ހިފާފައިވާ ވެސްޓް ބޭންކުގައި 22 އައު ގެ ބިނާ ކުރަން އިސްރާއީލު ސަރުކާރުން ޔަހޫދީންނަށް ހުއްދަ ދީފިއެވެ.

މިއީ ފާއިތުވި އެތައް އަހަރެއްގެ ތެރޭގައި ޔަހޫދީން ވަޒަންވެރި ކުރުވުމަށް ނުހިންގާ ވަރުގެ ބޮޑު ޕްރޮގްރާމެކެވެ.

ހިފާފައިވާ ބިންތަކުގައި ޔަހޫދީން ވަޒަން ވެރި ކުރުމަށް ވަރަށް ބޮޑަށް މަސައްކަތް ކުރާ ދިފާއީ ވަޒީރު އިސްރާއީލް ކަޓްޒް އަދި މާލީ ވަޒީރު ބެޒަލެލް ސްމޮޓްރިޗް ބުނާ ގޮތުގައި މީގެ ތެރެއިން ގިނަ އާބާދީތަކަކީ މިހާރުވެސް އައުޓްޕޯސްޓްތަކެއްގެ ގޮތުގައި ވުޖޫދުގައި ހުރި، ސަރުކާރުގެ ހުއްދައެއް ނެތި އިމާރާތް ކޮށްފައިވާ ތަންތަނެވެ. ނަމަވެސް މިހާރު އެތަންތަން އިސްރާއީލުގެ ޤާނޫނުގެ ހުއްދަ ލިބިގެން ހަދާފައިވާ ތަންތަނަށް ވެގެން ދާނެއެވެ.

ހިފާފައިވާ ބިންތަކުގައި ޔަހޫދީން ވަޒަންވެރި ކުރުވުމުގެ މައްސަލައަކީ - ބައިނަލްއަޤްވާމީ ޤާނޫނުގެ ދަށުން ޣައިރު ޤާނޫނީ ކަމެއްގެ ގޮތުގައި ފުޅާ ދާއިރާއެއްގައި ބެލޭ ކަމެކެވެ. ނަމަވެސް އިސްރާއީލުން މިކަމާމެދު އެއްވެސް ފަރުވާލެއް ނުބަހައްޓާ ހިތުހުރި ގޮތަކަށް ހިފާފައިވާ ބިންތަކަށް އަތްގަދަ ކުރުމުގެ މަސައްކަތް ދަނީ ކުރަމުންނެވެ. މިއީ އިސްރާއީލާއި ފަލަސްތީނާ ދެމެދުގައި އޮތް އެންމެ ޚިލާފު ބޮޑު މައްސަލަތަކުގެ ތެރެއިން އެއް މައްސަލައެވެ.

ކަޓްޒް ބުނާ ގޮތުގައި މި ފިޔަވަޅަކީ "އިސްރާއީލަށް ނުރައްކާވެދާނެ ފަލަސްޠީނު ދައުލަތެއް އުފެދުން ހުއްޓުވުމަށް". ކުރާ ކަމެކެވެ. އަނެއްކޮޅުން ފަލަސްޠީނު ރިޔާސަތުން މިކަން ސިފަކޮށްފައިވަނީ "ނުރައްކާތެރި މިންވަރަކަށް ކަންކަން ދިއުމުގެ" ގެ ގޮތުގައެވެ.

އިސްރާއީލުގެ އާބާދީ ތައް ގަވައިދާ ޚިލާފަށް ވަޒަންވެރި ކުރުވުމާ ދެކޮޅަށް މަސައްކަތް ކުރާ އަމިއްލަ ޖަމިއްޔާ "ޕީސް ނައު" އިން ބުނާ ގޮތުގައި އައު ވަޒަންވެރިންގެ ސަބަބުން "ވެސްޓް ބޭންކުގެ ސިފަ ބަދަލުކޮށް، އިސްތިއުމާރީ ބާރު އިތުރަށް ފުނަށް ތޮރުފިގެންދާނެއެވެ."

ފަލަސްޠީނުން މުސްތަޤްބަލުގެ ދައުލަތެއްގެ ގޮތުގައި ގާއިމު ވުމަށް ބޭނުންވާ މުހިންމު ބިންތައް ކަމަށްވާ ވެސްޓް ބޭންކް އާއި އީސްޓް ޖެރޫސަލަމް 1967 ގެ މެދު އިރުމަތީގެ ހަނގުރާމައިގައި އިސްރާއީލުން ހިފާ ހިސޯރު ކުރުމަށްފަހު، އެތަނުގައި 160 އެއްހާ އާބާދީ ވަޒަންވެރިކޮށް، 700،000 އެއްހާ ޔަހޫދީން އެތަންތަނުގައި ދިރިއުޅެމުންދެއެވެ.