"ޣައްޒާ ސިޓީން ނުނިކުންނާނަން، އަހަރެމެން ދިރިތިބޭނީ ވެސް މަރުވާނީ ވެސް މިތާ"

ޣައްޒާ ސިޓީން ނުނިކުންނާނެ ކަމަށާއި، ދިރި ތިބޭނީ ވެސް، މަރުވެ ދާނީ ވެސް އެތަނުގައި ކަމަށް ޣައްޒާ ގެ އާންމު ރައްޔިތުން ބުނެފިއެވެ.

އިސްރާއީލުން ޣައްޒާ ސިޓީ ހިފުމަށް ރާވާ، އެތަނުގައި ދިރިއުޅޭ ގާތްގަނޑަކަށް އެއް މިލިއަން ފަލަސްތީނު މީހުން ޣައްޒާގެ ދެކުނަށް ބަދަލުކުރަން އުޅުނު ނަމަވެސް، ގިނަ ރައްޔިތުން އެތަން ދޫކޮށް ދިއުމަށް ދަނީ އިންކާރުކުރަމުންނެވެ.

ޣައްޒާ ސިޓީގައި ދިރިއުޅޭ އުއްމު އިމްރާން އަލްޖަޒީރާ އާ ވާހަކަ ދައްކަމުން ބުނީ އިސްރާއީލު ސިފައިން އެމީހުން އެ ސިޓީން ނުކުމެގެން ދިއުމަށް ބިރުދައްކަމުންދާ ކަމަށެވެ. "އެމީހުން ބުނަނީ ދެކުނަށް ދާށޭ، އަލް-މަވާސީ އަށް ދާށޭ. އެކަމަކު އެއްވެސް ތަނެއް ރައްކާތެރިއެއް ނޫން. އުތުރަކަސް، ދެކުނަކަސް، އިރަކަސް، ހުޅަނގަސް، އަހަރެމެން ތިބޭނީ މިތާ" އޭނާ ބުންޏެވެ.

އޭނާގެ މަންމަ ވެސް އަލްޖަޒީރާ އަށް ބުނީ އޭނާ ވެސް ހުރީ ހަމަ އެ ގޮތުގައި ކަމަށެވެ.

"އަހަރެމެން ޣައްޒާ ސިޓީ ދޫކޮށް ނުދާނަން، އަހަރެމެން ދިރިއުޅޭނީ މިތާގައި، އަހަރެމެން މަރުވާނީ ވެސް މިތާގައި، އަހަރެމެންގެ ހުރިހާ ހަނދާންތަކެއް ހުރީ މިތާގައި، މިތާކުން ނުދާނަން، މަރާލިޔަސް ނުދާނަން، އަހަރެމެންގެ ގެދޮރު ހަލާކު ކޮށްލިޔަސް ނުދާނަން."

ޣައްޒާ ސިޓީގެ ޓެންޓެއް ގައި ދިރިއުޅޭ ސައީދު އަލް-ޒަރުދު ބުނީ އޭނާ ވަނީ 10 ފަހަރު ތަން ބަދަލުކޮށްފައި ކަމަށާއި ދެން ދާނެ ތަނެއް ނެތް ކަމަށެވެ. "އަހަރެން މަރުވާނީ އަހަރެންގެ ބިމުގައި" އޭނާ ބުންޏެވެ.

ޣައްޒާގެ ރައްޔިތުން މިހާރު ކުރިމަތިލާންޖެހިފައިވާ ހާލަތު ވަރަށް ބޮޑަށް ގޯސްވެފައި ވީ ނަމަވެސް، ގިނަ ރައްޔިތުން އަދިވެސް ޣައްޒާ ސިޓީގައި ދެމިތިބުމަށް ވަނީ ނިންމާފައެވެ.

ޣައްޒާގެ ހެލްތް މިނިސްޓްރީގެ މައުލޫމާތުތަކުން ދައްކާ ގޮތުގައި ވޭތުވެ ދިޔަ 24 ގަޑިއިރު ތެރޭގައި އިތުރު 4 މީހުން ބަނޑުހައިހޫނުކަމުގެ ސަބަބުން ވަނީ މަރުވެފައެވެ. މިހާތަނަށް ބަނޑުހައިހޫނުކަމުގެ ސަބަބުން ފުރާނަ ގެއްލުނު މީހުންގެ އަދަދު 201 އަށް އަރާފައިވެއެވެ.

އިސްރާއީލުގެ ހަނގުރާމައިގެ ސަބަބުން ޣައްޒާ ގައި ޝަހީދުވި މީހުންގެ އަދަދު 61,330 ށް ވަނީ އަރާފައެވެ. އަދި 152,359 މީހުން ވަނީ ޒަހަމްވެފައެވެ.

ޣައްޒާ ސިޓީ މުޅިން ހިފުމަށް އިސްރާއީލުން ނިންމި ނިންމުން އެކި ގައުމުތަކުންނާއި އދ އިން ވަނީ ކުށްވެރިކޮށް ކަންބޮޑުވުން ފާޅުކޮށްފައެވެ.