ތެހެރާނުން އެންމެން ނުކުތުމަށް ޓްރަމްޕް އަންގަވައިފި

އީރާނުގެ ވެރިރަށް ތެހެރާނުން އެންމެން ނުކުތުމަށް އެމެރިކާގެ ރައީސް ޑޮނަލްޑް ޓްރަމްޕް އަންގަވައިފިއެވެ.

އެމެރިކާގެ ރައީސް ޑޮނަލްޑް ޓްރަމްޕް ވަނީ ހޯމަ ދުވަހުގެ ރޭ ތެހެރާނުގެ ރައްޔިތުންނަށް އެތަނުން ނުކުމެގެން ދިއުމަށް ގޮވާލައްވާފައެވެ.

"އެންމެން ވަގުތުން ތެހެރާނުން ނުކުމެގެން ދާންވީ!" ޓްރަމްޕް ކެނެޑާ ގައި ކުރިއަށް ދާ ޖީ7 ސަމިޓުގައި ހުންނަވައި އޭނާގެ ޓްރޫތް ސޯޝަލް އެކައުންޓުގައި ލިޔުއްވާފައެވެ.

ޓްރަމްޕް އިތުރު ތަފްސީލެއް ދެއްވާފައެއއް ނުވެއެވެ. އީރާނުގެ ވެރިރަށުގައި ގާތްގަނޑަކަށް 15 މިލިއަން މީހުން ދިރިއުޅެއެވެ.

މި އިންޒާރު އައިސްފައިވަނީ އިސްރާއީލުން އީރާނަށް ދޭ ހަމަލާތައް އިތުރުކުރަމުންދާ ދަނޑިވަޅެއްގައެވެ. އިސްރާއީލުން ބުނާ ގޮތުގައި މި ހަމަލާތަކުގެ މަޤްޞަދަކީ އެ ޤައުމުގެ ވާދަވެރި ނިއުކްލިއަރ މަސައްކަތްތައް ނައްތާލުމެވެ.

ޓްރަމްޕް މި އިންޒާރު ދެއްވި އިރު، އިސްރާއީލުގެ ސިފައިން އޭގެ ކުރިން ވަނީ ތެހެރާނުގެ އެއް ސަރަޙައްދަކުން އެތަނުން ނުކުމެގެން ދިއުމަށް ގޮވާލާ އިޢުލާނެއް ނެރެފައެވެ. މިއީ 2023 ވަނަ އަހަރުގެ އޮކްޓޯބަރު 7 ގައި އިސްރާއީލުން ޣައްޒާ ގައި ފެށި އަނިޔާވެރި ހަނގުރާމައިގައި ޣައްޒާގައި ގިނަ ފަލަސްޠީނު ރައްޔިތުން އެމީހުންގެ ގޯތި ގެދޮރުން ނުކުމެގެން ދިއުމަށް މަޖުބޫރުކުރުވުމަށް އެމީހުން ގެންގުޅުނު ސިޔާސަތުގެ އަޑުގަދަ އެކޯއެކެވެ.

އިސްރާއީލުގެ ސިފައިންގެ ޢަމަލުތަކުގައި އެމެރިކާ ބައިވެރިވާނެތޯ ވިދާޅުވާން ޓްރަމްޕް ވަނީ ތަކުރާރުކޮށް އިންކާރު ކުރައްވާފައެވެ. ނަމަވެސް އޭނާ ވިދާޅުވެފައި ވަނީ ފުރަތަމަ ހަމަލާތަކުގައި އެމެރިކާ ބައިވެރިވެފައި ނުވާ ކަމަށެވެ.

އަންގާރަ ދުވަހު ނިމޭ ޖީ7 ސަމިޓުގައި އޭނާ ނޫސްވެރިންނަށް ކުރިން ވިދާޅުވެފައިވަނީ: "އަހަރެން މިތަނުން ފުރައިގެން ގޮސް، އަހަރެމެން ކޮންމެވެސް ކަމެއް ކުރާނަން. އެކަމަކު އަހަރެން މިތަނުން ފުރަން އެބަޖެހޭ."

އެމެރިކާގެ މީޑިއާތަކުން ރިޕޯޓުކުރާ ގޮތުގައި، އެމެރިކާގެ ރައީސް ޑޮނަލްޑް ޓްރަމްޕް ވަނީ ނެޝަނަލް ސެކިއުރިޓީ ކައުންސިލް ސިޗުއޭޝަން ރޫމް އަށް ހާޒިރުވުމަށް އަންގަވާފައެވެ.

ނެޝަނަލް ސެކިއުރިޓީ ކައުންސިލްގައި ހިމެނެނީ ސެކްރެޓަރީ އޮފް ސްޓޭޓް، ޑިފެންސް ސެކްރެޓަރީ އަދި ޑިރެކްޓަރ އޮފް ނެޝަނަލް އިންޓެލިޖެންސް ފަދަ ސަރުކާރުގެ އިސް މަޤާމުތަކުގައި ތިއްބަވާ ބޭފުޅުންނެވެ. މި ކައުންސިލުން ރައީސަށް ލަފާ އަރުވަނީ ޤައުމީ ސަލާމަތާއި ޚާރިޖީ ސިޔާސަތާ ގުޅޭ ކަންކަމުގައެވެ.