ގައުމާއި މެދު އެމްއެމްއޭގެ ލަފާ ވަރަށް ބަނަ، ޔޫޒަބަލް ރިޒަރވްގެ ގޮތުގައި ހުރީ 200 މިލިއަން ޑޮލަރު - ޝަމްހީދު

ގައުމާއި މެދު އެމްއެމްއޭގެ ލަފާ ފެންނަނީ ވަރަށް ބަނަކޮށް ކަމަށް ރައްޔިތުންގެ މަޖިލީހުގެ ހުޅުމާލެ ދެކުނު ދާއިރާގެ މެމްބަރު ޑރ.އަޙްމަދު ޝަމްހީދު ވިދާޅުވެއްޖެއެވެ.

އޭނާ އެފަދައިން ވިދާޅުވީ އަންގާރަ ދުވަހު މަޖިލީހުގައި ޤައުމީ ޕޭމަންޓް ސިސްޓަމްގެ ޤާނޫނަށް އިޞްލާޙު ގެނައުމުގެ ބިލަށް ވާހަކަދައްކަވަމުންނެވެ. ހޯމަ ދުވަހު މާލިއްޔަތު ކޮމިޓީ އާއި އެމްއެމްއޭ އިން ބައްދަލު ކުރި ކަމަށާއި ގައުމާއި މެދު އެމްއެމްއޭ އިން ލަފާކުރާ ކަންކަން ހުރީ ރަނގަޅަށް ނޫން ކަމަށް އޭނާ ވިދާޅުވިއެވެ.

2024 ވަނަ އަހަރު ގައުމީ އުފެއްދުންތެރިކަން ރެކޯޑް މިންވަރަކަށް ދަށްވެފައިވާ ކަމަށް ޑރ.ޝަމްހީދު ފާހަގަކުރެއްވިއެވެ. ރާއްޖޭގެ އުފެްދުންތެރިކަން މި އަހަރު ކުރި އަރާނެ ކަމަށް ލަފާކުރި މިންވަރަށް ކުރި ނާރާނެކަން މިހާރު ކުރާ އަންދާޒާތަކުން ހާމަވާ ކަމަށް ވެސް ޑރ.ޝަމްހީދު ވިދާޅުވިއެވެ. ކުރިން މި އަހަރު ޤައުމީ އުފެއްދުންތެރިކަން 6-7 އިންސައްތަ ކުރިއަރާނެކަމަށް އެމްއެމްއޭ އިން ލަފާކުރި ނަމަވެސް މިހާރު މި އަހަރު ގައުމީ އުފެއްދުންތެރިކަން ކުރިއަރާނެ ކަމަށް ބެލެވެނީ 4-4.5 އިންސައްތަ އަށް ކަމަށް ޝަމްހީދު ވަނީ ވިދާޅުވެފައެވެ.

ޔޫޒަބަލް ރިޒަރވް ދަށް. 200 މިލިއަން ޑޮލަރޭ ވިދާޅުވި ހުރީ. އެވެސް އެއީ އިންޑިއާ އިން ދިން 400 މިލިއަން ޑޮލަރު އެއްކޮށްލުމުން އެވަރު މި ވަނީ އެއްކޮށްލީމަ އޭ އެވަރު ވަނީ. އެއަށް އިތުރަށް ލިބިފައި ހުރީ 6 މަހޭ. 6 މަސްފަހުން އެ އަނބުރާ ގެންދިޔައީމަ އެހުރި ޔޫޒަބަލް ރިޒަރވް ނެގެޓިވްވާ ހާލަތަކަށް މި ދަނީ.

މަޖިލީހުގެ ހުޅުމާލެ ދެކުނު ދާއިރާގެ މެމްބަރު ޑރ.އަޙްމަދު ޝަމްހީދު

މީގެ އިތުރުން އިންފްލޭޝަން އިންތިހާ އަށް އިތުރު ކަމަށާއި ކާބޯތަކެތީގެ އިންފްލޭޝަން 8.5% އަށް އަރާފައިވާ ކަމަށް ޝަމްހީދު ވިދާޅުވިއެވެ. ގައުމުގެ ހާލަތު ސާފުކޮށް އާއްމުންނަށް އެނގެން ޖެހޭ ކަމަށް ޝަމްހީދު ވިދާޅުވިއެވެ. މާލީ ގޮތުން އިސްލާހު ކުރަން ޖެހޭ ބައެއް ކަންކަމަށް ވެސް ޝަމްހީދު އަލިއަޅުއްވާލެއްވިއެވެ. މީގެ އިތުރުން، އެމްއެމްއޭއިން ބޭންކްތަކުގެ މުއާމަލާތުތަކުގެ ތެރެއަށް ވަދެގެން ނަމަވެސް ބެންކްތަކަށް ނުހައްގުން ފައިދާ ވާ ގޮތަށް އާއްމުންނަށް ލޯނު ދިނުން ހުއްޓުވަން ޖެހޭ ކަމަށް ވެސް ޑރ.ޝަމްހީދު ވިދާޅުވިއެވެ.