އިސްރާއީލުން ޔަމަނުގެ މައި ވައިގެ ބަނދަރަށް ދިން ހަމަލާ ވަރަށް ބޮޑަށް ކުށްވެރި ކުރަމުން އެ ހަމަލާގެ ބަދަލު ހިފާނެ ކަމަށް ޔަމަނުން ބުނެފިއެވެ.

"ސަނާ އެއަރޕޯޓަށް ޒަޔަނިސްޓުން ދިން ހަމަލާ އިން ސާބިތުވަނީ ޔަމަނުގެ ހަމަލާތަކުން އެމީހުންނަށް ލިބޭ ވޭން؛" ކަމަށް ޔަމަނުގެ ސުޕްރީމް ޕޮލިޓިކަލް ކައުންސިލްގެ ޗެއަރމަން މަހްދީ އަލް-މަޝާތު ވިދާޅުވިއެވެ.

އޭނާ އިތުރަށް ވިދާޅުވީ، އިސްރާއީލުގެ ހަމަލާތަކުން ފަހަތައް ނުޖެހޭނެ ކަމަށާއި އޭގެ ބަދަލުގައި ޣައްޒާ އަށް އަށް މަދަދުވެރި ވުމުގައި އިތުރު ފިޔަވަޅުތައް އަޅާނެ ކަމަށެވެ.

ޔަމަނުން ބުނީ އިސްރާއީލުން ހިފާފައިވާ ބިންތަކަށް ވޭން ގަދަ ހަމަލާތައް ދޭނެ ކަމަށާއި، އެތަނުގައި ގާނޫނާ ޚިލާފަށް ވަޒަންވެރިވެގެން ތިބި ޔަހޫދީންނަށް ނަތަންޔާހޫ އަކަށް ހިމާޔަތެއް ނުދެވޭނެ ކަމަށެވެ.

އަލް-މަޝާތު އިންޒާރު ދެއްވާ ވިދާޅުވީ، އިސްރާއީލުގެ ތެލް އަވީވްގެ ބެން ގުރިއޮން އެއާރޕޯޓު ދަތުރުވެރިން ބޭނުން ނުކުރުމާށާއި ކޮންމެ ވަގުތެއްގައި ވެސް އެތަނަށް ހަމަލާއެއް އަރާފާނެ ކަމަށެވެ.

"އެ ތަނަކީ ރައްކައުތެރި ތަނެއް ނޫން، އަހަރެމެން ހަމަލާ ދިނުމަށް ފާހަގަ ކޮށްފައިވާ ތަނެއް،" އޭނާ ވިދާޅުވިއެވެ.

އިސްރާއީލުން ބޮން އަޅާ ޔަމަނުގެ ބައިނަލްއަޤްވާމީ އެއަރޕޯޓުގައި ބާކީ އޮތް ހަމައެކަނިި މަތިންދާބޯޓު ވަނީ ގޮއްވާލާފައެވެ. މީގެ ހަފްތާތަކެއް ކުރިން ދިން ހަމަލާއަކުން އެއަރޕޯޓަށް ބޮޑެތި ގެއްލުންތަކެއް ދީފައިވެއެވެ.

މެއި 17 ގައި މަދު ޚިދުމަތްތަކެއް ލިބޭ ގޮތައް ސަނާ އެއަރޕޯޓު ވަނީ ހުޅުވާފައެވެ. އޭގެ 11 ދުވަސް ކުރިން އިސްރާއީލުން ދިން ބޮޑު ހަމަލާއެއްގައި 6 މަތިންދާބޯޓު ގޮއްވާލުމާ ގުޅިގެން އެއަރޕޯޓު މުޅިން ބަންދު ކުރަން ޖެހުނެވެ.

ސަނާ އެއަރޕޯޓަށް ދިން ހަމަލާ އަށް ފަހު އިސްރާއީލުގެ ދިފާއީ ވަޒީރު އިސްރާއީލް ކަޓްޒް ވިދާޅުވެފައިވަނީ ބުދަ ދުވަހު ފައިޓަރ ޖެޓްތަކުން ޔަމަނުގެ ވެރިރަށް ސަނާގެ އެއަރޕޯޓުގެ ހޫތީންގެ "ޓެރަރިސްޓް ލަނޑުދަނޑިތަކަށް" ހަމަލާދީފައިވާ ކަމަށެވެ.

އިސްރާއިލުން މި ހަމަލާ ދިނުމުގެ ކުރީ ދުވަހު ހޫތީން ވަނީ އިސްރާއީލަށް ދެ މިސައިލް ހަމަލާ ފޮނުވާލާފައެވެ.

"އެއަރ ފޯސްގެ ޖެޓްތަކުން ދެންމެ ސަނާގެ އެއަރޕޯޓުގައި ހުރި ހޫތީ ޓެރަރިސްޓް ޖަމާއަތުގެ ޓެރަރިސްޓް ލަނޑުދަނޑިތަކަށް ހަމަލާދީ، އެތަނުގައި ބާކީ އޮތް އެންމެ ފަހު މަތިންދާބޯޓު ވެސް ހަލާކުކޮށްލައިފިން،" ކަޓްޒް ބަޔާނެއްގައި ވިދާޅުވިއެވެ.

"މިއީ ސާފު މެސެޖެއް..... އިސްރާއީލް ދައުލަތަށް ހަމަލާދޭ ކޮންމެ ފަރާތަކުން ބޮޑު އަގެއް ދައްކަން ޖެހޭނެ،" އޭނާ އިތުރު ކުރެއްވިއެވެ.

2023 ވަނަ އަހަރުގެ އޮކްޓޯބަރު މަހުން ފެށިގެން އިސްރާއީލުން ކުރަމުންދާ ޣައްޒާގެ ހަނގުރާމައިގައި ފަލަސްތީނު ރައްޔިތުންނާ އެއްބައިވުމުގެ ގޮތުން ހޫތީންގެ ފަރާތުން އިސްރާއީލަށް އަމާޒުކާޒުކޮށް ތަކުރާރުކޮށް މިސައިލްތަކާއި ޑްރޯންތައް ފޮނުވާފައިވެއެވެ.

ފަލަސްތީނުގެ ރައްޔިތުންނާ އެއްބައިވަންތަކަން ފާޅުކުރުމުގެ ގޮތުން ދެމުންދާ ހަމަލާތައް ހުތީން އަލުން ފެށީ، ދެ މަސް ދުވަހުގެ މުއްދަތަކަށް ހަނގުރާމަ މެދުކަނޑާލާފައި އޮތުމަށް ފަހު މާރޗް މަހު އިސްރާއީލުން އަލުން ޣައްޒާގައި އަސްކަރީ ޙަރަކާތްތައް ފެށުމާ ގުޅިގެންނެވެ.

ހޫތީންގެ ހަމަލާތަކުގެ ސަބަބުން އިސްރާއީލުގެ ބެން ގުރިއޮން އެއަރޕޯޓުގެ އޮޕަރޭޝަން ތަކަށް ބޮޑެތި ލޮޅުންތައް އަރާފައިވާކަން ފާހަގަ ކުރެވެއެވެ.

ފާއިތުވި މަސްތަކުގައި އިސްރާއީލުން ވަނީ މި ހަމަލާތަކަށް ޖަވާބު ދިނުމުގެ ގޮތުން ޔަމަނަށް އެކި ފަހަރު މަތިން ހަމަލާތައް ދީފައެވެ. މީގެ ތެރޭގައި ސަނާގެ އެއަރޕޯޓާއި ބަނދަރުތަކަށް ދިން ހަމަލާތައް ހިމެނެއެވެ.