ފުލުހުންތަކެއްގެ އެކައުންޓަށް ބޮޑެތި އަދަދުތަކުން ފައިސާ ޖަމާކުރި މައްސަލައެއް ބަލަނީ
ށ. މިލަންދޫ ޕޮލިސްގައި މަސައްކަތްކުރާ ފުލުހުންތަކެއްގެ އެކައުންޓަށް ގިނަ އަދަދެއްގެ ފައިސާ ޖަމާކުރި މައްސަލައެއް ވަނީ ތަހުގީގު ކުރަން ފަށާފައި
ފުލުހުންތަކެއްގެ އެކައުންޓަށް ފައިސާތަކެއް ޖަމާވި މައްސަލަ: ފުލުހުން މިހާރުދަނީ އެކަމުގައި ސާމިލް ވި ފަރާތްތައް މާލެ ގެނެސް މައްސަލަ ތަހުގީގު ކުރަމުން
ށ. މިލަންދޫ ޕޮލިސްގައި މަސައްކަތް ކުރާ ފުލުހުން ތަކެއްގެ އެކައުންޓަށް ގިނަ އަދަދެއްގެ ފައިސާ ޖަމާކުރި މައްސަލައެއް ތަހުގީގު ކުރަން ފަށައިފި އެވެ.
ފުލުހުން އަންގާރަ ދުވަހުގެ ރޭ މީޑިއާތަކާ ހިއްސާކުރި މެސެޖެއްގައި ބުނީ ގިނަ އަދަދެއްގެ ފައިސާ ޖަމާކުރީ ށ. މިލަންދޫ ޕޮލިސް ސްޓޭޝަންގައި މަސައްކަތްކުރާ ފުލުހުންގެ އެކައުންޓުތަކަކަށް ކަމަށެވެ.
އެގޮތުން އެ ފުލުހުންތައް މާލެ ގެނެސް މައްސަލަ ތަހުގީގު ކުރަމުންދާ ކަމަށް ފުލުހުން ވަނީ ބުނެފަ އެވެ.
ށ. މިލަންދޫގައި މަސައްކަތްކުރާ ފުލުހުންތަކެއްގެ އަމިއްލަ އެކައުންޓަށް ގިނަ އަދަދެއްގެ ފައިސާ ޖަމާކޮށްފައިވާ މައްސަލައެއް ފުލުހުންގެ ޕްރޮފެޝަނަލް ސްޓޭޑާޑްސް ކޮމާންޑް (ޕީއެސްޑީ) އިން އެ ފަރާތްތައް މާލެ ގެނެސް ދަނީ ތަހުގީގު ކުރަމުންޕޮލިސް މީޑިއާ
މިކަމާ ގުޅިގެން އިތުރު މައުލޫމާތެއް ފުލުހުން ހާމަކޮށްފައެއް ނުވެއެވެ. އެގޮތުން މި މައްސަލައިގައި ފުލުހުންގެ އެކައުންޓަށް ޖަމާކޮށްފައިވާ ފައިސާގެ އަދަދާއި މި މައްސަލައިގައި މާލެ ގެނައީ ކިތައް ފުލުހުންކަމެއް ވެސް ހާމަކޮށްފައެއް ނުވެއެވެ.
އެނގިފައިވާ ގޮތުގައި މި މީހުންގެ އެކައުންޓަށް ޖަމާކުރަމުން ދިޔައީ ފުލުހުންނަށް ކާން ދޭން ކޭޓަރިން ހިދުމަތްދޭ މީހުންނަށް ދޫކުރާ ފައިސާ އެވެ. މި ފައިސާ ފުލުހުންގެ އެކައުންޓުތަކަށް ޖަމާކުރަމުން ދިޔައީ ކޭޓަރިން ހިދުމަތްދޭ މީހުންނާ ހެދި ޑީލެއްގެ ދަށުންނެވެ.
މި ޑީލުގެ ދަށުން އެ މީހުން ކައިބޮއެ ހަދަމުން ދިޔައީ އަމިއްލައަށް ނަމަވެސް ކޭޓަރިން ހިދުމަތް ލިބޭ ކަމަށް ހަދައިގެން އެ ފައިސާ ބިލުކޮށް ނަގާފައި ވެ އެވެ. މިކަމެއް ހިނގަމުންދާތާ ގިނަ ދުވަސްތަކެއް ވެފައިވާ ކަމަށް ވެސް މައުލޫމާތު ލިބިފައިވެއެވެ.
ފުލުހުންނަށް ކޮއްތު ފައިސާ އަމިއް އަތަށް ދިނުމުގެ ބަދަލުގައި އާއްމުކޮށް އޮންނަނީ ކެއިންބުއިމުގެ ކަންކަން ބިޑް އުސޫލުން ހަވާލުކޮށްފަ އެވެ.
ސިފައިންނާއި ފުލުހުންގެ ކޮއްތަށް ދައުލަތުގެ މި އަހަރުގެ ބަޖެޓްގައި 445 މިލިއަން ރުފިޔާ ހިމަނާފައިވެ އެވެ.
އެގޮތުން ފުލުހުންގެ ކެއުމުގެ ހަރަދުގެ ގޮތުގައި ބަޖެޓުން 168 މިލިއަން ރުފިޔާ ހޭދަކުރަން ނިންމާފައި ވާއިރު ކޮއްތު އެލަވަންސްގެ ގޮތުގައި ވަކިވަކި މުވައްޒަފުންނަށް 87 މިލިއަން ރުފިޔާ ކަނޑައަޅާފައިވެ އެވެ.
އެއީ މަހެއްގެ މައްޗަށް ގާތްގަނޑަކަށް ހަތް މިލިއަން ރުފިޔާ އެވެ.
