ސާބިއާގައި ސަރުކާރާ ދެކޮޅު މުޒާހަރާތައް ހޫނުވެ، ވެރިކަން ކުރާ ޕާޓީގެ އޮފީސް ތަކުގައި ހުޅު ޖަހައިފިއެވެ.

ސާބިއާގެ ވެރިކަން ކުރާ ސާބިއަން ޕްރޮގްރެސިވް ޕާޓީ (އެސްއެންއެސް) ގެ އޮފީސްތަކުގައި ހުޅު ޖެހިއިރު، ވިދިވިދިގެން ފަސްވަނަ ރޭވެސް ސަރުކާރާ ދެކޮޅު މުޒާހަރާތަކުގައި އާންމުންނާއި ފުލުހުންނާ ދެމެދު ވަރުަގަދަ ހަމަނުޖެހުންތަކެއް ހިނގާފައި ވެއެވެ.

ވަލްޔޭވޯ ސިޓީގައި މާސްކު އަޅައިގެން ތިބި ބަޔަކު އެސްއެންއެސް ގެ އޮފީސްތަކަށް ހަމަލާދިނުމާ ގުޅިގެން ފުލުހުން ވަނީ މުޒާހަރާކުރާ ފަރާތްތަކާ ދެކޮޅަށް ކަރުނަ ގޭހާއި ސްޓަން ގްރެނޭޑް ބޭނުންކޮށްފައެވެ. ވެރިރަށް ބެލްގްރޭޑާއި ނޮވީ ސަދުގައި ފުލުހުންގެ އަނިޔާވެރިކަމާއި ގުޅޭ ތުހުމަތުތަކެއް ވަނީ ފެތުރިފައެވެ. ނަމަވެސް މި ތުހުމަތުތައް ދާޚިލީ ކަންކަމާބެހޭ މިނިސްޓްރީން ވަނީ ދޮގުކޮށްފައެވެ.

މި ހަމަނުޖެހުންތައް ފެށުނީ ނޮވީ ސާޑު ގައި ނޮވެމްބަރު މަހު ރޭލްވޭ ސްޓޭޝަންގެ ބައެއް ވެއްޓުނު ހާދިސާގައި 16 މީހުން މަރުވުމާ ގުޅިގެންނެވެ. ގިނަ ބަޔަކު ބުނާ ގޮތުގައި މި ހާދިސާ ހިނގީ ރައީސް އަލެކްސާންޑަރ ވުޗިޗް ގެ ސަރުކާރުގެ ކޮރަޕްޝަނާއި އިހުމާލުގެ ސަބަބުންނެވެ.

ކޮރަޕްޝަނާ ދެކޮޅަށް ފެށުނު މުޒާހަރާތަކުގައި އެތައް ސަތޭކަ ހާސް މީހުން ބައިވެރިވެފައިވީ ނަމަވެސް، ބުދަ ދުވަހު ސަރުކާރަށް ތާއީދުކުރާ ފަރާތްތަކުން ކައުންޓަރ މުޒާހަރާތަކެއް ފެށުމާ ހަމައަށް މުޒާހަރާތައް ކުރިއަށް ގޮސްފައިވަނީ ސުލްހަވެރިކަމާ އެކުގައެވެ.

ހޮނިހިރު ދުވަހުގެ ރޭ ސަރުކާރާ ދެކޮޅަށް މުޒާހަރާ ކުރާ މީހުން ނުކުމެ އަވަސް އިންތިޚާބަކަށް ގޮވާލުމުން ގެންދަނިކޮށް ރަޔަޓް ފުލުހުން ވެރިރަށް ބަލްގްރޭޑް އާއި އެހެނިހެން ބޮޑެތި ސިޓީ ތަކަށް ނުކުމެ މުޒާހަރާ ކުރާ މީހުންނާ ވަނީ ކުރިމަތިލާފައެވެ.

މުޒާހަރާ ކުރާ މީހުން ވަނީ ސަރުކާރާ ކޯލިޝަން ހަދާފައިވާ ސާބިއަން ރެޑިކަލް ޕާޓީ އޮފީހުގެ ބިއްލޫރިތައް ވެސް ތަޅާލާފައެވެ.

ވޭތުވެދިޔަ ހަފްތާގައި، ޤައުމުގެ އެކި ކަންކޮޅުތަކުގައި ބޭއްވުނު އިހުތިޖާޖުތަކުގައި މީހުންނަށް އަނިޔާވެފައިވާ ކަމަށް ރިޕޯޓުކުރެވިފައިވެއެވެ.

ހުކުރު ދުވަހު، ކައުންސިލް އޮފް ޔޫރަޕްގެ އިންސާނީ ޙައްޤުތަކާބެހޭ ކޮމިޝަނަރު މައިކަލް އޯފްލާހަރޓީ ވަނީ ސާބިއާގައި "ފުލުހުން ބޭނުންކުރި ހާލަތާ ނުބައްދަލު ބާރުގެ" މައްޗަށް ކަންބޮޑުވުން ފާޅުކޮށް، "ހަމައެއް ނެތި މީހުން ހައްޔަރުކުރުން ހުއްޓާލައި، ހާލަތު މައިތިރިކުރުމަށް" އިލްތިމާސް ކޮށްފައެވެ.

ރަޝިޔާ އިން ވަނީ މޮސްކޯ އަށް ތާއީދުކުރާ ރައީސް ވުޗިޗް އަށް އެހީތެރިކަން ފޯރުކޮށްދޭނެ ކަމަށް ބުނެފައެވެ. ރަޝިޔާގެ ބަޔާނެއްގައި ބުނެފައި ވަނީ "އެކުވެރި ސާބިއާ ގައި ހިނގަމުންދާ ކަންކަމާމެދު އަޅާނުލާ ތިބެވޭކަށް ނެތް" ކަމަށެވެ.

ރައީސް ވުޗިޗް ވަނީ އަވަސް އިންތިޚާބަކަށް ގޮވާލުމުން އެކަމާ އިންކާރުކޮށް، މުޒާހަރާތަކަކީ އޭނާގެ ވެރިކަން ވައްޓާލުމަށް ބޭރުގެ ފަރާތްތަކުން ރާވާފައިވާ ރޭވުމެއްގެ ބައެއް ކަމަށް ބުނެފައެވެ. އޭނާގެ 12 އަހަރުގެ ވެރިކަން ނިމުމަކަށް ގެނައުމަށް ގޮވާލާ މުޒާހަރާތައް މިހާރު ސިފަ ކުރަނީ ކަރަޕްޝަން އާ ދެކޮޅަށް ރައްޔިތުން ވަމުންދާ ގުރުބާނީގެ ރަމްޒެއްގެ ގޮތުގައެވެ.