އިނގިރޭސި ޕްރިމިއަރ ލީގުގައި ލީޑްސް ޔުނައިޓެޑާ ދެކޮޅަށް ކުޅުނު މެޗުން ވެސް މޮޅުވެ، އާސެނަލް އިން އެ ޓީމުގެ ފޯމު ދަމަހައްޓައިފި އެވެ.

އާސެނަލްގެ އަމިއްލަ ދަނޑު، އެމިރޭޓްސް ސްޓޭޑިއަމްގައި ހޮނިހިރު ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 5-0 އިންނެވެ. މެޗުގެ ފުރަތަމަ ހާފުގައި އާސެނަލް އިން ދެ ލަނޑު ޖެހިއިރު، ފަހު ހާފުގައި އެ ޓީމުން ވަނީ ތިން ލަނޑު ޖަހައިފަ އެވެ.

މެޗުގެ ފުރަތަމަ ހާފުގެ 34 ވަނަ މިނެޓުގައި އާސެނަލް އަށް ލީޑު ނަގައިދިނީ ޔޫރިއެން ޓިމްބާ އެވެ. އޭނާ އެ ލަނޑު ޖެހީ ޑެކްލަން ރައިސް ތަނަވަސްކޮށްދިން ފުރުސަތެއްގަ އެވެ.

އޭގެ ފަހުން މެޗުގެ ފުރަތަމަ ހާފުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި، ބުކަޔޯ ސަކާ ވަނީ އާސެނަލްގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. އެ ލަނޑު ޖަހަން ސަކާ އަށް ފުރުސަތު ތަނަވަސްކޮށްދިނީ ޓިމްބާ އެވެ.

ދެ ވަނަ ހާފު ފަށައިގެން ތިން ވަނަ މިނެޓުގައި އާސެނަލް އިން ވަނީ ތިން ވަނަ ލަނޑެއް ޖަހައި ލީޑު ފުޅާ ކޮށްފަ އެވެ. އެ ލަނޑު އާސެނަލް އަށް ވިކްޓަ ޔޯކެރޭޝް ޖަހައިދިނީ ރިކާޑޯ ކަލަފިއޯރީ ތަނަވަސްކޮށްދިން ފުރުސަތެއްގަ އެވެ.

އޭގެ އަށް މިނެޓު ފަހުން ޓިމްބާ ވަނީ އާސެނަލްގެ ހަތަރު ވަނަ ލަނޑު ޖަހައިފަ އެވެ. އެ ލަނޑު ޖަހަން ޓިމްބާ އަށް ފުރުސަތު ތަނަވަސްކޮށްދިނީ ކަލަފިއޯރީ އެވެ. މެޗުގައި އާސެނަލްގެ ފަހު ލަނޑަކީ އެ ޓީމަށް ލިބުނު ޕެނަލްޓީ ކާމިޔާބު ކޮށްގެން ޔޯކެރޭޝް ޖެހި ލަނޑެކެވެ.

އެ މެޗަށް ފަހު ވާހަކަ ދައްކަމުން އާސެނަލްގެ ކޯޗު މިކޭލް އާޓެޓާ ބުނެފައި ވަނީ، އެ މެޗުގައި އާސެނަލްގެ ކުޅުންތެރިންގެ ފަރާތުން ވަރަށް ގިނަ ރަނގަޅު ކަންކަން ފެނިފައިވާ ކަމަށެވެ. ޚާއްސަކޮށް ލީގުގެ ކުރީ ކޮޅު އަމިއްލަ ދަނޑުގައި ކުޅުނު އެ މެޗުން ފެނުނީ ވަރަށް ޕޮސިޓިވް ކަންތައްތަކެއް ކަމަށް އާޓެޓާ ބުންޏެވެ.

އޭނާ ބުނީ މެޗުން ލިބުނު ތިން ޕޮއިންޓާ މެދު ވަރަށް ބޮޑަށް ހިތްހަމަ ޖެހޭ ކަމަށާއި، އެއަށް ވުރެ ބޮޑަށް ކުޅުންތެރިންގެ ފަރާތުން ފެނުނު ރޫޙާއި، ޓީމެއްގެ ގޮތުގައި ކުރި މަސައްކަތާ މެދު ހިތްހަމަ ޖެހޭ ކަމަށެވެ. އާޓެޓާ ބުނީ އުންމީދަކީ ކުރިއަށް އޮތް ތަނުގައި ވެސް ޓީމުގެ ކުޅުން އެ ގޮތުގައި ފެނުން ކަމަށެވެ.

ލީގުގައި ދެން އާސެނަލް އަށް އޮންނާނީ ރަށުން ބޭރުގައި ލިވަޕޫލްއާ ދެކޮޅަށް ކުޅޭ މެޗެވެ.