ޔަމަނުން ވެސް އިސްރާއީލަށް ހަމަލާ ދީފި

އާދިއްތަ ދުވަހުގެ ފަތިހު އީރާނުން އިސްރާއީލަށް ހަމަލާ ދިން ވަގުތު ޔަމަނުން ވެސް އިސްރާއީލަށް ހަމަލާ ދިން ކަމަށް އިސްރާއީލުގެ މީޑިއާ އިން ރިޕޯޓު ކޮށްފިއެވެ.

ހޮނިހިރު ދުވަހުގެ ރޭ ދެ ބުރަކަށް އީރާނުން ވަރުގަދަ މިސައިލް ހަމަލާތަކެއް އީރާނުން އިސްރާއީލަށް ވަނީ ދީފައެވެ. ފުރަތަމަ ބުރުގެ ހަމަލާތައް އީރާން ގަޑިން ރޭގަނޑު 11:45 ހާއިރު ފެށުމަށްފަހު، އިސްލާމިކް ރެވޮލިއުޝަން ގާޑްސް ކޯޕްސް (އައި.އާރް.ޖީ.ސީ) އިން "އޮޕަރޭޝަން ޓްރޫ ޕްރޮމިސް 3" ދެވަނަ ބުރަށް ފަށާފައިވަނީ އީރާން ގަޑިން މެންދަމު 3:34 ހާއިރުގައެވެ.

ދެ ގަޑިއިރަށް ވުރެ ގިނައިރު ދެމިގެންދިޔަ ސަތޭކަ އެތައް މިސައިލްތަކަކާއި ޑްރޯންތަކެއް ހިމެނޭ ފުރަތަމަ ބުރަށްފަހު ނެރުނު ބަޔާނެއްގައި،"އޮޕަރޭޝަން ޓްރޫ ޕްރޮމިސް 3" ގެ މި އައު ބުރުގެ މައިގަނޑު އަމާޒަކީ އިޒްރޭލުގެ ގިނަ މުހިންމު އަސްކަރީ އަދި ސިނާއީ މަރުކަޒުތަކެއް ހުރި، އޮކިިއުޕައިޑް ޕޯޓް ސިޓީ ހައިފާ ކަމުގައި ބަޔާންކޮށްފައިވެއެވެ.

ރިޕޯޓުތަކުގައިވާ ގޮތުން، ބިމު އަޑީގައި ހަދާފައިވާ ބަންކަރުތަކުގައި އެ ސަރަަހައްދުތަކުގެ ވަޒަންވެރިން ރައްކާތެރިކަން ހޯދަމުންދާ މަންޒަރު ފެނިފައިވާއިރު، ބޮޑު ވަޒީރު ބެންޖަމިން ނެތަންޔާހޫ ހިމެނޭ ގޮތަށް ސަރުކާރުގެ އިސްވެރިން ވެސް ބިމު އަޑީގައި ހަދާފައިވާ ސިއްރު ތަންތަނުގައި ފޮރުވިގެން ތިބި ކަމަށް ރިޕޯޓުތައް ބުނެއެވެ.

މިސައިލްތައް އެރުމާ ގުޅިގެން، އިމާރާތްތަކަށް ގެއްލުންންވެ އަދި އަލިފާން ރޯވުމުގެ ސަބަބުން "ގުޝް ދާން" އަދި އޮކިއުޕައިޑް އަލް-ޤުދުސްގައި އަލިފާން ނިއްވުމާއި ސަލާމަތްކުރުމުގެ ޓީމުތައް މަސައްކަތްކުރަމުން ގޮސްފައިވެއެވެ.

އެއް ރިޕޯޓެއްގައި ބުނެފައިވާ ގޮތުން، އީރާނުގެ މިސައިލެއް ވަނީ ގްރޭޓަރ ތެލް އަވީވް ސަރަޙައްދުގައި ހުރި އުސް އިމާރާތަކަށް އަމާޒުވެފައެވެ. މީގެ އިތުރުން، ތެލް އަވީވްގައި ހުރި އިތުރު 6 ތަނަކަށްވެސް ވަނީ އީރާނުގެ މިސައިލްތައް ސީދާ އަމާޒުވެފައެވެ.

އާދީއްތަ ދުވަހުގެ ފަތިހު ދިން ހަމަލާތައް ކުރިއަށް ދިޔައިރު ޔަމަނުގެ އަސްކަރިއްޔާ އިން ތެލް އަވީވްގެ ބެން ގޫރިއަން އެއަރޕޯޓަށް މިސައިލް ހަމަލާ އެއް ވަނީ ދީފައެވެ.

އިސްރާއީލުގެ ބްރޯޑްކާސްޓިންގ އޮތޯރިޓީ އާ ހަވާލާދީ މީޑިއާ ރިޕޯޓުތަކުގައި ވަނީ، ޒަޔަނިސްޓް ދައުލަތް ވަނީ އީރާނާއި ޔަމަނުން ދެމުންދާ މިސައިލްތަކާއި ޑްރޯންތަކުގެ ހަމަލާއަކަށް ހުށަހެޅިފައި ކަމަށެވެ.