ރަސްމީ ހައިސިއްޔަތުން ބޭއްވި ނޫސްވެރިންގެ ބައްދަލުވުންތަކުގައި އިސްރާއީލް ދިފާއު ކޮށް ވާހަކަ ދެއްކި ނަމަވެސް، އިސްރާއީލުން ޣައްޒާގައި "ހަނގުރާމައިގެ ކުށްތައް" ކޮށްފައިވާ ކަމަށް އަމިއްލަ ގޮތުން ޤަބޫލު ކުރައްވާ ކަމަށް ބައިޑްން ސަރުކާރުގެ އެމެރިކާގެ ސްޓޭޓް ޑިޕާޓްމަންޓްގެ ތަރުޖަމާނު، މެތިއު މިލަރ ވިދާޅުވެއްޖެއެވެ.

"އިސްރާއީލުން ހަނގުރާމައިގެ ކުށްތައް ކޮށްފައިވާކަމީ އެއްވެސް ޝައްކެއްނެތް ޙަޤީޤަތެކެވެ،" އޭނާ އިނގިރޭސިވިލާތުގެ ސްކައި ނިއުސްއަށް ވިދާޅުވިއެވެ.

މިލަރ ވިދާޅުވީ އެމެރިކާގެ ސްޓޭޓް ޑިޕާޓްމަންޓްގެ ތަރުޖަމާނުގެ ގޮތުގައި މަސައްކަތް ކުރެއްވިއިރު އެފަދަ ޚިޔާލެއް ފާޅުކުރެއްވޭނެ ގޮތެއް ނެތްކަމަށެވެ.

"ޕޯޑިއަމްގައި ހުންނައިރު އަމިއްލަ ޚިޔާލެއް ނޫން ފާޅުކުރަނީ، އެމެރިކާ ސަރުކާރުގެ ނިންމުންތައް،" އޭނާ ވިދާޅުވިއެވެ.

ފަލަސްތީނުގެ ދިފާއުގައި ހަނގުރާމަ ކުރަމުންދާ ޙަމާސް ބަލިކުރުމުގެ ނަމުގައި އިސްރާއީލުން ހިންގަމުންދާ އަނިޔާވެރި ހަނގުރާމައިގައި މަދުވެގެން 54,000 ފަލަސްޠީނު މީހުން ޝަހީދު ކޮށް، ދެ މިލިއަން ޣައްޒާގެ ރައްޔިތުން ބަނޑުހައިހޫނުކަމުގައި ބައިތިއްބާ، އިސްރާއީލުގެ އަނިޔާވެރި ސިފައިން އެމީހުންގެ ގެދޮރުން ތަކުރާރުކޮށް އެތައް ފަހަރަކު ވަނީ ބޭރު ކޮށްފައެވެ.

ބައިޑެންގެ ސަރުކާރުގެ ދުވަސްވަރު އެއްވެސް އިރެއްގައި އިސްރާއީލުން ހަނގުރާމައިގެ ކުށެއް ކޮށްފައިވާ ކަމަށް ތުހުމަތުކޮށްފައެއް ނުވެއެވެ. ސްޓޭޓް ޑިޕާޓްމަންޓްގެ ސްޕޯކްސްޕާސަންގެ ގޮތުގައި، މިލަރ ގިނަ ފަހަރު ހަނގުރާމައިގެ ކުށްތަކުގެ ތުހުމަތުތަކަށް ދެކޮޅު ހައްދަވައި، އެތައް ނޫސްވެރިންގެ ބައްދަލުވުމެއްގައި އިސްރާއީލުގެ އަނިޔާވެރި ޢަމަލުތައް ދިފާޢުކުރެއްވިއެވެ.

އެ ދުވަސްވަރު، އޭނާ އދ ގެ އޮފިޝަލުންނާއި އިންޓަރނޭޝަނަލް ކްރިމިނަލް ކޯޓުން އިސްރާއީލުން ޣައްޒާގައި ހަނގުރާމައިގެ ކުށްތައް ކޮށްފައިވާ ކަމަށާއި އިންސާނިއްޔަތާ ދެކޮޅު ކުށްތައް ކޮށްފައިވާކަމަށް ތުހުމަތު ކުރުމުން އެކަމަށް ފާޑުކިޔުއްވައި، އިސްރާއީލުން ދަރިފަސްކޮޅެއް ނައްތާލަނީ ކަމުގެ ތުހުމަތުކުރި އިންސާނީ ޙައްޤުތަކުގެ އޮފިޝަލުންނަކީ ޔަހޫދީންނާ ދެކޮޅު ބައެއް ކަމަށް ލޭބަލް ކުރެއްވިއެވެ.

ބައިންޑް އަށް ފަހު ވެރިކަމަށް ވަޑައިގެންނެވި ޑޮނަލްޑް ޓްރަމްޕްގެ ސަރުކާރުން ވެސް މިކަން ކުރިއަށް ގެންދަނީ މި ގޮތައް ކަން ފާހަގަ ކުރެވެއެވެ. ބައިނަލްއަޤްވާމީ އަދުލު އިންސާފުގެ ކޯޓު އައި.ސީ.ސީ އިން އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އަދި ކުރީގެ ދިފާޢީ ވަޒީރު ޔޯވް ގަލަންޓް "އިންސާނިއްޔަތާ ދެކޮޅު ކުށްތަކާއި ހަނގުރާމައިގެ ކުށްތަކަށް" ހައްޔަރުކުރުމުގެ އަމުރު ނެރުނު ނަމަވެސް، އެމެރިކާ އިން ޣައްޒާގައި އިސްރާއީލުން ހިންގާ ޖަރީމާ ތަކަށް ތާއީދު ކުރުން ކުރިއަށް ގެންދެއެވެ.

މި ހަފްތާ ގައި ދުރަށް ދެއްކި ސްކައި ނިއުސްގެ އިންޓަވިއުގައި، މިލަރ ވިދާޅުވެފައިވަނީ އޭނާ ސްޓޭޓް ޑިޕާޓްމަންޓްގައި މަސައްކަތްކުރެއްވި ދުވަސްވަރުވެސް ހިމެނޭގޮތަށް، އިސްރާއީލުން ޣައްޒާގައި ހަނގުރާމައިގެ ކުށްތައް ކޮށްފައިވާ ކަމަށް އޭނާ ޤަބޫލު ކުރައްވާ ކަމަށެވެ.

އޭނާ އިތުރަށް ވިދާޅުވީ އިސްރާއީލުގެ ސިފައިންގެ ވަކިވަކި މެންބަރުން ހަނގުރާމައިގެ ކުށްތައް ކޮށްފައިވާކަމީ "ހަމަ ޔަޤީނުންވެސް ހުޅުވިފައިވާ ސުވާލެއް ނޫން" ކަމަށެވެ.

"ކޮންމެ ހަނގުރާމައެއްގައި ވެސް، ޑިމޮކްރަސީތަކުން ހިންގާ ހަނގުރާމަތައްވެސް ހިމެނޭ ގޮތަށް، ސިފައިންގެ ވަކިވަކި މެންބަރުން ހަނގުރާމައިގެ ކުށްތައް ކުރާތަން ފެންނާނެއެވެ. އަދި ޑިމޮކްރަސީއެއް ވަޒަން ކުރާނީ އެމީހުން އެފަދަ މީހުން ޖަވާބުދާރީ ކުރުވާ މިންވަރުންނެވެ. ނަމަވެސް އިސްރާއީލުން އެކަން ކޮށްފައެއް ނުވެއެވެ،" މިލަރ ވިދާޅުވިއެވެ.

"އަޅުގަނޑުމެންނަށް އަދި ނުފެނޭ އެކަށީގެންވާ އަދަދެއްގެ ސިފައިން ޖަވާބުދާރީ ކުރުވާފައިވާ ތަނެއް، އަދި އަޅުގަނޑު ދެކޭގޮތުގައި އެމީހުން އެކަން ކުރާނެތޯ އެއީ އުފެދޭ ސުވާލެއް،" އޭނާ އިތުރުކުރެއްވިއެވެ.