އިސްރާއީލުގެ ވައިގެ ހަމަލާތަކާއި ބަޑިޖެހުމުގެ ސަބަބުން މަދުވެގެން 25 މީހުން ޣައްޒާ ގައި ޝަހީދު ވެއްޖެ
އިސްރާއީލުގެ ވައިގެ ހަމަލާތަކާއި ބަޑިޖެހުމުގެ ސަބަބުން ޣައްޒާގައި 25 މީހުން ޝަހީދުވެފައިވާ އިރު، އެންމެ ގިނަ މީހުން މަރުވެފައިވަނީ ޒިކިމް ކްރޮސިންގ ކައިރީގައި އެހީގެ ޓްރަކުތަކަށް އިންތިޒާރު ކުރަމުންދަނިކޮށެވެ. އަނެއްކޮޅުން ހަމާސް އާއި އިސްރާއީލާ ދެމެދު ހިނގަމުންދާ ހަނގުރާމަ އަށް ނިމުމެއް އަތުވެދާނެ ކަމުގެ އުއްމީދުވެސް ވަނީ ފަނޑުވެފައެވެ.
އޮކްޓޯބަރު 11، 2023 ގައި ޣައްޒާ ސިޓީ އަށް އިސްރާއީލުން ބޮން އަޅާ ބޮޑެތި ގެއްލުންތަކެއް ދީފައި
ހުކުރު ދުވަހުގެ ރޭ އިސްރާއީލުގެ ވައިގެ ހަމަލާތަކާއި ބަޑިޖެހުމުގެ ސަބަބުން ޣައްޒާ ގައި މަދުވެގެން 25 މީހުން ޝަހީދު ވެއްޖެ ކަމަށް ސިއްޙީ އިދާރާތަކާއި އެމްބިއުލަންސް ޚިދުމަތުން ހޮނިހިރު ދުވަހު ބުނެފިއެވެ.
އިސްރާއީލުގެ ހަމަލާތަކަށް އެއްވެސް ހުއްޓުމެއް އައިސްފައި ނުވާ އިރު، މިއީ ހަނގުރާމަ ހުއްޓާލުމުގެ މަޝްވަރާތައް ހުއްޓިފައިވާ ކަމަށް ބެލެވޭ އަދި ޣައްޒާގެ ފަލަސްޠީނު ރައްޔިތުން ހައިހޫނުކަމާ ކުރިމަތިލަމުންދާ ދަނޑިވަޅެއް ކަން ފާހަގަ ކުރެވެއެވެ.
ގިނަ މީހުން މަރުވެފައިވަނީ އިސްރާއީލާ ޣައްޒާ އާ ދެމެދު އޮންނަ ޒިކިމް ކްރޮސިންގ ކައިރީގައި އެހީގެ ޓްރަކުތަކަށް އިންތިޒާރު ކުރަމުންދަނިކޮށް ބަޑިޖެހުމުގެ ސަބަބުންކަމަށް މަރުވެފައިވާ މީހުންގެ ހަށިގަނޑުތައް ގެންދެވުނު ޝިފާ ހޮސްޕިޓަލުގެ މުވައްޒަފުން ބުނެފައިވެއެވެ.
ވައިގެ ހަމަލާތަކުގައި މަރުވި މީހުންގެ ތެރޭގައި ޣައްޒާ ސިޓީގެ އެޕާޓްމަންޓް އިމާރާތެއްގައި ތިބި 4 މީހުންނާއި އެހެނިހެން އާންމު މީހުން ހިމެނޭ ކަމަށް ހޮސްޕިޓަލުގެ މުވައްޒަފުންނާއި އެމްބިއުލަންސް ޚިދުމަތުން އެސޯސިއޭޓެޑް ޕްރެސް އަށް ބުނެފައިވެއެވެ.
އިސްރާއީލާއި ހަމާސްއާ ދެމެދު ކުރެވެމުން ދިޔަ ހަނގުރާމަ ހުއްޓާލުމުގެ މަޝްވަރާތައް ހުއްޓުމަކަށް އައިސްފައި ވާއިރު އެމެރިކާ އާއި އިސްރާއީލުން ބުރާސްފަތި ދުވަހު އެ ޤައުމުތަކުގެ މަޝްވަރާކުރާ ޓީމުތައް އަނބުރާ ގެންގޮސްފައި ވުމާއެކު، މަޝްވަރާތަކުގެ މުސްތަޤުބަލާ މެދު އިތުރު ޔަޤީން ކަމެއް ނެތް ހާލަތަކަށް ވަނީ ގޮސްފައެވެ.
