ކޮލޮމްބިއާގެ ކުރީގެ ރައީސް އަލްވާރޯ އުރީބޭ ގެ މައްޗަށް ރިޝްވަތުގެ ކުށް ސާބިތު ވެއްޖެ

ކޮލޮމްބިއާގެ ކުރީގެ ރައީސް އަލްވާރޯ އުރީބޭ ހެކިންނަށް ނުފޫޒު ފޯރުވުމާއި ރިޝްވަތު ދިނުމުގެ މައްސަލައެއްގައި ކުށްވެރި ވެއްޖެ އެވެ.

މިއީ އެ ޤައުމުގެ ތާރީޚު ގައި ކުރީގެ ރައީސަކު ޝަރީޢަތެއް ގައި ކުށްވެރިވި ފުރަތަމަ ފަހަރެވެ.

ހޯމަ ދުވަހު ފަނޑިޔާރު ނިންމެވީ، 73 އަހަރުގެ އުރީބޭ، ވަކީލަކާ ގުޅިގެން ޖަލުގައި ތިބި ކުރީގެ ޕެރަމިލިޓަރީ ގްރޫޕްތަކުގެ ތިން މެންބަރަކަށް ނުފޫޒު ފޯރުވައި، އެމީހުން ވައަތު ފިޔައިގެ ސެނެޓަރު އިވާން ސެޕޭޑާ އާ ދެކޮޅަށް ދީފައިވާ ހެކިބަސް ބަދަލު ކުރުމަށް މަސައްކަތް ކޮށްފައިވާ ކަން ސާބިތު ކުރުމަށް އެކަށީގެންވާ ހެކި ހުރިކަމަށެވެ. 1990 ގެ އަހަރުތަކުގައި އުރީބޭ ގެ ޕެރަމިލިޓަރީ ގްރޫޕަކާ ސެނެޓަރު ސެޕޭޑާ އާ ހުރި ގުޅުންތަކެއްގެ ތުހުމަތުތަކާ ބެހޭ ތަޙުޤީޤެއް ވަނީ ހިންގާފައެވެ.

މި މައްސަލަ ފެށުނީ 2012 ގައި އުރީބޭ ސެޕޭޑާގެ މައްޗަށް ސުޕްރީމް ކޯޓުގައި އަބުރު ގެއްލުވާލުމުގެ ދަޢުވާއެއް އުފުލުމުންނެވެ. ނަމަވެސް، އެއާ ޚިލާފަށް، މައްސަލަ މުޅިން ބަދަލުވެ، ސެޕޭޑާގެ މައްޗަށް އުފުލާފައިވާ ދަޢުވާތައް މަތީ ކޯޓުން ބާޠިލުކޮށް، 2018 ގައި އުރީބޭ ގެ މައްޗަށް ތަޙުޤީޤު ފެށިއެވެ.

ކޯޓުން މައްސަލަ ސާބިތު ވި ކަމަށް ނިންމުމާއެކު އުރީބޭ 12 އަހަރުގެ މުއްދަތަކަށް ޖަލަށް ލެވިދާނެއެވެ. ނަމަވެސް ޙުކުމް އިއްވާނީ ހުކުރު ދުވަހު ވަކި އަޑުއެހުމެއްގައެވެ. އޭނާ މި ހުކުމް އިސްތިއުނާފު ކުރާނެ ކަމަށް ބެލެވެއެވެ.

އުރީބޭގެ މައްޗަށް ޖަލު ހުކުމެއް ކުރި ނަމަވެސް އޭނާގެ އުމުރަށް ބަލާއިރު ޖަލުގައި ހުންނަވަން ނުޖެހޭނެ ކަމަށް ވެއެވެ. އޭގެ ބަދަލުގައި ކޮލަމްބިއާގެ ގާނޫނު އޮންނަ ގޮތުން އޭނާގެ ހުކުމް ގޭ ބަންދަށް ބަދަލު ކުރާނެ އެވެ.

އުރީބޭ އަށް ފާޑުކިޔާ ފަރާތްތަކުން މި ހުކުމް ފާހަގަކުރަނީ، ހަރުކަށި ވައަތު ފިޔައިގެ ޕެރަމިލިޓަރީ ގްރޫޕްތަކާ ގާތް ގުޅުން އޮތް ކަމަށް ތުހުމަތު ކުރެވިފައިވާ، ނަމަވެސް އެއްވެސް ކުށެއް ސާބިތުވެފައިނުވާ މީހެއްގެ މައްޗަށް އައި ޙައްޤު ހުކުމެއްގެ ގޮތުގައެވެ.

73 އަހަރުގެ ކުރީގެ ވެރިޔާ އާއި އޭނާ އަށް ތާއީދުކުރާ ފަރާތްތަކުން ބުނަނީ މި މުޅި މައްސަލަ އަކީ އަނިޔާވެރިކަމެއް ކަމަށާއި އޭނާ މައުސޫމު ކަމަށެވެ.

އުރީބޭ އާއި އޭނާގެ ވަކީލަކު މި އަޑުއެހުމުގައި ބައިވެރިވީ ވީޑިއޯ ލިންކް މެދުވެރިކޮށެވެ.

އުރީބޭ ގެ ޝަރީޢަތާ ގުޅިގެން އެމެރިކާގެ ސްޓޭޓް ސެކްރެޓަރީ މާކޯ ރޫބިއޯ ވަނީ ފާޑު ވިދާޅުވެފައެވެ. 2002 އިން 2010 އަށް އުރީބޭ ރައީސްކަން ކުރެއްވި ދެ ދައުރުގައި އޭނާ އެމެރިކާ އާ ދެމެދު ވަރަށް ގާތް ގުޅުމެއް އޮތެވެ.