އަލްޖަޒީރާގެ ފަސް ނޫސްވެރިއަކަށް ޑްރޯން ހަމަލާ ދީ ޝަހީދު ކޮށްލައިފި

ޣައްޒާގައި ތިބި އަލްޖަޒީރާގެ ނޫސްވެރިންގެ ޓީމަށް އިސްރާއީލުން ޑްރޯން ހަމަލާދީ، ފަސް ނޫސްވެރިން ޝަހީދު ކޮށްލައިފިއެވެ.

އިންސާނީ ހައްގުތަކަށް މަސައްކަތް ކުރާ ޖަމާއަތްތަކުންނާއި އދ އިން ވަނީ މި ހަމަލާ ކުއްވެރިކޮށް އިސްރާއީލަށް ފާޑު ކިޔާފައެވެ.

އާދީއްތަ ދުވަހުގެ ރޭގެ ފަހު ވަގުތެއްގައި ޣައްޒާ ސިޓީގެ އަލް ޝިފާ ހޮސްޕިޓަލުގެ މައި ގޭޓު ބޭރުގައި ޖަހާފައި ހުރި ނޫސްވެރިންގެ ޓެންޓަކަށް އަމާޒު ކޮށް އިސްރާއީލުން ޑްރޯން ހަމަލާއެއް ދިނުމުގެ ސަބަބުން ހަތް މީހުން މަރުވިއެވެ. މަރުވި މީހުންގެ ތެރޭގައި އަލްޖަޒީރާގެ ނޫސްވެރިޔާ މުޙައްމަދު ޤުރައިޤާ އަދި ކެމެރާމަނުން ކަމުގައިވާ އިބްރާހީމް ޒާހިރު، މުއުމިން އަލިވާ އަދި މުޙައްމަދު ނައުފަލް ހިމެނެއެވެ.

މި ހަމަލާގައި ޣައްޒާ ގެ މިނިވަން ނޫސްވެރި އަކު ވެސް ޝަހީދު ވި ކަމަށް ރިޕޯޓު ކުރެވިފައި ވެއެވެ.

ފޮރިން ޕްރެސް އެސޯސިއޭޝަން އިން ނެރުނު ބަޔާނެއްގައި ބުނެފައިވަނީ މި ފާއިތުވި 22 މަސް ދުވަހުގެ ތެރޭގައި، އިސްރާއީލުން ގަސްދުގައި ފަލަސްތީނުގެ ނޫސްވެރިން ހަނގުރާމަވެރިން ކަމުގައި ލޭބަލް ކޮށް އެމީހުންނަށް ހަމަލާ ދީފައިވާ ކަމަށެވެ. އަދި މިގޮތައް ޓާގެޓް ކުރުމުގައި އެ ނޫސްވެރިންނާ ބެހޭ ގޮތުން ސާބިތު ކުރެވޭ ހެތްކެއްވެސް ދެއްކިފައި ނުއަޮންނަ ކަމަށް ބުނެފައިވެއެވެ.

އދ ގެ އިންސާނީ ހައްގުތަކާ ބެހޭ އޮފީހުން ބުނީ މިއީ ބައިނަލް އަގްވާމީ ގާނޫނާ ޚިލާފު ވުން ކަމުަގައެވެ. އިސްރާއީލުން ހުރިހާ އާންމު ރައްޔިތުންނާއި ނޫސްވެރިން ހިމާޔަތް ކޮށްދޭން ޖެހޭނެ ކަމަށް ވެސް އދ އިން ބުނެފައިވެއެވެ.

އަލްޖަޒީރާ މީޑިއާ ނެޓްވާރކުން ބުނީ މިއީ ސީދާ ޓާގެޓް ކޮށްގެން ދިން ހަމަލާ އެއް ކަމަށާއި، މިކަން ހަރުކަށި އިބާރާތުން ކުށްވެރި ކުރާ ކަމަށެވެ.

ރިޕޯޓާސް ވިތައުޓް ބޯޑާސް އިން ބުނާ ގޮތުގައި މި ހަމަލާގައި އިތުރު ތިން ނޫސްވެރިން ޒަޚަމްވެފައި ވެއެވެ.

ކޮމިޓީ ޓު ޕްރޮޓެކްޓް ޖާނަލިސްޓްސް (ސީޕީޖޭ) އިން ބުނެފައިވާ ގޮތުގައި 2023 ވަނަ އަހަރުގެ އޮކްޓޯބަރު މަހު ޣައްޒާ ގައި އިސްރާއީލުގެ ހަނގުރާމަ ފެށިފަހުން 186 ނޫސްވެރިން މަރުވެފައިވާކަން ކަށަވަރުވެފައި ވެއެވެ.

ސީޕީޖޭ އިން ބުނެފައި ވަނީ 1992 ވަނަ އަހަރުން ފެށިގެން މިފަދަ މަޢުލޫމާތު ރެކޯޑު ކުރަން ފެށި ފަހުން ނޫސްވެރިންނަށް އެންމެ ނުރައްކާތެރި ދުވަސްވަރަކީ މިއީ ކަމަށެވެ.

ފާއިތުވި މަހު، ބީބީސީ އާއި އިތުރު ތިން ނޫސް އޭޖެންސީތަކެއް ކަމުގައިވާ ރޮއިޓަރސް، އޭޕީ އަދި އޭއެފްޕީ އިން ވަނީ އެކުގައި ބަޔާނެއް ނެރެ، ޣައްޒާ ގައި ތިބި ނޫސްވެރިންނާ މެދު "ނުހަނު ކަންބޮޑުވާ" ކަމަށް ބުނެފައެވެ. އެ ނޫސްވެރިންނަށާއި، އެމީހުންގެ ޢާއިލާތަކަށް ކާންދިނުމަށް ވެސް ދަތިވެފައިވާ ކަމަށް އެ ބަޔާނުގައި ބުނެފައިވެއެވެ.

ބީބީސީ އަށް މަސައްކަތް ކޮށްދޭ ތިން މިނިވަން ނޫސްވެރިން ބުނެފައިވަނީ އެމީހުންނަށް ގިނަ ދުވަސްތަކެއް ވަންދެން އެއްޗެއް ނުކައި ތިބެން ޖެހޭ ކަމަށާއި، އޭގެ ތެރެއިން އެކަކު ވީޑިއޯ ކުރަމުން ދަނިކޮށް ވަރު ދޫ ވެގެން ވަނީ ވެއްޓިފައެވެ.