ދެކުނު ކޮރެއާގެ ރައީސް ޔޫން ސުކް-ޔިއޯލް ގެ މައްޗަށް ކުރެވިފައިވާ ތުހުމަތު ތަކަށް ޕްރޮސެކިއުޓަރުން ތަޙުޤީޤު ފުޅާކުރަމުން ދާއިރު، މިދިޔަ އަހަރު އޭނާ މާޝަލް ލޯ އިއުލާނު ކުރެއްވި މައްސަލައިގައި ދައުވާ އުފުލައިފިއެވެ.

ޕްރޮސެކިއުޓަރ ހޮނިހިރު ދުވަހު ނޫސްވެރިންނަށް މަޢުލޫމާތު ދެމުން ބުނެފައި ވަނީ، ބާރުގެ ނަހަމަ ބޭނުން ކުރުމާއި ޚާއްޞަ ރަސްމީ ވާޖިބުތަކަށް ހުރަސް އެޅުން ފަދަ ތުހުމަތު ތަކަށް ޔޫން ގެ މައްޗަށް ދައުވާ އުފުލާފައިވާ ކަމަށެވެ.

ޕްރޮސެކިއުޓަރުން ބުނެފައި ވަނީ، ޔޫން މާޝަލް ލޯ އިޢުލާން ކުރެއްވީ އެކަން ކުރުމަށް ބޭނުންވާ އިޖުރާއަތުތައް ފުރިހަމަ ނުކޮށް ކަމަށެވެ. މީގެ ތެރޭގައި ކެބިނެޓް މެންބަރުންނާ އެކު ބައްދަލުވުމެއް ބޭއްވުން ހިމެނެއެވެ.

އޭނާއާ ދެކޮޅަށް މިހާރު ވެސް ވަނީ "ދޮގު ލިޔުމެއް އުފައްދާ އެ ލިޔުން ނައްތާލުމުގެ" ކުށުގެ ދައުވާ އުފުލިފައެވެ. އެ ލިޔުމުގައި ބަޔާން ކޮށްފައި ވަނީ ބޮޑުވަޒީރާއި ދިފާޢީ ވަޒީރު މާޝަލް ލޯއަށް ތާއީދު ކުރާ ކަމަށެވެ.

ޔޫން ގެންދަވަނީ އެއްވެސް ކުށެއް ކޮށްފައި ނުވާނެ ކަމަށް ވިދާޅު ވަމުން ނެވެ.

އޭނާ ވަނީ ޑިސެމްބަރު މަހު މަދަނީ ވެރިކަން ނައްތާލަން މަސައްކަތް ކުރައްވާ، މާޝަލް ލޯ އިޢުލާން ކުރުމާ ދެކޮޅަށް ގާނޫނު ހަދާ މަޖިލީހުގައި ވޯޓުލުން ހުއްޓުވުމަށް ޕާލިމަންޓަށް ސިފައިން ފޮނުވައި، ދެކުނު ކޮރެއާ ސިޔާސީ ހަލަބޮލި ކަމުގެ ތެރެއަށް ވައްޓާލާފައެވެ.

ޔޫން އަކީ އެ ޤައުމުގައި މަޤާމުގައި ހުންނަވަނި ކޮށް ހައްޔަރު ކުރެވުނު ފުރަތަމަ ރައީސެވެ. އޭނާ ހައްޔަރު ކުރެވުނީ ޖެނުއަރީ މަހު، ހަފްތާތަކެއް ވަންދެން ހައްޔަރު ކުރުމަށް ދެކޮޅު ހައްދަވާ، އަދި ރައީސް ގެ ސެކިއުރިޓީ ބޭނުންކޮށްގެން ތަޙުޤީޤުކުރާ ފަރާތްތަކަށް ހުރަސް އަޅުއްވަމުން ގެންދަވަނި ކޮށްނެވެ.

ގާނޫނު އަސާސީގެ ބާރު ކަނޑުވާލުމުގެ ދަޢުވާތަކުގެ ޝަރީޢަތް ކުރިއަށް ދަނިކޮށް، އޭނާ ވަނީ މާރިޗު މަހު އިޖުރާއީ ސަބަބުތަކަށް ޓަކައި ދޫކޮށް ލެވިފައެވެ.

މިދިޔަ ހަފްތާގައި، އޭނާ އަނެއްކާ ވެސް ހައްޔަރު ކުރީ މައްސަލައިގެ ހެކި ނައްތާލުމުގެ ކަންބޮޑުވުން އޮތް ކަމަށް ބުނެ ނެރުނު ވޮރަންޓެއްގެ ދަށުންނެވެ.

ޔޫން ވަނީ ހުކުރު ދުވަހު ކޯޓަށް ހާޒިރުވެ، އޭނާ ހައްޔަރު ކުރަން ނެރެފައިވާ އަމުރު ބާޠިލު ކުރުމަށް އެދި ވާހަކަ ދައްކާފައެވެ.

ކުރީގެ ރައީސްގެ ޤާނޫނީ ޓީމުން ނޫސްވެރިންނަށް ބުނި ގޮތުގައި ޔޫން ވަނީ 30 މިނެޓަށް ވުރެ ގިނަ ވަގުތު އޭނާގެ ދިފާޢުގައި ވާހަކަ ދައްކަވާފައި ކަމަށާއި، އޭނާގެ "ޖިސްމާނީ ޙަރަކާތްތެރިކަން ހަނިވެފައިވާ ކަމަށާއި އޭނާ ކުރިމަތިލާންޖެހިފައިވާ ގޮންޖެހުންތައް" ފާހަގަ ކުރައްވާފައި ކަމަށެވެ.

ކޯޓުން ވަނީ އެ އެދުން ބަލައިނުގަނެ ދޫކޮށްލާފައެވެ.

ދައުލަތުގެ ޕްރޮސެކިއުޓަރުން މިހާރު ވެސް ވަނީ ޔޫންގެ މައްޗަށް އެހެނިހެން ޖިނާއީ ދަޢުވާތައް ކޮށްފައެވެ. މީގެ ތެރޭގައި ބަޣާވާތް ކުރުމަށް ރޭވުން ހިމެނެއެވެ. މި ކުށުގެ އަދަބަކީ މަރުގެ އަދަބު ނުވަތަ އުމުރަށް ޖަލަށް ލުމެވެ.

އަނެއް ކޮޅުން، ދެކުނު ކޮރެއާގެ ވެރިރަށް ސޯލް އާއި އެ ޤައުމުގެ އެހެނިހެން ސަރަޙައްދުތަކުގައި ވަނީ މިހާރުގެ ރައީސް ލީ ޖޭ-މިޔުންގް ގެ ސިޔާސަތުތަކާ ދެކޮޅަށް އެތައް ހާސް މީހުން މުޒާހަރާ ކޮށްފައެވެ.

ލީ ވަނީ ޔޫން މަޤާމުން ވަކި ކުރުމަށް ފަހު ޖޫން މަހު ބޭއްވުނު ކުއްލި އިންތިޚާބުގައި ކާމިޔާބު ހޯއްދަވާފައެވެ.

ދެކުނު ކޮރެއާގެ ގިނަ ރައްޔިތުން ރުޅި އައިސްފައި ވަނީ އައު ސަރުކާރުގެ އިޞްލާޙީ ޕްލޭން ތަކުގައި އެމީހުންގެ ކަންބޮޑުވުން ތަކަށް އެކަށީގެންވާ ވަރަށް ސަމާލުކަން ދީފައިވާ ކަމަށް ޤަބޫލު ނުކުރެވޭތީ އެވެ.