ ކަމަށާއި، ނޭޓޯއާ ގުޅުމުގެ އުއްމީދުތައް ދޫކޮށްލަން ޖެހޭނެ ކަމަށާއި، ވަކި ފަރާތަކަށް ނުޖެހޭ ގައުމެއްގެ ގޮތުގައި އޮންނަން ޖެހޭނެ ކަމަށާއި، އަދި ހުޅަނގުގެ ސިފައިން ޔުކްރެއިން ގައި ނުބޭތިއްބުން ހަނގުރާމަ ހުއްޓާލުމުގެ ޝަރުތު ތަކުގެ ތެރޭގައި ހިމެނޭ ކަމަށް ވިދާޅުވެފައެވެ.

ލަވްރޯވް އެން.ބީ.ސީ ނިއުސްގެ "މީޓް ދަ ޕްރެސް" އަށް ވިދާޅުވެފައި ވަނީ ޕުޓިން އާއި އެމެރިކާގެ ރައީސް ޑޮނަލްޑް ޓްރަމްޕް ވަނީ ޔުކްރެއިން އަށް ދޭ ސަލާމަތީ ޔަޤީންކަމުގެ މައްސަލައާ މެދު މަޝްވަރާ ކުރައްވާފައި ކަމަށެވެ.

އަދި 2022 ވަނަ އަހަރު އިސްތަންބޫލުގައި ބޭއްވި ނާކާމިޔާބުވި މަޝްވަރާތަކާ ބެހޭ މައްސަލަ ވެސް ޕުޓިން ވަނީ ނަންގަވާފައެވެ.

2022 ވަނަ އަހަރު އެ މަޝްވަރާތަކުގައި، ރަޝިޔާ އާއި ޔުކްރެއިން ވަނީ ޔުކްރެއިން އަށް އދ.ގެ ސަލާމަތީ މަޖިލީހުގެ ފަސް ދާއިމީ މެންބަރުން ކަމުގައިވާ އިނގިރޭސި ވިލާތް، ޗައިނާ، ފްރާންސް، ރަޝިޔާ އަދި އެމެރިކާ އަދި އެހެނިހެން ޤައުމުތަކުގެ ފަރާތުން ސަލާމަތީ ޔަޤީންކަން ލިބި ދިނުމުން އޭގެ ބަދަލުގައި ޔުކްރެއިން އިން ދާއިމީ ގޮތެއްގައި ވަކިފަރާތަކަށް ނުޖެހި ދެމި އޮތުމާ މެދު މަޝްވަރާކޮށްފައެވެ.

ލަވްރޯވް އެން.ބީ.ސީއަށް ވިދާޅުވެފައިވަނީ ސަލާމަތީ މަޖިލީހުގެ މެންބަރުން ހިމެނޭ ގްރޫޕަކުން ޔުކްރެއިންގެ ސަލާމަތާއި ރައްކާތެރިކަމުގެ ޔަޤީންކަން ދޭންވާނެ ކަމަށެވެ. މި ގްރޫޕުގައި ޖަރުމަނުވިލާތާއި ތުރުކީވިލާތް އަދި އެހެނިހެން ޤައުމުތައްވެސް ހިމެނިދާނެ ކަމަށް ލަވްރޯވް ވިދާޅުވިއެވެ.

"އަދި ޔަޤީންކަން ދޭ ފަރާތްތަކުން ޔަޤީންކަން ދޭނީ ޔުކްރެއިންގެ ސަލާމަތާއި ރައްކާތެރިކަމަށެވެ. އޭގެ ބަދަލުގައި ޔުކްރެއިން އަކީ ވަކިފަރާތަކަށް ނުޖެހޭ، އެއްވެސް އަސްކަރީ ބްލޮކަކާ ގުޅިފައިނުވާ، އަދި ނިއުކްލިއަރ ހަތިޔާރު ނުގެންގުޅޭ ޤައުމަކަށް ވާންޖެހޭނެ ކަމަށް ލަވްރޯވް ވިދާޅުވިއެވެ.

ލަވްރޯވް ސާފުކޮށް ވިދާޅުވެފައިވަނީ ޔުކްރެއިން ނޭޓޯގެ މެންބަރަކަށް ވުމަކީ ރަޝިޔާއަށް ޤަބޫލުކުރެވޭނެ ކަމެއް ނޫން ކަމަށާއި، ރަޝިޔާ އިން ބޭނުންވަނީ ޔުކްރެއިންގައި ތިބި ރަޝިޔާ ބަހުން ވާހަކަދައްކާ މީހުންނަށް ރައްކާތެރިކަން ލިބިދިނުން ކަމަށާއި، އަދި ޔުކްރެއިންއާއެކު ސަރަޙައްދާ ބެހޭ މައްސަލައިގައި މަޝްވަރ ކުރަންޖެހޭ ކަމަށެވެ.