ޗައިނާގެ ބޯޓެއް ބޭނުން ކޮށްގެން، ޕާކިސްތާނުން އިންޑިއާގެ ދެ ބޯޓު ވައްޓާލައިފި

ޗައިނާ އިން ތައްޔާރު ކޮށްފައިވާ ހަނގުރާމަ މަތީ ބޯޓެއް ބޭނުން ކޮށްގެން، ޕާކިސްތާނުން އިންޑިއާގެ ހަނގުރާމަ މަތީ ދެ ބޯޓު ވައްޓާލާފައިވާ ކަމަށް މީޑިއާ ތަކުގައި ރިޕޯޓުކޮށްފި އެވެ.

މީޑިއާ ތަކުގައި ރިޕޯޓު ކޮށްފައިވާ ގޮތުގައި ޕާކިސްތާނުން ބޭނުން ކޮށްފައި ވަނީ ޗައިނާ އިން ތައްޔާރު ކޮށްފައިވާ ޖޭ-10 ގެ ހަނގުރާމަ މަތީ ބޯޓެވެ. 

މި ރިޕޯޓާ ގުޅިގެން އިންޑިއާ އަސްކަރިއްޔާގެ ތަރުޖަމާނު ވިދާޅުވެފައި ވަނީ، އެކަމުގައި ވަކި ކޮމެންޓެއް ކުރައްވަން ބޭނުން ނުވާ ކަމަށެވެ. 

އެމެރިކާގެ އިސް ދެ އޮފިޝަލަކި ރޮއިޓާސް އަށް ވިދާޅުވެފައިވާ ގޮތުގައި، މި ހާދިސާ އަކީ ޗައިނާަގެ ހަނގުރާމަ މަތީ ބޯޓުތަކުގެ ފެންވަރު ދައްކުވައިދޭ މުހިންމު ހާދިސާއެއްގެ ގޮތުގައި ބެލެވޭ ކަމަށެވެ. 

އިންޑިއާގެ އޮފިޝަލު ހާމަކޮށްފައިވާ ގޮތުގައި ވައްޓާލި ދެ ބޯޓުގެ ތެރެއިން އެއް ބޯޓަކީ ފްރާންސް އިން ތައްޔާރު ކޮށްފައިވާ ރަފާލް ހަނގުރާމަ މަތީ ބޯޓެކެވެ.

އެ ދެ އޮފިޝަލުން ވެސް ހާމަކޮށްފައިވާ ގޮތުގައި އެ ހާދިސާގައި ޕާކިސްތާންގެ ހަނގުރާމަ މަތީ އެފް-16 ގެ ބޯޓެއް ބޭނުން ކޮށްފައި ނުވެ އެވެ.

ޕާކިސްތާންގެ ދިފާއީ ވަޒީރު ޚަވާޖު މުޙައްމަދު އާސިފް ވިދާޅުވެފައިވާ ގޮތުގައި، ޖޭ-10 ގެ ހަނގުރާމަ މަތީ ބޯޓު ބޭނުން ކޮށްގެން ފްރާންސް އިން އުފައްދާފައިވާ ރަފާލް ތިން ބޯޓު ވައްޓާލާފައިވާ ކަމަށާއި، ބެލެވޭ ގޮތުގައި އެއީ އިންޑިއާ އަށް ނިސްބަތްވާ ބޯޓުތަކެއް ކަމަށެވެ.

އިންޑިއާ އާއި ޕާކިސްތާނާ ދެމެދު މިހާރު ހިނގަމުން އަންނަ ހަނގުރާމައިގެ ތެރޭގައި،ބުރާސްފަތި ދުވަހުގެ ރޭ ޕާކިސްތާނުން ވަނީ އިންޑިއާގެ 25 ޑްރޯން ވައްޓާލާފައިވާ ކަަމަށް ބުނެފަ އެވެ. 

މީގެ އިތުރުން އިންޑިއާ އިން ބުނެފައި ވަނީ ޕާކިސްތާންގެ ޑްރޯން އަދި މިސައިލް ހަމަލާތަކެއް ހުއްޓުވާފައިވާ ކަމަށެވެ.