އެމެރިކާގެ ތިންވަނަ އެއަރކްރާފްޓް ކެރިއަރ މެދުއިރުމައްޗާ ގާތައް!
ޕެންޓަގަންގެ އިސްވެރިޔާ ޕީޓް ހެގްސެތް، ނިމިޓްޒް ކެރިއަރ ސްޓްރައިކް ގްރޫޕް މެދުއިރުމައްޗަށް ފޮނުވުމަށް އަމުރުކުރެއްވި ކަމަށް ވަނީ ކަށަވަރުކޮށް ދީފައި ކަމަށް އޭއެފްޕީ އިން ބުނޭ
ދުނިޔޭގެ އެންމެ ބޮޑު އެއާކްރާފްޓް ކެރިއާ ޔޫއެސްއެސް ޖެރާލްޑް އާރް ފޯޑް ސްޓީމްސް އާއި އެކު ޔޫއެސްއެންއެސް ލެރަމީ (T-AO-203) މެޑިޓެރޭނިއަން ކަނޑުގައި ދަތުރު ކުރަނީ (ފައިލް)
ޔޫއެސްއެސް ޖެރަލްޑް އާރް. ފޯޑް ކުރި އަށް އޮތް ހަފްތާގައި ޔޫރަޕަށް ފުރާނެ ކަމަށް ނޭވީގެ އިސް އޮފިޝަލެއް ހުކުރު ދުވަހު ވިދާޅުވެއްޖެ ކަމަށް އޭއެފްޕީ ނޫސް އޭޖެންސީ އިން ރިޕޯޓު ކޮށްފިއެވެ.
މިއީ އީރާނަށް ހަމަލާ ދިނުމުގައި އިސްރާއީލާ އެކު އެމެރިކާ ބައިވެރި ވެދާނެ ކަމަށް ބެލެވިފައި ވަނިކޮށް މެދުއިރުމައްޗާ ގާތައް ފޮނުވާ އެމެރިކާގެ ތިން ވަނަ ހަނގުރާމަތީ މަނަވަރެވެ.
އިސްރާއީލުން ވަނީ ފާއިތުވި ހަފްތާގައި އީރާނާ ދެކޮޅަށް މިހާތަނަށް ހިންގާފައި ނުވާފަދަ ނުރައްކާތެރި އަސްކަރީ ކެމްޕޭނެއް ފަށާފައެވެ. އަދި އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެފައި ވަނީ އިސްރާއީލާއެކު މި ހަނގުރާމައިގައި ބައިވެރިވުމާމެދު ވިސްނަމުންދާ ކަމަށެވެ.
"ޖެރަލްޑް ފޯޑް ކެރިއަރ ސްޓްރައިކް ގްރޫޕް ޖޫން 24 ވަނަ ދުވަހުގެ ހެނދުނު ނޯފޯކް (ވަރޖީނިއާ) އިން ފުރާނީ ކުރިން ކަނޑައެޅިފައިވާ ގޮތައް ޔޫއެސް-ޔޫރަޕިއަން ކޮމާންޑްގެ ޒިންމާގެ ދަށުގައިވާ ސަރަޙައްދަށް ދިއުމަށް،" ނޭވީގެ އޮފިޝަލް ބުނެފައިވެއެވެ.
ޔޫއެސް ކާލް ވިންސަން ކެރިއަރ ސްޓްރައިކް ގްރޫޕް ގެންދަނީ މިއަހަރުގެ ކުރީކޮޅުން ފެށިގެން މެދުއިރުމަތީގައި ހަރަކާތްތެރިވަމުންނެވެ. އަދި މި ގްރޫޕުން ގެންދަނީ އީރާނުގެ ބާރު އޮންނަ ޔަމަނުގެ ހޫތީންނާ ދެކޮޅަށް ހިންގާ އެއަރ ކެމްޕޭނުގައި ބައިވެރި ވަމުންނެވެ.
އަދި އެމެރިކާގެ ދިފާއީ އޮފިޝަލެއް ވަނީ ޕެންޓަގަންގެ އިސްވެރިޔާ ޕީޓް ހެގްސެތް، ނިމިޓްޒް ކެރިއަރ ސްޓްރައިކް ގްރޫޕް މެދުއިރުމައްޗަށް ފޮނުވުމަށް އަމުރުކުރެއްވި ކަމަށް ކަށަވަރުކޮށް ދީފައެވެ. އެއީ "އެމެރިކާގެ ދިފާއީ ޤާބިލުކަން ދެމެހެއްޓުމަށާއި އެމެރިކާގެ މީހުން ރައްކާތެރިކުރުމަށް" ކަމަށް އެ އޮފިޝަލް ބުނެފައިވެއެވެ.
ބުރާސްފަތި ދުވި ދުވަހު ޓްރަމްޕް ވިދާޅުވީ އިސްރާއީލުން އީރާނަށް ދޭ ހަމަލާތަކުގައި ބައިވެރިވާނެތޯ ކުރިއަށް އޮތް ދެ ހަފްތާގެ ތެރޭގައި ގޮތެއް ނިންމަވާނެ ކަމަށެވެ.
އެމެރިކާ އިން މި ހަނގުރާމައިގައި ބައިވެރިވުމުގެ ސަބަބެއްގެ ގޮތުގައި ދައްކާ އެންމެ މުހިންމު ކަމަކީ އީރާނުގެ މުހިންމު ފަރްދޫ ނިއުކްލިއަރ އެންރިޗްމަންޓް ޕްލާންޓް ހަލާކުކުރެވޭނެ ބޮޑެތި "ބަންކަރ ބަސްޓަރ" ބޮންތައް ހުރި ހަމައެކަނި ޤައުމަކީ އެމެރިކާ ކަށް ވެފައި އެތަނަށް ހަމަލާ ދިނުމަށް އެމެރިކާގެ އެހީ އިސްރާއީލަށް ބޭނުން ވާ ކަމަށް ބުނެއެވެ.
މިކަން މިހެން އޮތް ނަމަވެސް ޓްރަމްޕް ވެރިކަމަށް ގެނައުމުގައި އިސްކޮށް ހަރަކާތްތެރިވި އެތައް ފަރާތަކުން ވެސް ގެންދަނީ އެމެރިކާ އިން މި ހަނގުރާމައިގައި ބައިވެރިވުމާ ފާޅުގައި ދެކޮޅު ހަދަމުންނެވެ.
