މެލޭޝިޔާގެ ވެރިރަށުގެ މަގުތަކަށް ސަރުކާރާ ދެކޮޅަށް އެތައް ހާސް ރައްޔިތުން ނުކުމެއްޖެ

ދިރިއުޅުމުގެ އަގުތައް މައްޗަށް ދާތީ އެތައް ހާސް މެލޭޝިއާގެ ރައްޔިތުން ހޮނިހިރު ދުވަހު ވެރިރަށުގެ މަގުތަކަށް ނުކުމެ ބޮޑު ވަޒީރުގެ އިސްތިއުފާ އަށް ގޮވައިފިއެވެ.

ޚަރަދު ބޮޑުވަމުން ދިއުމުގެ އިތުރުން ބޮޑު ވަޒީރު އަންވަރު އިބްރާހީމްގެ ކޯލިޝަން ސަރުކާރުން އިޞްލާޙުތައް ގެނައުމުގައި ފަސްޖެހިފައިވާ ކަމަށް މުޒާހަރާ ކުރާ މީހުން ބުނެފައިވެއެވެ.

އިދިކޮޅު ޕާޓީތަކުން އިންތިޒާމު ކުރި މި މުޒާހަރާ އަކީ 2022 ވަނަ އަހަރުގެ އާންމު އިންތިޚާބަށް ފަހު، އަންވަރު ވެރިކަމަށް ވަޑައިގަތުމަށް ފަހު، ދެކުނު އޭޝިއާގެ ހަވަނަ އަށް އެންމެ ބޮޑު އިޤްތިޞާދު އޮތް މެލޭޝިޔާ ގައި ބޭއްވުނު ފުރަތަމަ ބޮޑު މުޒާހަރާ އެވެ.

އިހުތިޖާޖު ކުރާ ފަރާތްތައް ވެރިރަށުގެ މެދުތެރޭގެ އެކި ހިސާބުތަކުގައި އެއްވެ، އެއަށް ފަހު ވެރިރަށުގެ މެދުތެރޭގައިވާ މިނިވަންކަމުގެ މައިދާނަށް ވަނީ ޖަމާވެފައެވެ. އެމީހުން ގެންގުޅުނު ބޯޑުތަކުގައި މެލޭ ބަހުން "އަންވަރު ވެރިކަމުން ފައިބާ" ލިޔެފައި ވެއެވެ.

މުޒާހަރާ އާ ގުޅިގެން ގިނަ އަދަދެއްގެ ފުލުހުން މަގުތަކުގައި ހަރަކާތްތެރި ވަމުން ދިޔައެވެ.

"އޭނާ (އަންވަރު) މިހާރު ވެސް ތިން އަހަރު ވަންދެން ޤައުމު ހިންގައިފި. އެކަމަކު އަދި ވެސް އޭނާ ވީ ވަޢުދުތައް ފުއްދާފަ އެއް ނެތް،" އުމުރުން 35 އަހަރުގެ އިހުތިޖާޖުގެ ބައިވެރިއެއް ކަމަށްވާ ފައުޒީ މަޙްމޫދު އޭއެފްޕީ އަށް ބުންޏެވެ.

އަންވަރު "ވަނީ އިންވެސްޓްމަންޓްތައް ގެނައުމަށް ގިނަ ޤައުމުތަކަށް ޒިޔާރަތް ކޮށްފައި، އެކަމަކު އަދި އަޅުގަނޑުމެންނަށް އެއްވެސް އެއްޗެއް ފެނިފައެއް ނެތް،" ފައުޒީ އިތުރަށް ބުންޏެވެ.

މެލޭޝިޔާގެ ބޮޑު ވަޒީރު ވަނީ ދާދި ފަހުން ރަޝިޔާ އާއި ޔޫރަޕަށް ދަތުރުފުޅު ކުރައްވާފައެވެ.

އަންވަރު ބޮޑު ވަޒީރު ކަމަށް ޢައްޔަން ކުރެވުނީ އިޞްލާޙީ ވަޢުދުތަކާ އެކުގައެވެ. އަދި ޤައުމުގެ ބައިބައިވެފައިވާ ސިޔާސީ ނިޒާމުގައި އޮތް ކޮރަޕްޝަނާއި، އާއިލީ ބާރުވެރިކަމާއި، ގާތް މީހުންނަށް ކަންކަން ފަހިވާ ގޮތައް ހިނގަމުންދާ ނޭދެވޭ ކަންކަން ނައްތާލުމަށް މަސައްކަތް ކުރައްވާނެ ކަމަށް ވަޢުދުވިއެވެ.

މުޒާހަރާ އަށް އިއުލާނު ކުރުމާއެކު މީގެ ދެ ތިން ދުވަސް ކުރިން، ބޮޑު ވަޒީރު ވަނީ މީހުން ރުހިދާނެ ކަމަށް ބެލޭ ބައެއް ފިޔަވަޅުތައް އިޢުލާން ކުރައްވާފައެވެ. އޭގެ ތެރޭގައި ރައްޔިތުންނަށް ފައިސާގެ އެހީ ދިނުމާއި ތެލުގެ އަގު ކުޑަކުރުމަށް ވަޢުދުވުން ހިމެނެއެވެ.

ބުދަ ދުވަހު އަންވަރު އިޢުލާނު ކުރެއްވި ގޮތުގައި 18 އަހަރުން މަތީގެ މެލޭޝިއާގެ ކޮންމެ ރައްޔިތަކަށް 100 މެލޭޝިއާ ރިންގިޓް (23.71 އެމެރިކާ ޑޮލަރު) ގެ އެއް ފަހަރު ދޭ ފައިސާގެ އެހީ އެއް އޯގަސްޓް 31 އިން ފެށިގެން ދޭން ފަށާނެއެވެ.

އޭނާ އިތުރަށް ވިދާޅުވީ ވެހިކަލް ދުއްވާ 18 މިިލިއަން މީހުންނަށް ތެޔޮ ލީޓަރެއް 1.99 ރިންގިޓަށް ގަތުމުގެ ފުރުޞަތު ލިބޭނެ ކަމަށެވެ. މިހާރު ލީޓަރެއް ވިއްކަނީ 2.05 ރިންގިޓް އެވެ.

ސިޔާސީ ދިރާސާވެރިން މި ކަންކަން ދެކެނީ އިތުރު ވަމުންދާ ރައްޔިތުންގެ ނުތަނަވަސް ކަން ކުޑަކުރުމަށާއި ހޮނިހިރު ދުވަހުގެ އިހުތިޖާޖުގައި ބައިވެރިވާ މީހުންގެ އަދަދު މަދުކުރުމަށް އަންވަރު އެޅުއްވި ފިޔަވަޅެއްގެ ގޮތުގައެވެ.