ހިތަދޫ ކޯޓުން ކުރި ހުކުމް ނޭނގޭ ކަމަށް ސިނާނުގެ ފަރާތުން ބުނާ ބުނުމަކީ ކަނޑައެޅިގެން ރޯ ބުހުތާނު ދޮގެއް
ހިތަދޫ ކޯޓުން މި މައްސަލައިގައި ސިނާނު ހިމެނޭ ގޮތަށް އިތުރު ދެމީހުންގެ މައްޗަށް ހުކުމް އިއްވިތާ 2 މަސް ފަހުން، 14 ޑިސެމްބަރު 2024 ގައި ބެންކުން ހިތަދޫ ކޯޓުގެ ހުކުމް ތަންފީޒުކޮށްދިނުމަށް އެދި ހުށަހަޅައިފައިވެއެވެ. ބެންކުން އެގޮތަށް ހުށަހެޅީ ހުކުމް ކުރިފަހުން އެއްވެސް ވަރަކަށް ސިނާނު ފައިސާ ދައްކައިފައި ނުވާތީއެވެ.
ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ ޕީއެންސީގެ މެންބަރު މުހައްމަދު ސިނާން
ހިތަދޫ ކޯޓުން 14 އޮކްޓޫބަރުގައި ކުރި ހުކުމް ނޭނގޭ ކަމަށް ސިނާނުގެ ފަރާތުން ބުނާ ބުނުމަކީ ކަނޑައެޅިގެން ރޯ ބުހުތާނު ދޮގެއްކަން ހާމަވެއްޖެއެވެ.
ރާއްޖެ އެމްވީ އަށް އެނގިފައިވާ ގޮތުގައި، އިސްލާމިކް ބެންކުން ތަންފީޒު މައްސަލަ ހުށަހަޅައި މައްސަލައިގެ ލިޔުންތައް ވެސް ސިނާނުއަށާއި މުހައްމަދު ވަހީދު އަދި މުހައްމަދު ސަލީމަށް ކޯޓުން ވަނީ ރައްދުކޮށްފައެވެ. އެހެންކަމުން، ހިތަދޫ ކޯޓުން 14 އޮކްޓޫބަރުގައި ކުރި ހުކުމް ނޭނގޭ ކަމަށް ސިނާނުގެ ފަރާތުން ބުނާ ބުނުމަކީ ކަނޑައެޅިގެން ދޮގެއްކަން އެނގެއެވެ.
ހިތަދޫ ކޯޓުން މި މައްސަލައިގައި ސިނާނު ހިމެނޭ ގޮތަށް އިތުރު ދެމީހުންގެ މައްޗަށް ހުކުމް އިއްވިތާ 2 މަސް ފަހުން، 14 ޑިސެމްބަރު 2024 ގައި ބެންކުން ހިތަދޫ ކޯޓުގެ ހުކުމް ތަންފީޒުކޮށްދިނުމަށް އެދި ހުށަހަޅައިފައިވެއެވެ. ބެންކުން އެގޮތަށް ހުށަހެޅީ ހުކުމް ކުރިފަހުން އެއްވެސް ވަރަކަށް ސިނާނު ފައިސާ ދައްކައިފައި ނުވާތީއެވެ.
މީގެ އިތުރުން ހުކުމަށް ފަހު ވެސް ތަންފީޒު މައްސަލަ ހުށަހެޅުމުގެ ކުރިން އިސްލާމިކް ބެންކުން ހުކުމްގެ ވާހަކަ އާއި ހުކުމް ހިމަނައިގެން ސިޓީ ވެސް ފޮނުވައިފައިވެއެވެ. އަދި ތަންފީޒު މައްސަލައެއް ކޯޓުގައި ރަޖިސްޓަރީކޮށްދިނުމަށް ފަހު ލިޔުންތައް ރައްދުކޮށް އަޑުއެހުމެއް ވެސް ހިތަދޫ ކޯޓުގައި ވަނީ ތާވަލް ކޮށްފައެވެ.
ހިތަދޫ މެޖިސްޓްރޭޓް ކޯޓުން ސިނާނުގެ މައްޗަށް ހުކުމްކުރީ، ޖުމްލަ 2،520،222.98 14 އޮކްޓޫބަރު 2024 އިން ފެށިގެން 06 (ހައެއް) މަސްދުވަހުގެ ތެރޭގައި ކޮންމެ މަހަކު ވެސް އެމަހަކަށްޖެހޭ އަދަދަށްވުރެ މަދުނޫން އަދަދެއް ބޭންކަށް ދައްކަމުން ގޮސް މިފައިސާ ދައްކައި ޚަލާސްކުރުމަށެވެ.
ސިނާނު ހުކުމާއި އެއްގޮތަށް ފައިސާ ދައްކާފައިނުވާ ކަން ހާމަވާ ފުރަތަމަ ގޮތަކީ، ސިނާނު ހުކުމާއި އެއްގޮތަށް އޮކްޓޫބަރު 14 އިން ނޮވެމްބަރު 14 އާއި ހަމައަށް އަދި ނޮވެމްބަރު 14 އިން ޑިސެމްބަރު 14 އާއި ހަމައަށް ފައިސާ ދެއްކި ނަމަ ބެންކުން ތަންފީޒު މައްސަލަ ހުށަހެޅުމުގެ ޟަރޫރަތެއް ނެތުމެވެ. އަދި ދެވަނަ ގޮތަކީ، ތަންފީޒު މައްސަލަ އަނބުރާ ގެންދަން އިސްލާމިކް ބެންކުން ހުށަހަޅައިފައިވާ މައްސަލަ އަނބުރާ ގެންދާ ފޯމުތަކުގައި ލިޔެފައިވާ ކަންކަމެވެ. އެގޮތުން އިސްލާމިކް ބެންކުން ތަންފީޒު މައްސަލަ ހުށަހެޅިތާ 2 މަސް ދުވަސް ފަހުން މައްސަލަ އަނބުރާ ގެންދިއުމަށް އެދި ހިތަދޫ ކޯޓަށް 13 ފެބްރުއަރީ 2025 ގައި ފޯމު ފޮނުވިއެވެ. ފުރަތަމަ ފޮނުވި ފޯމުގައި ސާފުކޮށް ސިނާނު ފައިސާ ދެއްކީ 13 ފެބްރުއަރީ 2025 ގައި ކަމަށް ލިޔެފައިވެއެވެ. އެހެން ނަމަވެސް އޭގެ ފަހުން ފޮނުވި ފޯމުގައި 13 ފެބްރުއަރީ އުނިކުރުމަށްފަހު ފައިސާ މިހާރު ދައްކައިފައިވާ ކަމަށް ލިޔެފައިވެއެވެ.
ފައިސާ ދައްކާފައިނުވާކަން ހާމަވާ ތިންވަނަ ގޮތަކީ، މި ފައިސާ ދައްކަން ރައީސް މުހައްމަދު މުއިއްޒުގެ ކްރިމިނިލް ޖަސްޓިސް އެޑްވައިޒަރު ކަން ކުރިން ކުރެއްވި އަދި ފޮރިން މިނިސްޓްރީގެ ސްޓޭޓް މިނިސްޓަރު މަގާމުގައި މިހާރު ހުރި މުހުތާޒު މުހުސިން ދިޔަ ދިއުމެވެ. 13 ފެބްރުއަރީ 2025 ގައި އެފައިސާ ދައްކަން އޭނާ ބެންކަށް ދިޔަކަން މުހުތާޒު ދޮގޮކޮށްފައި ނުވާއިރު ބުނެފައިވަނީ ސިނާނު އަކީ އޭނާގެ ކްލައެންޓެއް ކަމަށެވެ.
ފާއިތުވި ބުދަ ދުވަހު ސުޕްރީމް ކޯޓުގައި ކުރިއަށް ދިޔަ އަޑުއެހުމުގައި މިހުރިހާ ހަގީގަތެއް މިހެން ހުއްޓާ ސިނާނުގެ ފަރާތުން ދެއްކީ އޭނާއަށް ހިތަދޫ މެޖިސްޓްރޭޓް ކޯޓުގެ ހުކުމް އޮތްކަން ނޭނގޭ ވާހަކައެވެ. ރައީސުލްޖުމްހޫރިއްޔާގެ މުށުތެރެއަށް ލައިފައި އޮތް ސުޕްރީމް ކޯޓުން އެމަނިކުފާނުގެ ޕާޓީގެ މެންބަރެއްގެ ގޮނޑި ގެއްލޭ ގޮތަށް ހުކުމެއް ނުކުރާނެއެވެ. އެހެން ނަމަވެސް، ސާފުކޮށް އެނގެން އޮތްކަމަކީ، ޤާނޫނު އަސާސީގައި ބަޔާންކުރާ މަޖިލިސް މެންބަރު ކަމުގެ ޝަރުތު ސިނާނުގެ ކިބައިން ގެއްލިފައިވާ ކަމެވެ.
ހިތަދޫ ކޯޓުން 14 އޮކްޓޫބަރުގައި ކުރި ހުކުމުގައި ބުނީ ކޮންމެ މަހަކު އެމަހަކަށް ޖެހޭ މިންވަރު ދައްކަމުން ގެންދިއުން ކަމަށްވާއިރު، 14 އޮކްޓޫބަރުގެ ފަހުން 1 މަސް ދުވަހުގެ މުއްދަތު ހިނގިއިރު ސިނާނު ލާރި ނުދެއްކި ހިސާބުން ހުކުމާއި އެއްގޮތަށް އޭނާ ލާރި ނުދައްކާކަން ވަނީ ސާބިތުވެފައެވެ. އަދި އެކަން އޭނާގެ ފަރާތުން ސުޕްރީމް ކޯޓުގައި ދޮގުކޮށްފައެއް ނުވެއެވެ.
