ތޫނު އެއްޗަކުން މީހެއްގެ ބޮލަށް ހަމަލާދީ، ފޭރުނުކަމުގެ ތުހުމަތުގައި ހައްޔަރުކުރި ޒުވާނެއް ޝަރީއަތް ނިމެންދެން ބަންދުކޮށްފި

ތޫނު އެއްޗަކުން މީހެއްގެ ބޮލަށް ހަމަލާދީ، މާރާމާރީ ހިންގައި ފޭރުނުކަމުގެ ތުހުމަތުގައި ހައްޔަރުކުރި ޒުވާނެއް ޝަރީއަތް ނިމެންދެން ބަންދުކޮށްފިއެވެ.

ތޫނު އެއްޗެއް ނުވަތަ ނުރައްކާތެރި ހަތިޔާރެއް ބޭނުންކޮށްގެން ފޭރުމުގެ ތުހުމަތުގައި ހައްޔަރުކޮށްފައިވަނީ ކ.މާލެ، ގ.ޖެލީފިޝް، 18 އަހަރުގެ މިރާސް ލަތީފެވެ.

ކްރިމިނަލް ކޯޓުން މިދިޔަ ބުރާސްފަތި ދުވަހު ވަނީ އޭނާގެ ޝަރީއަތް ނިންމެންދެން ބަންދުކުރުމަށް އަމުރުކޮށްފައެވެ.

ބަންދުގައި ބެހެއްޓުމަށް އަމުރު ކުރި ސަބަބުގެ ގޮތުގައި ބުނެފައިވަނީ ކުށުގެ ތުހުމަތު ކުރެވޭ މިންވަރެއްގެ ހެކި ހުށަހަޅާފައިވާ ކަމަށެވެ. އަދި އަނިޔާ ލިބުނު ފަރާތުގެ ބަޔާނާއި، ސީސީޓީވީ ފޫޓޭޖްގެ ސްނެޕްޝޮޓާއި، ސީން އޮފް ކްރައިމް އޮފިސަރސް ރިޕޯޓުން އޭނާގެ މައްޗަށް ތުހުމަތު ކުރެވޭ ކަމަށް ބުނެފައިވެއެވެ.

މީގެ އިތުރުން ބަންދުގައި ބަހައްޓަންޖެހޭ ހާލަތް އޮތްކަމަށް ދެކޭ ސަބަބުގެ ގޮތުގައި ބުނެފައިވަނީ މިރާސްގެ މައްޗަށް ތުހުމަތު ކުރެވެނީ ތޫނު އެއްޗެއް ބޭނުންކޮށްގެން ފޭރުމުގެ ތުހުމަތު ކަމަށާއި، އަނިޔާ ލިބުނު ފަރާތުގެ ބޮލަށް ތޫނު އެއްޗަކުން ހަމަލާދީފައިވާކަން ފާހަގަކުރެވޭ ކަމަށެވެ.

އަނިޔާ ލިބުނު ފަރާތުގެ ބޮލުން ގިނަ އަދަދެއްގެ ލޭ ފައިބާފައިވާ ކަމަށާއި، އޭނާއާއެކު، މިކަމުގެ އިތުރު މީހެއް ބައިވެރިވެފައިވާ ކަން ފާހަގަކުރެވޭ ކަމަށް ބުނެފައިވެއެވެ.

މި މައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ.