ހޮނިހިރު ދުވަހުގެ ރޭ އެމެރިކާ އިން އެންމެ ބޮޑަށް ބޮން އެޅި އަދި އީރާނުގެ އެންމެ މުހިންމު ނިއުކްލިއަރ ފެސިލިޓީ ކަމުގައި ވާ ފަރްދޫ ނިއުކްލިއަރ ސައިޓަށް "އެހާ ބޮޑު ގެއްލުމެއް ނުވާ" ކަމަށް އިރާނުގެ މަޖިލިސް މެންބަރަކު ވިދާޅުވެއްޖެ އެވެ.

މި ސައިޓް ހުންނަ ޤޮމް ސަރަޙައްދު ތަމްސީލު ކުރައްވާ މަނާން ރައީސީ ވިދާޅުވެފައި ވަނީ، ބިމުގެ އަޑީގައި ހުންނަ ނިއުކްލިއަރ މަރުކަޒަށް ދީފައިވާ ހަމަލާ އަކީ "ބޭރު ފުށުން" ދިން ހަމަލާއެއް ކަމަށެވެ.

"ސައްޙަ މަޢުލޫމާތުގެ މައްޗަށް ބިނާކޮށް، އަޅުގަނޑު ދަންނަވަން، ދޮގުވެރި އެމެރިކާގެ ރައީސް ދައްކާ ވާހަކަތަކާ ޚިލާފަށް، ފަރްދޫ ނިއުކްލިއަރ މަރުކަޒަށް އެހާ ބޮޑު ގެއްލުމެއް ވެފައެއް ނުވޭ. އަދި ގެއްލުން ވެފައިވާ ގިނަ ތަންތަނަކީ ހަމައެކަނި ބިމުގެ މަތީގައި ހުރި ތަންތަން، އެއީ އަލުން މަރާމާތުކުރެވިދާނެ ތަންތަން،" ރައީސީ ވިދާޅުވި ކަމަށް ތަސްނީމް ނިއުސް އޭޖެންސީން ރިޕޯޓުކޮށްފައިވެއެވެ.

އެމެރިކާގެ ހަމަލާތަކަށްފަހު ރޭޑިއޯއެކްޓިވް މާއްދާ ލީކުވެފައިވާކަން ފާހަގަ ކުރެވިފައި ނުވާ ކަމަށް ކުރިން ދީފައިވާ އެސެސްމަންޓްތަކާ އެއްގޮތަށް އޭނާ ވެސް އެވާހަކަ ވިދާޅުވިއެވެ.