މާލެސިޓީއަށް 52 މޭލަށް ވައިގަވެ، ގަސްތައް ވެއްޓި ބޮޑެތި ގެއްލުންތަކެއް ލިބިއްޖެ
މާލޭގެ ބައެއް ސަރަހައްދުތަކުގައި ގަސް ވެއްޓުމާއި، ފުރާޅު އެއްލާލުން ފަދަ ހާދިސާތައް ހިނގާފައިވޭ
ހުޅުމާލެ ފިތުރޯނު މަގުގައި ހުރި ބޮޑު ފިތުރޯނު ގަހެއް ވެއްޓިފައި
ރާއްޖެއަށް މިހާރު ކުރަމުންދާ ވިއްސާރައިގައި މާލެސިޓީއަށް ވަރަށް ބޮޑަށް ވައިގަދަވެ ގެއްލުން ލިބިއްޖެއެވެ.
މޫސުމާބެހޭ ގައުމީ އިދާރާއިން ބުނީ ހުކުރު ދުވަހުގެ ހެނދުނު އައި ކޮޅިގަނޑުގައި ހުޅުލެ-ހުޅުމާލެއަށް ވިލާގަނޑުގައި 52 މޭލު ބާރުމިނުގައި ވައި ޖެހުނު ކަމަށެވެ.
އެ ވަގުތު މާލޭގެ އިތުރުން ހުޅުމާލޭގެ އެކި ސަރަހައްދުތަކުގައި ވަނީ އެކި ހާދިސާތައް ހިނގާފައެވެ.
ފުލުހުން ބުނީ، ވައިގަދެވެ މާލޭގެ ބައެއް ސަރަހައްދުތަކުގައި ގަސް ވެއްޓުމާއި، ފުރާޅު އެއްލާލުން ފަދަ ހާދިސާތައް ހިނގާފައިވާތީ އެހީތެރިކަން ފޯރުކޮށްދީފައިވާ ކަމަށެވެ.
މީގެ އިތުރުން ހުޅުމާލެ ފިތުރޯނު މަގުގެ އޯޝަން ފްރޮންޓް ކުރިމަތީ ހުރި ބޮޑު ފިތުރޯނު ގަހެއް މަގުމައްޗަށް ވެއްޓި އެސަރަހައްދުގައި ޕާކުކޮށްފައި ހުރި ވެހިކަލްތަކަށް ވަނީ ގެއްލުން ލިބިފައެވެ. އަދި އެ މަގުގެ، އެކި ސަރަހައްދުތަކަށް ގަހުގެ ގޮފިތައް ވެއްޓިފައިވެއެވެ.
ހުޅުމާލެ-ފޭސް 2 ހުރި ބަސް ޓާމިނަލަށް ގެއްލުންވެފައިވާއިރު، އެސަރަހައްދުގައި ހުރި ގިނަ އަދަދެއްގެ ސައިކަލުތައް ވެއްޓި ގެއްލުން ވެފައިވެއެވެ. އަދި މަސައްކަތް ކުރަމުންދާ އިމާރާތްތަކުންނާއި، ބައެއް ގެތަކުގެ ބެލްކަނީގައި ބަހައްޓާފައިހުރި ބައެއް ސަމާނާއި، ގަސްމުށިގަނޑު މަގުމައްޗަށް ވެއްޓިފައިވެއެވެ.
ވައިގަދަވާ ވަގުތު ބޭރުގައި މަޑުނުކުރުމަށް ވެސް ކަމާބެހޭ އިދާރާތަކުން އިލްތިމާސްކޮށްފައިވެއެވެ.
ފުލުހުން ބުނީ، ހުރިހާ އެންމެންގެ ރައްކާތެރިކަމަށްޓަކައި، މޫސުން ގޯސްވެ، ވާރޭވެހޭ ވަގުތުތަކުގައި އެއްގަމު އުޅަނދު ދުއްވާއިރު، ކޮންޓްރޯލް ކުރެވޭ މިންގަނޑެއްގައި އުޅަނދު ދުވުމާއި، ވިއްސާރާގައި އުޅަނދު ދުއްވާއިރު، ހެޑްލައިޓް ދިއްލުމާއި، ވަޔާއެކު ހަލާކުނުވާނެ ފަދަ ވިއްސާރަ ކޯޓު ބޭނުންކުރަން ޖެހޭ ކަމަށެވެ.
މީގެ އިތުރުން އުޅަނދު ދުއްވާއިރު، ހިނގާ މީހުންނަށް ޚާއްސަ ސަމާލުކަމެއް ދިނުމާއި، ބުރުގާ އަޅާ ފަރާތްތަކުން ވަޔާއެކު ބުރުގާ މޫނު މައްޗަށް ނުދާނޭހެން ބެހެއްޓުން އަދި ސައިކަލު ދުއްވާއިރު ކުޑަ ބޭނުން ނުކުރުމަށް ވެސް ފުލުހުން އެދިފައިވެއެވެ.
މި މަހުގެ 20 އާ ހަމައަށް ރާއްޖެ ސަރަހައްދަށް ހުޅަނގު މޫސުމުގެ ބާރުގަދަވެ، ވަޔާއި ކަނޑު ގަދަވާނެ ކަމަށާއި، ބޮޑު ބަޔަކަށް ވިއްސާރަ ކުރާނެ ކަމަށް ލަފާކޮށްފާއިރު، ދަތުރަށް ފުރުމުގެ ކުރިން ސަމާލުވުމަށާއި، ވާރޭވެހި ފެންބޮޑުވެދާނެ ކަމަށް ބަލައި ގޯތި ގެދޮރާއި މުދާ ރައްކާތެރި ކުރުމަށް ދުރާލައި ފިޔަވަޅުތައް އެޅުމަށް ސަމާލުކަން ދިނުމަށް ވެސް ކަމާބެހޭ އިދާރާތަކުން އިލްތިމާސްކޮށްފައިވެއެވެ.
