އއ. މާޅޮހުގައި ރަހުމްކުޑަކޮށް މަރާލާފައި އޮއްވާ ފެނުނު އަބްްދުއްރަހުމާން އާދަމް މަރާލުމުގައި ބައިވެރިވިކަމުގެ ތުހުމަތުގައި ހައްޔަރުކުރި މީހުންގެ ވަނަވަރު ހާމަކޮށްފިއެވެ.

2025 ޖުލައި 12 ވަނަ ދުވަހުގެ ދަންވަރު ހިނގި މި ހާދިސާގައި، ގޭގައި ނިދާފައި އޮއްވާ ޢަބްދުއްރަޙްމާން އާދަމް އަށް ބޮޑެތި ޒަހަމްތަކެއް ދިނުމުގެ ސަބަބުން، ސިއްހީ މަރުކަޒުގައި ފަރުވާ ދެމުންދަނިކޮށް އެރޭ ފަތިހު ވަނީ ނިޔާވެފައެވެ. މައުލޫމާތު ލިބޭ ގޮތުގައި އޭނާގެ ބޮލުގައި އެއްޗަކުން ޖަހާ ބޯ އޮތީ ޗަސްކޮށްލާފައެވެ.

ފުލުހުން ބުނީ މި މައްސަލައިގެ ތުހުމަތުގައި ހައްޔަރުކޮށްފައިވަނީ އއ. މަޅޮސް / ލިލީފެހި، މުހައްމަދު ވިސާމް (22އ)، އއ. މާޅޮސް / ފިނިވާނެ، އަހުމަދު ފާރިސް (27އ) އަދި އއ. މާޅޮސް / ފިޔަ އަހުމަދު އާޝިދު (27އ) އެވެ.

ފުލުހުން ބުނީ މި މީހުންގެ ބަންދާ މެދު ގޮތެއް ނިންމުމަށް ކޯޓަށް ހާޒިރުކުރުމުން މުހައްމަދު ވިސާމް އަދި އަހުމަދު ފާރިސް ޝަރީއަތް ނިމެންދެން ބަންދުކުރުމަށް އަދި އަހުމަދު އާޝިދު 5 ދުވަހަށް ބަންދު ކުރުމށް އަމުރުކޮށްފައިވާ ކަމަށެވެ. މި 3 މީހުންގެ ތެރެއިން ވިސާމް އަދި ފާރިސް ހައްޔަރުކުރީ މާޅޮހުންނެވެ. އަދި އާޝިދު ހައްޔަރުކުރީ މާލެއިންނެވެ.

މި މައްސަލައިގައި މި މަހުގެ 10 ވަނަ ދުވަހު 5 މީހެއްގެ ފޯނާއި އަންނައުނުތަކެއް ފުލުހުންގެ ބެލުމުގެ ދަށަށް ގެންގޮސްފައިވެއެވެ. ފުލުހުން އަންނަނީ މި މައްސަލަ ތަހުގީގުކުރަމުންނެވެ.