ލީބިޔާގެ ބޮޑުވަޒީރު އަބްދުލް ހަމީދު އަދްބައިބާ ގެ ސަރުކާރު ވައްޓާލުމަށް ގޮވާލާ އެ ގައުމުގެ އަތައް ހާސް ބަޔަކު ކުރަމުންދާ މުޒާހަރާ އަށް އިޖާބަދީ ސަރުކާރުގެ އެތައް މިނިސްޓަރުން އިސްތިއުފާ ދީފިއެވެ.

ހުކުރު ދުވަހުގެ ރޭ ސަރުކާރުން ބުނެފައިވަނީ، ވެރިރަށް ޓްރިޕޮލީގެ އެކި ސަރަހައްދުތަކާއި މައިދާންތަކަށް އެތައް ހާސް ލިބިޔާ މީހުން ނުކުތްއިރު، ބޮޑުވަޒީރުގެ އޮފީހަށް އޭގެ ތެރެއިން ބަޔަކު "ހަމަލާދޭން މަސައްކަތްކުރި" ކަމަށާއި އެކަމުގައި ފުލުހަކު މަރުވެފައިވާ ކަމަށެވެ.

"އޭނާ އަށް ކާކުކަން ނޭނގޭ ބަޔަކު ހަމަލާދީ، ލިބުނު އަނިޔާގެ ސަބަބުން ވަނީ މަރުވެފައި،" ސަރުކާރުގެ ބަޔާނެއްގައި ބުނެފައިވެއެވެ. އަދި އިހުތިޖާޖުކުރާ މީހުންނާއެކު ހަރަކާތްތެރިވި ގްރޫޕަކުން ގޮވާތަކެތި ބޭނުންކޮށްގެން ބޮޑުވަޒީރުގެ އޮފީހުގައި ރޯކޮށްލަން މަސައްކަތް ކުރި ކަމަށް ބުނެފައިވެއެވެ.

ލީބިޔާ ސަރުކާރުން އިސްތިއުފާ ދެއްވި ވަޒީރުންގެ ތެރޭގައި އިޤްތިޞާދާއި ވިޔަފާރި އާ ބެހޭ ވަޒީރު، ލޯކަލް ގަވަރމަންޓް ވަޒީރު އަދި ހައުސިންގ އާ ބެހޭ ވަޒީރު ހިމެނޭ ކަމަށް ރިޕޯޓްތައް ބުނެއެވެ.

ސަރުކާރުން ކުރިން ވަނީ ވަޒީރުން އިސްތިއުފާދިން ކަމުގެ ރިޕޯޓުތައް ދޮގުކޮށްފައެވެ.

މުޒާހަރާ އަށް މީހުން މަގުތަކަށް ނުކުތް އިރު، ވޭތުވެދިޔަ ހަފުތާގައި ވެރިރަށް ޓްރިޕޮލީގައި ހިނގި އަނިޔާވެރި ހާދިސާތަކެއްގެ ސަބަބުން މަދުވެގެން 8 އާންމު ރައްޔިތުން ވަނީ މަރުވެފައެވެ. މި ނުރައްކާތެރި ހަމަނުޖެހުންތައް ފެށުނީ ބާރުގަދަ ހަނގުރާމަވެރި ލީޑަރެއް ކަމަށްވާ އަބްދުލްޣަނީ އަލް-ކިކްލީ، މިލިޓަރީ ބޭސްއަކަށް ރޭވިގެން ދިން ހަމަލާއެއްގައި މަރުވުމާ ގުޅިގެންނެވެ.

މި ހާދިސާގެ ފަހުން ބޮޑުވަޒީރު އަދްބައިބާ މަސައްކަތް ކުރައްވާފައިވަނީ ބާރުތައް އޭނާގެ މުށުތެރެއަށް އިތުރަށް ޖަމާ ކުރެއްވުމަށް ކަމަށް ރިޕޯޓުތައް ބުނެއެވެ.

އިހުތިޖާޖުތަކުގެ ކުރިން، ލީބިޔާ ގައި ހުންނަ ޔުނައިޓެޑް ނޭޝަންސް ސަޕޯޓް މިޝަން އިން ނެރެފައިވާ ބަޔާނެއްގައި ލީބިޔާގެ "ރައްޔިތުންނަށް ސުލްޙަވެރި އިހުތިޖާޖުކުރުމުގެ ޙައްޤު" ލިބިގެންވާ ކަމަށާއި އިތުރުވަމުންދާ ހަމަނުޖެހުންތަކާ މެދު ކަންބޮޑުވާ ކަމަށް ބުނެފައިވެއެވެ.

ޓްރިޕޮލީ ގައި ހުންނަ އަލްޖަޒީރާގެ ރިޕޯޓަރު ބުނެފައިވަނީ ލިބިޔާގެ ރައްޔިތުން ބޮޑު ބަދަލެއް ބޭނުންވާ ކަމަށެވެ. ރައްޔިތުން ތިބީ ގައުމުގެ ސަލާމަތީ ހާލަތާ މެދު ވަރަށް ބޮޑަށް ހިތްހަމަ ނުޖެހިފައި ކަމަށް ވެސް ވަނީ ބުނެފައެވެ.

"ލިބިޔާގެ ރައްޔިތުން އިންތިޚާބު ބޭއްވުމަށް ގޮވާލަނީ، އަދި އެމީހުންގެ ޚިޔާލު ފާޅުކޮށް، އެމީހުން އިޚްތިޔާރު ކުރާ ފަރާތްތައް ވެރިކަމަށް ގެނައުމަށް ބޭނުންވަނީ،" އަލް ޖަޒީރާގެ ރިޕޯޓަރު ބުނެފައިވެއެވެ.

2011 ގައި ނޭޓޯގެ އެހީތެރިކަމާއެކު ހިންގި ބަޣާވާތަކާ ގުޅިގެން ލިބިޔާ ވަނީ ހަމަނުޖެހުމުގެ ތެރޭގައެވެ. އެ ބަޣާވާތުގެ ނަތީޖާ އަކަށްވީ ޤައުމު ވާދަވެރި ދެ ފަރާތެއްގެ ދެމެދުގައި ދެ ބައިވެގެން ދިއުމެވެ.

އަދްބައިބާ ގެ ނެޝަނަލް ޔުނިޓީ ސަރުކާރު (ޖީއެންޔޫ) އަށް 2021 އިން ފެށިގެން ލިބިފައި އޮތީ ހުޅަނގު ލިބިޔާގެ ބާރެވެ. އެއާއެކު، އިރުމަތީ ސަރަހައްދުގައި އޮތީ މިލިޓަރީ ކޮމާންޑަރު ޚަލީފާ ހަފްތާރުގެ ބާރެވެ.

ލިބިޔާގައި 2021 ގެ ނިޔަލަށް ޤައުމީ އިންތިޚާބު ބޭއްވުމަށް ކުރިން އިއުލާނު ކުރި ނަމަވެސް، ކެންޑިޑޭޓުންގެ ޝަރުޠު ތަކާ ބެހޭ ގޮތުންނާއި، ޤާނޫނު އަސާސީ އާ ބެހޭ ގޮތުންނާއި، ސަލާމަތީ ކަންބޮޑުވުންތަކާ ގުޅިގެން އުފެދުނު ޚިލާފުތަކާ ހުރެ، ވާދަވެރި ފަރާތްތަކަށް އެއްބަސްވުމަކަށް ނާދެވި އެ އިންތިޚާބު ވަނީ މުއްދަތެއް ނެތި ފަސްކޮށްފައެވެ.