އިންޑިއާގެ ރިޔަލަންސް ކޮމިއުނިކޭޝަންސް ކުންފުނީގެ ވެރިޔާ އަނިލް އަމްބާނީގެ މައްޗަށާއި ކުންފުނީގެ މައްޗަށް ޚިޔާނާތުގެ ޖިނާއީ ތަހުގީގެއް ސެންޓްރަލް ބިއުރޯ އޮފް އިންވެސްޓިގޭޝަން (ސީބީއައި) އިން ފަށައިފިއެވެ.

އިންޑިއާގެ ފެޑެރަލް ތަޙުޤީޤު އޭޖެންސީން ހޮނިހިރު ދުވަހު ބުނެފައި ވަނީ، އިންޑިއާގެ އެންމެ ބޮޑު ބޭންކުން ހުށަހަޅާފައިވާ މަކަރާއި ހީލަތުގެ ޝަކުވާއަކާ ގުޅިގެން، ވިޔަފާރިވެރިޔާ އަނިލް އަމްބާނީ އާއި އޭނާގެ ކުންފުނި ރިލަޔަންސް ކޮމިއުނިކޭޝަންސް ލިމިޓެޑްގެ މައްޗަށް ޖިނާއީ ތަހުގީގެއް ފަށާފައިވާ ކަމަށެވެ.

ސްޓޭޓް ބޭންކް އޮފް އިންޑިއާ އިން ތުހުމަތު ކޮށްފައި ވަނީ، މިލިއަނަރު މުކޭޝް އަމްބާނީގެ ކޮއްކޮ އަނިލް އަމްބާނީ އާއި ރިލަޔަންސް ކޮމިއުނިކޭޝަންސް އިން ބޭންކަށް މަކަރު ހެދުމުގެ ސަބަބުން 30 ބިލިއަން އިންޑިއަން ރުޕީސް (344 މިލިއަން އެމެރިކާ ޑޮލަރު) ގެ ގެއްލުން ވެފައިވާ ކަމަށެވެ.

އިންޑިއާގެ ސެންޓްރަލް ބިއުރޯ އޮފް އިންވެސްޓިގޭޝަނުން މުންބާއީ ގައި ހުރި އަނިލް އަމްބާނީގެ ގެއާއި މިހާރު އުވާލާފައިވާ ރިލަޔަންސް ކޮމިއުނިކޭޝަންސްގެ އޮފީސްތައް ތަހުގީގަށް ބަލައި ފާސްކޮށްފައިވާ ކަމަށް އެ އޭޖެންސީން ނެރުނު ނޫސް ބަޔާނެއްގައި ބުނެފައިވެއެވެ.

އަނިލް އަމްބާނީ އާއި އޭނާގެ ކުންފުނިން ބޭންކުގެ ފައިސާ ނަހަމަ ގޮތުގައި ބޭނުންކޮށް، އެއްބަސްވެފައިވާ ކަންކަން ނޫން އެހެން ކަންކަމަށް އެ ފައިސާ ބަދަލުކޮށްފައިވާ ކަމަށް އެ އޭޖެންސީން ބުނެފައިވެއެވެ.

މީގެ ކުރީ މަހު، އިންޑިއާގެ އެންފޯސްމަންޓް ޑައިރެކްޓަރޭޓުން ވެސް ރިލަޔަންސް ގްރޫޕާ ގުޅުންހުރި 35 ތަނެއް ބަލައި ފާސްކޮށްފައިވެއެވެ. މިއީ މަނީ ލޯންޑަރިންގ އާއި ސަރުކާރުގެ ފައިސާ ނަހަމަ ގޮތުގައި ބޭނުން ކުރިކަމުގެ ތުހުމަތުތަކާ ގުޅިގެން ކުރެވުނު ތަޙުޤީޤެއްގެ ބައެއްގެ ގޮތުގައި ކަމަށް ސަރުކާރުގެ މަސްދަރަކުން ރޮއިޓަރސް އަށް މަޢުލޫމާތު ދީފައިވެއެވެ.