މިހާރު ކުރިއަށްދާ އެފްއޭއެމް ލީގު ކަޕްގައި މަހުބަދޫ ސްޕޯޓްސް ކުލަބާ ދެކޮޅަށް ކުޅުނު މެޗުން ބޮޑު މޮޅެއް ހޯދައި، އޮޑި ސްޕޯޓްސް ކުލަބުން މުބާރާތުގެ ފެށުން ރަނގަޅު ކޮށްފި އެވެ.

ހުކުރު ދުވަހުގެ ހަވީރު ގަލޮޅު ރަސްމީ ދަނޑުގައި ކުޅުނު މި މެޗަކީ، މުބާރާތުގައި ދެ ޓީމުގެ ވެސް ފުރަތަމަ މެޗެވެ. އެ މެޗުގައި އޮޑި އިން ވަނީ 6-0 އިން މަހިބަދޫގެ މައްޗަށް ކުރި ހޯދައިފަ އެވެ.

މެޗުގެ ފުރަތަމަ ހާފުގައި އޮޑި އިން ތިން ލަނޑު ޖެހިއިރު، އަނެއް ތިން ލަނޑު އެ ޓީމުން ޖެހީ މެޗުގެ ފަހު ހާފުގަ އެވެ.

މެޗުގެ ފުރަތަމަ ހާފުގެ 33 ވަނަ މިނެޓުގައި އޮޑި އިން ލީޑު ނެގީ އެ ޓީމަށް ލިބުނު ޕެނަލްޓީ ކާމިޔާބު ކޮށްގެންނެވެ. އެ ޕެނަލްޓީ ކާމިޔާބުކޮށް އެ ޓީމަށް ކުރި ހޯދައިދިނީ ބިދޭސީ ކުޅުންތެރިޔާ އިސްލާމް ފިކްރީ އެވެ.

އޭގެ މިނެޓެއް ފަހުން އިސްމާއީލް ވިފާގު ވަނީ އޮޑީގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. މެޗުގެ ފުރަތަމަ ހާފުގެ ފުރިހަމަ ވަގުތު ހަމަވާން މިނެޓަކަށް ވެފައި ވަނިކޮށް، ވިފާގު ވަނީ އޮޑީގެ ތިން ވަނަ ލަނޑު ޖަހައިފަ އެވެ.

މެޗުގެ ދެ ވަނަ ހާފު ފަށައިގެން ފަސް ވަނަ މިނެޓުގައި މުޒްދާން ޙަސަން ވަނީ އޮޑީގެ ހަތަރު ވަނަ ލަނޑު ޖަހައިފަ އެވެ. އޭގެ ހަ މިނެޓު ފަހުން އޮޑީގެ ފަސް ވަނަ ލަނޑު ޖެހީ ހައިސަމް ރަޝީދު އެވެ. އަދި މެޗުގައި އޮޑީގެ ހަ ވަނަ ލަނޑު މުޒްދާން ޖެހީ 75 ވަނަ މިނެޓުގަ އެވެ.

އެފްއޭއެމް އިން އިންތިޒާމު ކޮށްގެން ބާއްވާ މި މުބާރާތުގައި ވާދަކުރަނީ ފަސް ޓީމެވެ. އެއީ ފުރަތަމަ ޑިވިޝަންގެ ތިން ޓީމު އަދި ދެ ވަނަ ޑިވިޝަންގެ ދެ ޓީމެވެ.

މިއީ މިދިޔަ އޭޕްރީލް މަހުގެ ތެރޭގައި ފަށަން އޮތް ފުޓުބޯޅަ ސީޒަން ނުފެށި، ލީގު ފަސް ކުރަން ޖެހުމުން އޭގެ ބަދަލުގައި އެފްއޭއެމް އިން ބާއްވާ މުބާރާތެކެވެ.