ސުޕްރީމް ކޯޓުގެ ފަނޑިޔާރުން ވަކިކުރުމުގައި އަމަލުކުރި ގޮތާމެދު އެޗްއާރްސީއެމް އިން ކަންބޮޑުވުން ފާޅުކޮށްފި
ފަނޑިޔާރުން ވަކިކުރުމުގައި އަމަލުކުރިގޮތާއިމެދު އެޗްއާރްސިއެމް އިން ކަންބޮޑުވުން ފާޅުކޮށްފި
ސުޕްރީމް ކޯޓުގެ ފަނޑިޔާރުންނާއި އެޗްއާރްސީއެމްގެ މެންބަރުން
ސުޕްރީމް ކޯޓުގެ ފަނޑިޔާރުންގެ ތެރެއިން ފަނޑިޔާރު އަލްއުސްތާޛު މަޙާޒު ޢަލީ ޒާހިރު އަދި ފަނޑިޔާރު ޑރ. އަޒްމިރާލްދާ ޒާހިރު ވަކިކުރުމުގައި އަމަލުކުރިގޮތާއިމެދު ހިއުމަން ރައިޓްސް ކޮމިޝަން (އެޗްއާރްސިއެމް)އިން ކަންބޮޑުވުން ފާޅުކޮށްފިއެވެ.
އެޗްއާރުސީއެމް އިން މިއަދު ބަޔާން ނެރިފައި މިވަނީ ދެ ފަނޑިޔާރުން ވަކިކުރަން ޖުޑީޝަލް ސާވިސް ކޮމިޝަން (ޖޭއެސްސީ) އިން ނިންމާ ފޮނުވި ރިޕޯޓު މަޖިލީހުގެ ޖުޑީޝަރީ ކޮމިޓީން ފާސްކޮށް ތަޅުމަށް ފޮނުވާފައި ވަނިކޮށެވެ.
އެޗްއާރްސީއެމް އިން ނެރުނު ނޫސްބަޔާނުއްގައި ބުނީ، ޖޭއެސްސީގެ ނިންމުމަކީ މަޖިލިސް މެންބަރުންގެ ގޮނޑި ގެއްލުވާލުމުގެ ބާރު ސިޔާސީ ޕާޓީތަކަށް ލިބޭނެހެން ގާނޫނުއަސާސީއަށް ގެނައި ބަދަލާ ގުޅިގެން ސުޕްރީމް ކޯޓަށް ހުށަހެޅި މައްސަލަ ކުރިއަށް ގެންދިއުމަށް ހުރަސް އެޅޭ ކަމެއް ކަމަށެވެ. އެޗްއާރްސީއެމް އިން ޖޭއެސްސީގެ ނިންމުމާ މެދު މަޖިލީހުގެ ކޮމިޓީން އަމަލުކުރި ގޮތާމެދު ކަންބޮޑުވުން ފާޅުކޮށްފައިވެ އެވެ.
އޭގެ އިތުރުން ފަނޑިޔާރުގޭގެ މިނިވަންކަމަށް ރާއްޖޭގެ ގާނޫނުތަކާއި ރާއްޖެއިން ބައިވެރިވެފައިވާ މުއާހަދާތަކުގައި ފާޅުކަން ބޮޑުކޮށް ގޮވާލާފައިވާ ކަން ވެސް އެ ކޮމިޝަނުން ފާހަގަކޮށްފައިވެ އެވެ.
ޝަރުއީ ދާއިރާގެ މިނިވަންކަމަށް އިޙްތިރާމްކޮށް، އެކަންކަން ނަގަހައްޓާ ދެމެހެއްޓުމަކީ ކޮންމެ ދައުލަތެއްގެ ވެސް ޒިންމާއެއް ކަމަށާއި، ޝަރުއީ ދާއިރާގެ ނިންމުންތަކަށް އެއްވެސް ފަރާތެއްގެ ނުފޫޒެއް ނުވަތަ ބާރުފޯރުވުމެއް އޮވެގެން ނުވާނެ ކަމަށް ބަޔާންކޮށްފައިވޭ،ހިއުމަން ރައިޓްސް ކޮމިޝަން (އެޗްއާރްސީއެމް)
ޖޭއެސްސީން ދެ ފަނޑިޔާރުންގެ މައްޗަށް ހިންގި ތަހުގީގުގައި ބޮޑެތި ގޯސްތަކެއް ހުރިކަން ތަފުސީލީ ގޮތެއްގައި އެޗްއާރުސީއެމް އިން ނެރުނު ބަޔާނުގައި ފާހަގަކޮށްފައިވާއިރު މިކަމުގައި ފަނޑިޔާރުންގެ ވަކީލުންނާއި ދިވެހި ރާއްޖޭގެ ވަކީލުން، ގާނޫނީ ދާއިރާގެ ތަޖުރިބާކާރުން، އަދި ބައިނަލްއަގުވާމީ ޖަމާއަތްތަކާއި އިދާރާތަކުން ފާޅުކޮށްފައިވާ ކަންބޮޑުވުންތައް ވެސް މިއަދު އެޗްއާރުސީ އެމް އިން ނެރުނު ބަޔާނުގައި ފާހަގަކޮށްފައިވެ އެވެ.
އަދި ކޯޓުތަކުގެ ޤާނޫނަށް ގެންނަން ހުށަހެޅުނު 5 ވަނަ އިސްލާޙުގައި ސުޕްރީމް ކޯޓުގެ ފަނޑިޔާރުންގެ އަދަދު 7 އިން 5 އަށް މަދުކުރުމަށް ހުށަހަޅާފައިވާ އިސްލާޙަކީ ޤާނޫނުއަސާސީގެ 154 ވަނަ މާއްދާއާ ޚިލާފު، އަދި ޤާނޫނީ އަދި ދުސްތޫރީ ހަމަތަކާ ޚިލާފު އިސްލާޙެއްކަމަށް އެޗްއާރްސީމްގެ ބަޔާނުގައި ބުނެފައިވެއެވެ. އޭގެ އިތުރުން އެކަމުގެ ކަންބޮޑުވުން ރައީސުލްޖުމްހޫރިއްޔާގެ އޮފީހާ ހިއްސާކޮށްފައިވާނެކަމަށްވެސް އެބަޔާނުގައިވެއެވެ.
އެޗްއާރްސީއެމް އިން ވަނީ ދިވެހިރާއްޖޭގެ ދުސްތޫރީ އަދި ދިމިޤްރާތީ އުސޫލުތަކާއި، ޤާނޫނުގެ ވެރިކަން ނަގަހައްޓައި، ދިވެހި ދައުލަތުގެ ތިން ބާރު ވަކިވެފައިވާ ނިޒާމަށް އިޙްތިރާމްކުރުމާއެކު، ބައިނަލްއަޤްވާމީ އިލްތިޒާމުތައް ކަށަވަރުކުރުމަށް އެންމެހައި ދައުލަތުގެ މުއައްސަސާތަކަށް ގޮވާލާފައެވެ.
