އިސްރާއީލާ ދެކޮޅަށް ފިޔަވަޅު އެޅުމަށް ކެބިނެޓުގެ ތާއީދު ހޯދުމަށް ކުރި މަސައްކަތް ނާކާމިޔާބު ވުމާ ގުޅިގެން ނެދަރލޭންޑްސް ގެ ޚާރިޖީ ވަޒީރު އިސްތިއުފާ ދެއްވައިފި

ޣައްޒާ ގައި ހިނގަމުންދާ ނަސްލު ނައްތާލުމުގެ ޢަމަލުތަކާ ގުޅިގެން އިސްރާއީލާ ދެކޮޅަށް ފިޔަވަޅުތަކެއް އެޅުމަށް ކެބިނެޓުގެ ތާއީދު ހޯދުމަށް ކުރި މަސައްކަތް ކާމިޔާބު ނުވުމާ ގުޅިގެން ނެދަރލޭންޑްސް ގެ ޚާރިޖީ ވަޒީރު އިސްތިއުފާ ދެއްވައިފިއެވެ.

ޑަޗް ޚާރިޖީ ވަޒީރު ކަސްޕަރ ވެލްޑްކޭމްޕް އިސްތިއުފާ ދެއްވީ ހުކުރު ދުވަހު އެވެ.

މެދުމިނުގެ ކަނާތުފިޔައިގެ ޕާޓީއެއް ކަމަށްވާ "ނިއު ސޯޝަލް ކޮންޓްރެކްޓް" ޕާޓީގެ މެންބަރެއް ކަމަށްވާ ވެލްޑްކޭމްޕް، ޣައްޒާ ސިޓީ އާއި ހިސޯރު ކޮށްފައިވާ ސަރަޙައްދުތަކަށް ހަމަލާ ދިނުމަށް އިސްރާއީލުން ރާވާފައިވާ ރޭވުންތަކާ ގުޅިގެން އައު ފިޔަވަޅުތަކެއް އަޅަން ގަސްދު ކުރާކަން އެ ޤައުމުގެ ޕާލިމަންޓަށް އަންގާފައިވެއެވެ.

ނަމަވެސް ހުކުރު ދުވަހު އޭނާ ވިދާޅުވީ "މާނަހުރި ފިޔަވަޅުތަކެއް" އެޅުމަށް އެއްބަސްވުމަކަށް ނާދެވުނު ކަމަށާއި، މިހާރު ވެސް އަޅާފައިވާ ފިޔަވަޅުތަކާ ގުޅޭގޮތުން އޭނާގެ ބައިވެރިންގެ ފަރާތުން ތަކުރާރުކޮށް އިދިކޮޅު ހެދުމާ ކުރިމަތިލާންޖެހުނު ކަމަށެވެ.

އޭނާގެ ހުށަހެޅުންތަކުގެ ތެރޭގައި ހިމެނެނީ ފަލަސްޠީނުގެ އޮކިއުޕައިޑް ޓެރިޓަރީ ތަކުގައި އިސްރާއީލުން އުފައްދާ ތަކެތި އެ ގައުމަށް އެތެރެ ކުރުން މަނާ ކުރުމެވެ.

ވެލްޑްކެމްޕް ވަނީ ޣައްޒާ ގެ ހާލަތު ގޯސްވަމުން ދާ ކަމަށް ވިދާޅުވެ އިސްރާއީލަށް ކަނޑުބޯޓުގެ ބައިތައް އެކްސްޕޯޓް ކުރާ ތިން ހުއްދައެއް ބާޠިލު ކޮށްފައެވެ.

"އަޅުގަނޑުމެންނަށް ޣައްޒާގައި ހިނގަމުންދާ ކަންތައްތަކާ، ޣައްޒާ ސިޓީ އަށް ދެވޭ ހަމަލާތަކާ، އަދި ވެސްޓް ބޭންކުގައި ހިނގަމުންދާ ކަންތައްތަކާ، އިރުމަތީ ޖެރޫސަލަމްގައި ގަވައިދާ ޚިލާފަށް ޢިމާރާތް ކުރަން ނިންމުން ވެސް ފެނޭ،" ވެލްޑްކެމްޕް ނޫސްވެރިންނަށް ވިދާޅުވިއެވެ.

އޭނާ ވަނީ އިސްރާއީލުގެ ހައްދުފަހަނަ އެޅި ވަޒީރުން ކަމަށްވާ ބެޒަލެލް ސްމޮޓްރިޗް އަދި އިތަމާރު ބެން-ގްވިރް ނެދަރލޭންޑްސް އަށް ވަނުން މަނާ ކުރުމަށް ވެސް މަސައްކަތް ކުރައްވާފައެވެ.

އޭނާ އިސްތިއުފާ ދެއްވުމާ ގުޅިގެން ނެދަލޭންޑްސް ގައި މި ވަގުތައް ޚާރިޖީ ވަޒީރަކު ނުހުންނާނެ އެވެ.

އޭނާ އިސްތިއުފާ ދެއްވުމާ ގުޅިގެން، "ނިއު ސޯޝަލް ކޮންޓްރެކްޓް" ޕާޓީގެ ހުރިހާ ވަޒީރުންނާއި ދައުލަތުގެ ސެކްރެޓަރީން ވެލްޑްކެމްޕް އަށް ތާއީދު ކުރާކަން ޔަޤީންކޮށްދީ، އެއްބައިވަންތަ ކަމުގެ ގޮތުން ވަގުތީ ސަރުކާރުން އިސްތިއުފާ ދީފައިވެއެވެ. މިކަމުގެ ސަބަބުން ސިޔާސީ ހަލަބޮލިކަމެއް އުފެދިފައިވެއެވެ.

ނެދަލޭންޑްސްގެ ޕާލިމަންޓުން އިސްރާއީލާ ދެކޮޅަށް އަޅާ ފިޔަވަޅުތަކާ ބެހޭ ބަހުސް ތަކުރާރުކޮށް ފަސްކޮށްފައިވެއެވެ. ބުރާސްފަތި ދުވަހު ބޭއްވުމަށް ހަމަޖެހިފައިވާ މި ބަހުސް ވަނީ ހުކުރު ދުވަހުގެ މެންދުރުފަހު ބޭއްވުނު ކެބިނެޓް ބައްދަލުވުން ދިގުލައިގެން ދިއުމާ ގުޅިގެން ފަސްކޮށްފައެވެ.

އިދިކޮޅު ޕާޓީތަކުގެ ޕާލިމަންޓް މެންބަރުން ވަނީ އިސްރާއީލާ ދެކޮޅަށް ފިޔަވަޅު ނާޅާތީ ކުރިން ވެސް ހިތްހަމަނުޖެހުން ފާޅުކޮށްފައެވެ. އަދި ބައެއް މެންބަރުން ބޮޑު ވަޒީރާ ދެކޮޅަށް އިތުބާރު ނެތްކަމުގެ ވޯޓެއް ނެގުމަށް ގޮވާލާފައިވެއެވެ.