އިންޑިޔާގެ އުތުރު-އިރުމަތީގެ މަނިޕޫރު ސްޓޭޓުގެ ބައެއް ސަރަހައްދުތަކުގައި އިންޓަނެޓް ކަނޑާލައި، ކާފިއު ހިންގައިފިއެވެ.

މި ފިޔަވަޅުތައް އެޅީ އެތަނުގެ ނަސްލީ ގްރޫޕެއްގެ ލީޑަރުން ހައްޔަރުކުރުމާ ގުޅިގެން ހިނގި މުޒާހަރާތަކާ ގުޅިގެން ކަމަށް ރިޕޯޓުތައް ބުނެއެވެ.

އާދީއްތަ ދުވަހު، ފުލުހުން ވަނީ އަރަމްބައި ޓެންގޯލް ނަމަކަށް ކިޔާ ހަތިޔާރު އެޅި ހަރުކަށި ފިކުރުގެ ގްރޫޕެއްގެ ފަސް ލީޑަރުން ހައްޔަރުކޮށްފައެވެ. މީގެ ތެރޭގައި އެ ގްރޫޕުގެ އިސްވެރިޔާ އާސެމް ކަނާން ސިންގް ވެސް ހިމެނެއެވެ.

އިންޑިޔާގެ އެންމެ މަތީ ތަހުގީގީ އިދާރާއިން ބުނެފައިވަނީ ސިންގް ހައްޔަރުކުރެވުނީ މަނިޕޫރުގެ އިމްފާލް އެއަރޕޯޓުގައި ކަމަށާއި، މިއީ 2023 ވަނަ އަހަރު އެ ސްޓޭޓުގައި ހިނގި ހަމަނުޖެހުންތަކާ ގުޅުންހުރި "އެކި ކުށްތަކުގައި" އޭނާ ބައިވެރިވެފައިވާތީ ކަމަށެވެ.

2023 ވަނަ އަހަރުން ފެށިގެން މަނިޕޫރު ގައި ވަނީ ހަމަނުޖެހުންތައް ހިނގަމުން ގޮސްފައެވެ. މިއީ އެތަނުގެ އެންމެ ބޮޑު ދެ ނަސްލީ ގްރޫޕު ކަމަށްވާ މެއިޓީ އާއި ކޫކީ އާ ދެމެދު އެއް ބަޔަކު އަނެއް ބަޔަކަށް ވުރެ ބޮޑަށް ބާރާއި ނުފޫޒު ހޯދުމަށް އުޅުމުގެ ތެރެއިން ހިނގި ހަމަނުޖެހުންތަކެކެވެ. މެއިޓީ އަކީ އެތަނުގެ އަޣުލަބިއްޔަތު އޮތް ނަސްލެވެ. އަދި ކޫކީ އަކީ މައިނޯރިޓީ ނަސްލެކެވެ.

މި ހަމަނުޖެހުންތަކުގައި 250 އަށް ވުރެ ގިނަ މީހުން މަރުވެފައިވާއިރު، އެތައް ހާސް މީހުން ވަނީ ގެދޮރު ދޫކޮށް ދާންޖެހިފައެވެ.

އަރަމްބައި ޓެންގޯލް އަކީ އެ ސަރަހައްދުގެ އިޖްތިމާއީ ކަންކަން ކުރިއަރުވާ ޖަމާޢަތެއްގެ ގޮތުގައި އަމިއްލައަށް ސިފަކުރާ ޖަމާޢަތެކެވެ. އަދި މިއީ އެ ސްޓޭޓުގައި ވަރަށް ބޮޑު ނުފޫޒެއް އޮތް ޖަމާޢަތެކެވެ. މެއިޓީ ކޮމިއުނިޓީގެ ތާއީދު މި ޖަމާޢަތަށް ލިބިފައިވެއެވެ.

އެންމެ ފަހުން ހިނގި ހަމަނުޖެހުންތައް ފެށުނީ 7 ޖޫން ގައެވެ. އެއީ އިންޑިޔާގެ އެންމެ މަތީ ތަހުގީގީ އިދާރާ އިން ސިންގް އާއި އަރަމްބައި ޓެންގޯލްގެ އިތުރު ހަތަރު ލީޑަރުން ހައްޔަރުކޮށް، އަވައްޓެރި އާސާމް ސްޓޭޓުގެ ގުވާހާޓީ ސިޓީ އަށް ގެންދިއުމުންނެވެ.

މަނިޕޫރުގައި ހިނގި އަނިޔާވެރިކަމާ ގުޅޭ މައްސަލަތައް ތަޙުޤީޤު ކުރަމުންދާ ސެންޓްރަލް ބިއުރޯ އޮފް އިންވެސްޓިގޭޝަން (ސީބީއައި) އިން ބުނެފައިވަނީ މި މައްސަލަތަކުގެ ޝަރީޢަތް މަނިޕޫރުން އާސާމްގެ ގުވާހާޓީ އަށް ބަދަލުކުރެވިފައިވަނީ "މަނިޕޫރުގެ ޤާނޫނީ އަދި އަމަން އަމާންކަމުގެ ހާލަތަށް ރިޢާޔަތް ކުރުމަށްފަހު" ކަމަށެވެ.

މި ހައްޔަރު ކުރުންތަކަށް ފަހު، އަރަމްބައި ޓެންގޯލްގެ މެންބަރުން ދޫކޮށްލުމަށް ގޮވާލާ މުޒާހަރާކުރި މީހުން ވަނީ ފުލުހުންގެ މަރުކަޒަކަށް ވަދެ، ބަހެއް ގައި އަލިފާން ޖަހައި، ބައެއް ސަރަހައްދުތަކުގައި މަގުތައް ބަންދުކޮށްފައެވެ.

މުޒާހަރާ ކުރާ ބައެއް މީހުން ވަނީ ސަލާމަތީ ބާރުތަކާ ކުރިމަތިލާފައި ކަމަށް ދަ ހިންދޫ ނޫހުން ރިޕޯޓުކޮށްފައިވެއެވެ.

ސަލާމަތީ ބާރުތަކުން ހަލަބޮލިކަން ކޮންޓްރޯލް ކުރުމަށް ކަރުނަ ގޭހާއި ވަޒަން ބޭނުން ކޮށްފައިވާ ކަމަށް ދަ ހިންދުސްތާން ޓައިމްސް އިން ރިޕޯޓުކޮށްފައިވެއެވެ.

ސްޓޭޓުގެ ޤާނޫނު ހަދާ މަޖިލީހުގެ މެންބަރު އޯކްރާމް ސުރްޖާކުމާރު ބުނެފައިވަނީ މި ހައްޔަރު ކުރުން ތަކުގެ ސަބަބުން އެ ސްޓޭޓު ވަނީ ހަލަބޮލިކަމުގެ ތެރެއަށް ވައްޓާލާފައި ކަމަށެވެ.

މި ހަމަނުޖެހުންތަކާ ގުޅިގެން، ސްޓޭޓު ސަރުކާރުން ވަނީ އެ ސްޓޭޓުގެ ފަސް ޑިސްޓްރިކްޓެއްގައި ފަސް ދުވަހުގެ މުއްދަތަށް އިންޓަނެޓާއި މޯބައިލް ޑޭޓާގެ ޚިދުމަތްތައް ހުއްޓާލާފައެވެ. އަދި އެއް ޑިސްޓްރިކްޓެއްގައި މުއްދަތެއް ނެތް ކަރްފިއު އަމުރެއް ނެރެފައެވެ. މީގެ އިތުރުން ބައެއް ސަރަހައްދުތަކުގައި ހަތަރު މީހުންނަށް ވުރެ ގިނަ މީހުން އެއްވުން ވެސް ވަނީ މަނާކޮށްފައެވެ.

އަރަމްބައި ޓެންގޯލް އިން ވެސް ވަނީ ހޮނިހިރު ރެއިން ފެށިގެން ސްޓޭޓުގެ ބައެއް ސަރަހައްދުތަކުގައި 10 ދުވަހުގެ މުއްދަތަށް ހުރިހާ ހަރަކާތްތަކެއް ހުއްޓާލުމަށް އިޢުލާނުކޮށްފައެވެ.