ޣައްޒާ ހަނގުރާމަ މެދުކަނޑާލުމުގެ ވާހަކަތަކަށް އިސްރާއީލުން ގަތަރަށް ވަފުދެއް ފޮނުވަނީ

ޣައްޒާ ހަނގުރާމަ މެދުކަނޑާލުމުގެ މަޝްވަރާ ތަކަށް އިސްރާއީލުގެ ވަފުދެއް ގަތަރަށް ފޮނުވުމަށް ނިންމައިފި ކަމަށް މީޑިއާ ރިޕޯޓުތައް ބުނެފިއެވެ.

ޣައްޒާގައި ހިފަހައްޓާފައިވާ މީހުން ދޫކޮށްލުމާއި ހަނގުރާމަ ހުއްޓާލުމާ ބެހޭގޮތުން މަޝްވަރާ ކުރުމަށް ވަފުދެއް ފޮނުވާ ކަންހާމަކޮށްފައި ވަނީ އިސްރާއީލުގެ ޗެނަލް 12 އިން ނެވެ. އެމީޑިއާ އިން ބުނެފައި ވަނީ މިމަޢުލޫމާތު ދީފައި ވަނީ އިސްރާއީލުގެ އިސް އޮފިޝަލެއް ކަމަށެވެ.

މި ވަފުދު ޤަޠަރަށް ފުރާނީ ހޮނިހިރު ދުވަހުކަން ނުވަތަ އާދީއްތަ ދުވަހުކަން ސާފެއް ނުވެއެވެ.

އެމެރިކާ އިން ހުށަހަޅާފައިވާ ޣައްޒާގެ ހަނގުރާމަ ހުއްޓާލުމުގެ ހުށަހެޅުމާ ގުޅޭގޮތުން މަޝްވަރާ ކުރަން ތައްޔާރު ކަމަށް ހަމާސް އިން ބުނުމާ ގުޅިގެން، އިސްރާއީލުން އެކަމަށް ދޭނެ ޖަވާބަކާ މެދު ވިސްނަމުން ދާކަމަށް ހޮނިހިރު ދުވަހު ހާމަކޮށްފައިވެއެވެ.

މިކަމާ ބެހޭ ގޮތުން އިސްރާއީލުގެ ސަލާމަތީ ކެބިނެޓުން ބައްދަލުވުމެއް ބާއްވައި، ދެން އަޅާނެ ފިޔަވަޅުތަކާ މެދު މަޝްވަރާކުރާނެ ކަމަށް ބެލެވެއެވެ. މި ބައްދަލުވުން ބާއްވަނީ ބޮޑުވަޒީރު ބެންޖަމިން ނަތަންޔާހޫ ހޯމަ ދުވަހު އެމެރިކާގެ ރައީސް ޑޮނަލްޑް ޓްރަމްޕް އާ ބައްދަލު ކުރެއްވުމަށް ވޮޝިންގްޓަނަށް ދަތުރުކުރުމުގެ ކުރިންނެވެ.

ގާތްގަނޑަކަށް 21 މަސްދުވަސް ވެފައިވާ ޣައްޒާގެ ހަނގުރާމަ ނިމުމަކަށް ގެނައުމަށް، އިސްރާއީލުގެ އެންމެ ގާތް އެކުވެރިޔާ އެމެރިކާގެ ރައީސް ޑޮނަލްޑް ޓްރަމްޕް އައު މަސައްކަތްތަކެއް ވަނީ ފައްޓަވާފައެވެ.

ޣައްޒާގެ ސިވިލް ޑިފެންސް އޭޖެންސީން ބުނެފައިވާ ގޮތުގައި ހޮނިހިރު ދުވަހު އިސްރާއީލުގެ ސިފައިންގެ ހަމަލާތަކުގައި 35 މީހުން ޣައްޒާ ގައި ޝަހީދު ވެފައި ވެއެވެ.

"އެ މައްސަލައާ ގުޅޭގޮތުން އަދި އެއްވެސް ނިންމުމެއް ނިންމާފަ އެއް ނުވޭ،" ހަނގުރާމަ ހުއްޓާލުމުގެ ހުށަހެޅުމަށް ހަމާސްއިން ދީފައިވާ އިޖާބީ ޖަވާބާ ގުޅޭ ގޮތުން ސުވާލު ކުރުމުން އިސްރާއީލުގެ ސަރުކާރުގެ އޮފިޝަލެއް އޭއެފްޕީ އަށް ބުނެފައިވެއެވެ.

ހަނގުރާމަ ހުއްޓާލުމުގެ މަޝްވަރާ ކުރަން ތައްޔާރަށް އޮތް ކަން ހުކުރު ދުވަހުގެ ރޭ ހަމާސް އިން އިޢުލާނުކުރީ، ފަލަސްޠީނުގެ އެހެން ޖަމާޢަތް ތަކާއެކު މަޝްވަރާ ކުރުމަށް ފަހުގައި ކަމަށް ރިޕޯޓުތައް ބުނެއެވެ.

މަޝްވަރާތަކާ ގާތުން ގުޅިފައިވާ ފަލަސްޠީނު ގެ ދެ މަޞްދަރެއް އޭއެފްޕީ އަށް ބުނެފައިވާ ގޮތުގައި، މި ހުށަހެޅުމުގައި ހިމެނެނީ 60 ދުވަހުގެ މުއްދަތައް ހަނގުރާމަ ހުއްޓާލުމެވެ. މި މުއްދަތުގައި ހަމާސް އިން ދިހަ ދިރި ތިބި ރަހީނުންނާއި އަދި މަރުވެފައިވާ ބައެއް މީހުންގެ ހަށިގަނޑުތައް ދޫކޮށްލާނެއެވެ. މީގެ ބަދަލުގައި އިސްރާއީލުން ހައްޔަރު ކޮށްފައި ތިބި ފަލަސްތީން ބައެއް މީހުން ދޫކޮށްލާނެއެވެ.

ނަމަވެސް، އެ މަޞްދަރު ތަކުން ބުނެފައިވާ ގޮތުގައި، ހަމާސް އިން އިތުރު ޝަރުޠު ތަކެއް ވެސް ހުށަހަޅާފައި ވެއެވެ. އޭގެ ތެރޭގައި އިސްރާއީލުގެ ސިފައިން ޣައްޒާ އިން ފޭބުމާއި، މަޝްވަރާތައް ކުރިއަށްދާ ވަގުތު ހަނގުރާމަ އަލުން ފެށުށުމާ ދެކޮޅަށް ގެރެންޓީތަކެއް ދިނުމާއި، އަދި އދ. އިން އިސްވެ ހިންގާ އެހީ ފޯރުކޮށްދިނުމުގެ ނިޒާމު އަނބުރާ ގެނައުން ހިމެނެއެވެ.

ހަމާސްގެ އެކުވެރި އިސްލާމިކް ޖިހާދުން ބުނެފައި ވަނީ އެ ޖަމާޢަތުން ވެސް ހަނގުރާމަ ހުއްޓާލުމުގެ މަޝްވަރާ ތަކަށް ތާއީދުކުރާ ކަމަށެވެ. ނަމަވެސް އެ ޖަމާޢަތުން ޝަރުޠު ކޮށްފައި ވަނީ ޣައްޒާގައި ހިފަހައްޓާފައިވާ ރަހީނުން ދޫކޮށްލުމަށް ފަހު "އިސްރާއީލުން އަނެއްކާ ވެސް އަނިޔާވެރި ޢަމަލުތައް ހިންގަން ނުފަށާނެ ކަމުގެ" ޔަޤީންކަން ދިނުމަށެވެ.