ސިފައިންގެ ކުލަބުން ޤައުމީ ލީގު ވެސް ކާމިޔާބު ކޮށްފި

ޤައުމީ ވޮލީ ބޯޅަ ލީގުގެ ފަހު މެޗުގައި ކުލަބު އެޗްޑީސީ އަތުން ބަލިވި ނަމަވެސް، ދިވެހި ސިފައިންގެ ކުލަބަށް ލީގުގެ ޗެމްޕިއަންކަން ލިބިއްްޖެ އެވެ.

ޒުވާނުންގެ މަރުކަޒުގެ އެތެރޭ ކޯޓުގައި ބުދަ ދުވަހުގެ ރޭ ކުޅުނު މެޗު އެޗްޑީސީ އިން ކާމިޔާބު ކުރީ ސީދާ ތިން ސެޓުންނެވެ. މެޗުގެ ސެޓުތައް އެޗްޑީސީ އިން ކާމިޔާބު ކުރީ 25-22، 25-22 އަދި 26-25 އިންނެވެ.

ލީގުގެ ފަހު މެޗަށް ނިކުތްއިރު ވެސް ސިފައިންގެ ކުލަބަށް އޮތީ އެއް ވަނައިގައި ޗެމްޕިއަންކަން ކަށަވަރުވެފަ އެވެ. އެއީ ލީގުގައި ހުރާ ކޮމިއުނިޓީ ކުލަބުން، ދަޑިމަގު ސްޕޯޓްސް އެންޑް ރެކްރިއޭޝަނާ ދެކޮޅަށް ކުޅުނު މެޗުން ބަލިވުމުންނެވެ. އެ މެޗުގައި ދަޑިމަގުން ވަނީ ތިން ސެޓު އެއް ސެޓުން ހުރާގެ މައްޗަށް ކުރި ހޯދައިފަ އެވެ.

މިދިޔަ އަހަރުގެ ޤައުމީ ވޮލީ ބޯޅަ ލީގުގެ ޗެމްޕިއަންކަން ހޯދީ އެޗްޑީސީ އިންނެވެ. އެޗްޑީސީ އިން އެއް އަހަރުގެ ޤައުމީ ލީގު ކާމިޔާބު ކުރީ ފަހު މެޗުގައި ސިފައިންގެ ކުލަބުގެ މައްޗަށް ކުރި ހޯދައިގެންނެވެ.

އޭގެ ކުރިން 2023 ވަނަ އަހަރު ސިފައިންގެ ކުލަބުން ވަނީ ޤައުމީ ވޮލީ ބޯޅަ ލީގުގެ ޗެމްޕިއަންކަން ހޯދައިފަ އެވެ. މިއީ އެއް އަހަރު ދުވަހުގެ މެދު ކެނޑުމަކަށް ފަހު، ސިފައިންގެ ކުލަބުން ޤައުމީ ލީގު ކާމިޔާބު ކުރި ފަހަރެވެ.

ޤައުމީ ލީގުގެ އެއް ވަނަ ސިފައިންގެ ކުލަބުން ހޯދިއިރު، ދެ ވަނަ ދިޔައީ ދަޑިމަގު އެވެ. ތިން ވަނަ އަށް އެޗްޑީސީ ދިޔައިރު، ހަތަރު ވަނަ އަށް ދިޔައީ ހުރާ އެވެ. ލީގުގެ ގަދަ ހަތަރު ޓީމުގެ މެދުގައި ދެން އޮންނާނީ ޤައުމީ މުބާރާތެވެ. ޤައުމީ މުބާރާތުގެ އެންމެ ފަހުގެ ޗެމްޕިއަނުންނަކީ ވެސް ސިފައިންނެވެ.