މި ސަރުކާރު މިދަނީ ވެއްޓުމާ ދިމާލަށް، ރައްޔިތުން ހުށިޔާރުވާންޖެހޭ: މާޒް ސަލީމް
ރައްޔިތުންގެ ކުރިމަތީގައި ފުލުހުން އަމިއްލައަށް އެމީހުންގެ އިތުބާރު ވަނީ ނަގާލާފައި
އެމްޑީޕީގެ ކުއްލި އެއްވުމުގައި ހޯމް މިނިސްޓްރީގެ ކުރީގެ ސްޓޭޓް މިނިސްޓަރު އަހުމަދު ސަލީމް ވާހަކަދައްކަވަނީ
ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސަރުކާރު މިދަނީ ވެއްޓުމާ ދިމާލަށް ކަމަށާއި، ރައްޔިތުން ހުށިޔާރުވާންޖެހޭ ކަމަށް ހޯމް މިނިސްޓްރީގެ ކުރީގެ ސްޓޭޓް މިނިސްޓަރު އަހުމަދު ސަލީމް (މާޒް ސަލީމް) ވިދާޅުވެއްޖެއެވެ.
އާއްމު ރައްޔިތުންގެ ހައްގުތައް ގެއްލިގެންދާތީ އެމްޑީޕީން ބޭއްވި ކުއްލި ބައްދަލުވުމުގައި ސަލީމް ވިދާޅުވީ ފުރާޅު މައްޗަށް ވެއްޓިފައި އޮއްވާ ފެނުނު ހައްވާ ޔުމްނުގެ ކޭސްގައި ފުލުހުން ކޮންމެވެސް ބައެއްގެ މަސްލަހަތު ފޮރުވުމަށް ވަރަށް މަސައްކަތް ކޮށްފައިވާ ކަމަށާއި، ރައްޔިތުންގެ ކުރިމަތީގައި ފުލުހުން އަމިއްލައަށް އެމީހުންގެ އިތުބާރު ނަގާލާފައިވާ ކަމަށެވެ.
މިހާރު މިސަރުކާރު މިދަނީ ވެއްޓުމުގެ ދިމާލަށްކަން ފާހަގަކުރައްވައި ސަލީމް ވިދާޅުވީ ސަރުކާރު ބަދަލުވެގެން ދާއިރު، ދެން އަންނަ ސަރުކާރަކުން ވެސް މިފަދަ މައްސަލަތައް ބަލާނެ ކަމަށާއި، ކްރައިމް އިންވެސްޓިގޭޝަން ޔުނިޓްގައި މަސައްކަތް ކުރާ ފުލުހުންނާ ސުވާލުތައް ކުރިމަތި ކުރުވާނެ ކަމަށެވެ. އަދި ވިދާޅުވީ މިމައްސަލާގައި ވެސް ފަލީހަތްވެ، އަދަބު ލިބިގެންދާނީ މި ޔުނިޓްގައި މަސައްކަތް ކުރާ ފުލުހުންނަށް ކަމަށެވެ.
ފުލުހުންގެ ތެރޭގައި އޮންނާނެ ކްރައިމް އިންވެސްޓިގޭޝަން ކިޔާ ޔުނިޓެއް އޮންނާނެ. ވަރަށް ޕްރޮފެޝަނަލް ކުދިން ތިބޭނީ. ވަރަށް ގާބިލް އެހުށިޔާރުކަން ހުންނާނެ. މިއީ ޝައްކުކުރާ ކަމެއް ނޫން. އެކުދިންނަށް މިކަން ނުބެލުނީ ކަމަށް މަތީފަޑީގައި ތިބި މީހުން ނުކުމެ މިބުނީ. އަޅުގަނޑު މިރޭ ކްރައިމް އިންވެސްޓިގޭޝަން ޔުނިޓްގައި ތިބޭ ކުދިންނަށް އަޅުގަނޑު މިދަންނަވަނީ ތިބޭފުޅުން ރައްޔިތުންގެ ކުރި މައްޗަށް ނުކުމެ މިކަމުގެ ހަގީގަތް ކިޔާދޭށޭ ވަރަށް ސާފުކޮށް. އެއީ މާތްﷲ ގަންދީ ހުވައެއް ކޮށްގެން ތި ކުދިން ތި ތިބީ. އެހެންވީމަ ނުކުމެ ވަރަށް ސާފުކޮށް މިއަދު ރައްޔިތުންގެ ކުރީމަތިގައި އެވާހަކަ އެބަ ކިޔާދޭން ޖެހޭ.ހޯމް މިނިސްޓްރީގެ ކުރީގެ ސްޓޭޓް މިނިސްޓަރު އަހުމަދު ސަލީމް (މާޒް ސަލީމް)
ޔުމްނުގެ ކޭސްގައި އެޒުވާނާ ފުލުހުންގެ އިދާރާއިން ވަރަށް ބޮޑަށް ފަލީހަތް ކޮށްފައިވާކަން ފާހަގަކުރައްވައި ސަލީމް ވިދާޅުވީ މިފަދަ މައްސަލަތައް ތަކުރާރުނުވާނެ ގޮތަކަށް ފިޔަވަޅުތައް އަޅައި، ރައްޔިތުންގެ އިތުބާރު ހޯދުމަށް މަސައްކަތް ކުރަންޖެހޭ ކަމަށެވެ.
ވަކި މީހަކަށް ވަކި ގޮތެއް ނުހަދާނެ ކަމަށް ރައީސް މުއިއްޒު ވިދާޅުވި ނަމަވެސް ހޯމް މިނިސްޓަރު އަލީ އިހުސާން އަދި ޓްރާންްސްޕޯޓު މިނިސްޓަރު މުހައްމަދު އަމީން މަގާމުން ވަކި ކުރައްވަން ކެރިވަޑައިނުގެންނެވި ކަމަށެވެ. އެދެބޭފުޅުން މަގާމުން އެކަހެރި ނުކުރެއްވި ނަމަވެސް ރައްޔިތުން އެކަން ބަލައި ނުގަންނާނެ ކަމަށާއި، އިންސާފު އަރާ ހަމަ ކުރާނެ ކަމަށް އޭނާ ވިދާޅުވިއެވެ.
