ކޮލަމްބިއާ ގެ އިދިކޮޅު ރިޔާސީ ކެންޑިޑޭޓުގެ ބޮލަށް ބަޑި ޖަހައިފި

ވެރިރަށް ބޮގޯޓާގައި ބޭއްވުނު ކެމްޕެއިން އިވެންޓެއްގައި ވާހަކަ ދައްކަމުން ދަނިކޮށް ކޮލަމްބިއާގެ އިދިކޮޅު ރިޔާސީ ކެންޑިޑޭޓެއްގެ ބޮލަށް ބަޑިޖަހައިފިއެވެ.

39 އަހަރުގެ ސެނެޓަރ މިގޭލް އުރީބޭ އަށް ހޮނިހިރު ދުވަހު ހަމަލާ ދިނީ ޕާކެއްގައި އޭނާ އަށް ތާއީދުކުރާ މީހުންނާ މުޚާތަބު ކުރަމުން ދަނިކޮށެވެ.

އެޓަރނީ ޖެނެރަލްގެ އޮފީހުން ބުނި ގޮތުގައި ފުލުހުން ވަނީ 15 އަހަރުގެ ކުއްޖަކު އެތަނުން ހައްޔަރުކޮށްފައެވެ.

އުރީބޭ ގެ ސެންޓްރޯ ޑެމޮކްރަޓިކޯ ޕާޓީން މި ހަމަލާ ކުށްވެރިކޮށް، މިއީ "ކޮލޮމްބިއާގެ ޑިމޮކްރަސީ އަދި މިނިވަންކަމަށް" ކުރިމަތިވި ނުރައްކަލެއް ކަމަށް ބުނެފައިވެއެވެ.

އޮންލައިންކޮށް ހިއްސާކޮށްފައިވާ ފޯނު ފުޓޭޖުން ދައްކާގޮތުން، އޭނާ ވާހަކަ ދައްކަމުން ދަނިކޮށް ބޮލަށް ވަޒަން އެރި ވަގުތުގެ ހާދިސާ ފެނެއެވެ. އެ ވަގުތު އެއްވެތިބި މީހުން ބިރުން ކޮޅުކޮޅު މައްޗަށް ދުވާ މަންޒަރު ވެސް ފެނެއެވެ.

އުރީބޭ އަށް ހަމަލާ ދިނީ، 2026 ވަނަ އަހަރުގެ ރިޔާސީ އިންތިޚާބަށް ކުރިމަތިލުމުގެ ގޮތުން ބޭއްވި ކެމްޕެއިން އިވެންޓެއްގައެވެ. އޭނާ ހޮސްޕިޓަލަށް ގެންދިޔުމަށްފަހު، އޭނާގެ އަނބިކަނބަލުން މަރިއާ ކްލައުޑިއާ އެކްސް ގައި ހާމަ ކުރި ޕޯސްޓެއްގައި އުރީބޭ "ފުރާނައަށްޓަކައި ހަނގުރާމަ ކުރަމުންދާ" ކަމަށް ބުނެފައިވެއެވެ.

އުރީބޭ އަކީ ކުރީގެ ރައީސް އަލްވާރޯ އުރީބޭ އުފައްދަވާފައިވާ އިދިކޮޅު ކޮންޒަވޭޓިވް ޑެމޮކްރެޓިކް ސެންޓަރ ޕާޓީގެ މެންބަރެކެވެ.

އުރީބޭ ގެ ޕާޓީގެ ބަޔާނުގައި ބުނެފައިވާ ގޮތުން، ސެނެޓަރ ބޮގޮޓާގެ އާންމު ޕާކެއްގައި ކެމްޕެއިން އިވެންޓެއްގައި ބައިވެރިވަމުން ދަނިކޮށް "ހަތިޔާރު ހިފައިގެން ތިބި ބަޔަކު" އޭނާގެ ފުރަގަހުން ބަޑި ޖަހާފައިވެއެވެ.

ހޮސްޕިޓަލުން ނެރުނު މެޑިކަލް ރިޕޯޓެއްގައި ބުނެފައިވަނީ ސެނެޓަރ ހޮސްޕިޓަލަށް ގެނައި އިރު ވަނީ ނާޒުކު ހާލަތެއްގައި ކަމަށާއި، އޭނާ އަށް "ނިއުރޯސަރޖިކަލް އަދި ޕެރިފެރަލް ވެސްކިއުލަރ ޕްރޮސީޖަރެއް" ހަދަން ޖެހޭ ކަމަށެވެ.

މި ހަމަލާ ތަހުގީގު ކުރަމުންދާ އެޓަރނީ ޖެނެރަލްގެ އޮފީހުން ބުނެފައިވާ ގޮތުން، ސެނެޓަރަށް މި ހަމަލާގައި ދެ ވަޒަން އަމާޒުވި ކަމަށާއި، އިތުރު ދެ މީހަކަށް ވެސް އަނިޔާވި ކަމަށެވެ. އެ އޮފީހުގެ ބަޔާނުގައި ބުނެފައިވާ ގޮތުން، 15 އަހަރުގެ ކުއްޖަކު ވަނީ އެތަނުން ހަތިޔާރަކާއެކު ހައްޔަރުކުރެވިފައެވެ.

ކޮލޮމްބިއާގެ ރައީސް އޮފީހުން ނެރުނު ބަޔާނެއްގައި ބުނެފައިވަނީ ސަރުކާރުން މި އަނިޔާވެރި ހަމަލާ "ހަރުކަށި އިބާރާތުން" ކުށްވެރިކުރާ ކަމަށާއި، މި މައްސަލަ ފުރިހަމައަށް ތަޙުޤީޤުކުރުމަށް ގޮވާލާ ކަމަށެވެ.

އެމެރިކާގެ ސްޓޭޓް ސެކްރެޓަރީ މާކޯ ރޫބިއޯ ނެރުއްވި ބަޔާނެއްގައި ވިދާޅުވެފައިވަނީ އެމެރިކާއިން "އެންމެ ހަރުކަށި އިބާރާތުން" އުރީބޭ އަވަހާރަ ކޮށްލަން މަސައްކަތްކުރި ކުރުން ކުށްވެރިކުރާ ކަމަށެވެ. އަދި މި އަނިޔާވެރިކަމަށް ޒިންމާވާންޖެހެނީ ޕެޓްރޯ އާ މެދު "ނަފްރަތު އުފެއްދުމުގެ ވާހަކަތައް" ކަމަށް ވެސް އޭނާ ވިދާޅުވެފައިވެއެވެ.

މިގޭލް އުރީބޭ އަކީ ކޮލޮމްބިއާގެ ފާހަގަކޮށްލެވޭ ޢާއިލާއަކުން އައިސްފައިވާ ފަރާތެކެވެ.

އޭނާގެ ބައްޕަ އަކީ ވިޔަފާރިވެރިއެއްގެ އިތުރުން ޔޫނިއަން ލީޑަރެކެވެ. އޭނާގެ މަންމަ، ނޫސްވެރިޔާ ޑައިނާ ޓުރްބޭ، 1990 ގައި ވަނީ ކުރީގެ ކާޓެލް ލީޑަރު ޕާބްލޯ އެސްކޯބާ ހިންގި ހަތިޔާރުއެޅި ގްރޫޕަކުން ވަގަށް ނަގާފައެވެ. އޭނާ މަރުވީ 1991 ގައި ސަލާމަތް ކުރުމުގެ އޮޕަރޭޝަނެއްގެ ތެރޭގައެވެ.