ތައިލެންޑުގެ ވެރިރަށް ބެންކޮކުގައި ހިނގި ހަމަލާއެއްގައި 5 މީހުން މަރުވެ، އިތުރު މީހަކު ޒަޚަމް ވެއްޖެ ކަމަށް އެ ގައުމުގެ ފުލުހުން ބުނެފިއެވެ.

މި ހަމަލާ ހިނގާފައިވަނީ ހޯމަ ދުވަހު މެންދުރު ބެންކޮކުގެ އުތުރުގައި އޮންނަ ސަރަހައްދެއްގެ އޯރ ޓޯރ ކޯރ މާރުކޭޓުގައި ކަމަށް ރޯޔަލް ތައި ޕޮލިސް އިން ބުނެފައިވެއެވެ.

މަރުވި 5 މީހުންނަކީވެސް އެ މާރުކޭޓުގެ ސެކިއުރިޓީ ގާޑުން ކަމަށާއި، ހަމަލާ ދިން މީހާ އަމިއްލަ އަށް ހަމަލާދީ މަރުވެފައިވާ ކަމަށް ފުލުހުން ބުނެފައިވެއެވެ.

"ފުލުހުން މިހާރު ދަނީ މި ހަމަލާގެ ސަބަބު ބަލަމުންނެވެ. މިހާތަނަށް މިއީ ގިނަ ބަޔަކަށް އަމާޒުކޮށްގެން ދިން ހަމަލާއެއް ކަމަށް ބެލެވެއެވެ،" ސަރަހައްދުގެ ޑެޕިއުޓީ ޕޮލިސް ޗީފް އޭއެފްޕީ ނިއުސް އޭޖެންސީ އަށް ބުނެފައިވެއެވެ.

ފުލުހުން މިހާރު ދަނީ ހަމަލާ ދިން މީހާ ކާކުކަން ދެނެގަތުމަށް މަސައްކަތްކުރަމުންނެވެ. އަދި މިހާރު ތައިލެންޑާއި ކެމްބޯޑިއާގެ ބޯޑަރުގައި ހިނގަމުންދާ ހަމަނުޖެހުމާ މި ހަމަލާއާ ގުޅުމެއް އޮތްތޯވެސް ބަލަމުންދާ ކަމަށް ފުލުހުން ބުނެފައިވެއެވެ.

ދެކުނު އޭޝިއާގެ ގިނަ ޤައުމުތަކާ އަޅާބަލާއިރު ތައިލެންޑުގައި ހަތިޔާރު ބޭނުން ކޮށްގެން ހިންގާ އަނިޔާވެރި އަމަލުތައް ވަރަށް އާންމުކޮށް ފެނެއެވެ.

2020 ވަނަ އަހަރު ޖޫނިއަރ އާމީ އޮފިސަރަކު އުތުރު-އިރުމަތީގައި އޮންނަ ނަކޮން ރަޗަސީމާ ސިޓީގައި ހިންގި ހަމަލާއެއްގައި 29 މީހުން މަރުވެ، 58 މީހުން ޒަޚަމްވިއެވެ.