ރައީސް ޑރ. މުހައްމަދު މުއިއްޒުގެ މި ސަރުކާރުގެ މިހާރުގެ މިސްރާބު ހުރި ގޮތުން އިންތިހާބުތަކުގައި ލާ ވޯޓު ގުނި ރައްޔިތުންގެ ބަސް އިއްވޭނެ ކަމުގެ ޔަގީންކަން ގެއްލި ދިއުމުގެ ބިރު އެބަ އޮތް ކަމަށް ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެންބަރު އަބްދުއްރަހްމާން ވިދާޅުވެއްޖެއެވެ.

މެމްބަރު އަބްދުއްރަޙުމާނު މިފަދައިން ވިދާޅުވެފައި ވަނީ އެކްސްގައި ކުރެއްވި ޕޯސްޓެއްގައި އެވެ.

ރިޔާސީ އިންތިހާބުގެ ދެ ވަނަ ބުރެއް ނުބޭއްވުމާއި، ވޯޓުގެ 50 ޕަސެންޓު ނުލިބުނަސް އެންމެ ގިނަ ވޯޓު ލިބިއްޖެ ނަމަ ވެރިކަމަށް އާދެވޭނެ ގޮތަށް ހަމަޖައްސައިދިނުމަށް މަޖިލީހުގެ މެމްބަރުންގެ އަރިހުން ރައީސް ޑރ.މުހައްމަދު މުއިއްޒު އެދިވަޑައިގެންފައިވާ ކަމަށް ވަނީ އަޑު ފެތުރިފައެވެ. އަޑު ފެތުރިފައިވާ ގޮތުގައި މި ގޮތަށް ރައީސް އެދިވަޑައިގެންފައި ވަނީ މުލިއާގޭގައި މެމްބަރުންނާއި އެކު ބޭއްވި ބައްދަލުކުރެއްވުމެއްގަ އެވެ.

މިކަމުގެ ކަންބޮޑުވުން ފާޅުކުރައްވައި މެމްބަރު އަބްދުއްރަޙުމާނު އެކްސްގައި ވިދާޅުވީ 2008 ވަނަ އަހަރުން ފެށިގެން މިފަހަކާއި ޖެހެންދެން ވެސް ދިވެހި ރައްޔިތުންނަށް އޮތް ޔަގީންކަމަކީ އިންތިހާބުތަކުގައި ލާ ވޯޓު ގުނި އެ ރައްޔިތުންގެ ބަސްއިއްވޭނެ ކަމުގެ ޔަގީންކަން ކަމަށާއި އެހެން ނަމަވެސް މިހާރު މިސްރާބު ހުރިގޮތުން އެ ޔަގީންކަން ގެއްލެމުން ދާކަމަށެވެ.

އަބްދުއްރަޙުމާން ވިދާޅުވީ ވެރިކަމަށްޓަކައި ކުރިއަށް ރޭވިފައި ހުރި ރޭވުންތަށް މިހާރު ވަޒަންވެސް ނުކުރެވޭ ކަމަށާއި އަންދާޒާކުރެވެނީ ރައްޔިތުންނަށް އެއްވެސް ކަމެއް ކޮށްނުދީ، ދައުލަތުގެ މުދަލާއި ވަސީލަތް، ފައިސާއާއި ވަޒީފާ، ކޮރަޕްޝަނާއި ފަސާދަ، ނަހަމަ ބާރު ބޭނުންކޮށް މަދު ވޯޓުކޮޅަކުން ދެވަނަ ދައުރެއް ޔަގީންކުރުން ކަމަށެވެ. އަދި މިއީ ބަލައިގަނެވޭނޭ ކަމެއް ނޫން ކަމަށް ވެސް އަބްދުއްރަޙުމާނު ވިދާޅުވި އެވެ.

އަބްދުއްރަޙުމާނު ވިދާޅުވީ އިންތިޚާބުގެ ދެވަނަ ބުރެއް ނުބޭއްވުމަށް ކަމަށް ވިދާޅުވެ، މި ސަރުކާރުން ގެންގުޅޭ ވިސްނުމަށް އެއްވެސް މެމްބަރަކު ތާއީދު ކޮށްގެން ނުވާނޭ ކަމަށާއި މިކަމަށް ތާއިދު ކުރާ މަޖިލިސް މެންބަރުންވެސް ދެން އެ ދާއިރާތަކުން ބަލައި ނުގަތުމަށް ގޮވާލާ ކަމަށެވެ.

އަބްދުއްރަޙުމާނު އިތުރަށް ވިދާޅުވީ ދެން އެ ބޭފުޅުން ރައްޔިތުން ކޮބާތޯ ބަލާނީ ވެސް ހަމައެކަނި ވޯޓާއި ޖެހުމުން ކަމަށާއި ވޯޓް ހޯދަން އުންމީދުކުރާނީ ކޮރަޕްޝަނާއި ފަސާދައިން ކަމަށް ވެސް އޭނާ ވިދާޅުވިއެވެ.

ރިޔާސީ އިންތިހާބުގެ ދެ ވަނަ ބުރެއް ނުބޭއްވުމާއި، ވޯޓުގެ 50 ޕަސެންޓު ނުލިބުނަސް އެންމެ ގިނަ ވޯޓު ލިބިއްޖެ ނަމަ ވެރިކަމަށް އާދެވޭނެ ގޮތަށް ހެދުމަށް މި ސަރުކާރުގެ ވިސްނުން ހުރި އިރު، މިކަމާއި ގުޅިގެން އެމްޑީއޭއަށް ނިސްބަތްވާ ރައްޔިތުންގެ މަޖިލީހުގެ ވެލިދޫ ދާއިރާގެ މެންބަރު އައްބާސް ވެސް ވަނީ ވަރަށް ބޮޑަށް ފާޑުވިދާޅުވެ އެކްސްގައި ޕޯސްޓެއް ކުރައްވަވާފައެވެ.

އައްބާސް އެކްސްގައި ވިދާޅުވެފައި ވަނީ ރިޔާސީ އިންތިހާބުގެ ދެވަނަ ބުރެއް ނުބާއްވާން ނިންމަވައިފިނަމަ އެކަމަށް ތާއީދު ނުކުރާނެ ކަމަށާއި އަދި ލާމަރުކަޒީ ނިޒާމުގެ ސިފަތައް ގެއްލޭނެ ގޮތަށް އަތޮޅު ކައުންސިލްތައް އުވާލަން ވެސް ތާއީދު ނުކުރައްވާނެ ކަމަށެވެ.

މީގެ އިތުރުން ކުރީގެ އުއްތަމަ ފަނޑިޔާރު ޑރ. އަހުމަދު އަބްދުﷲ ދީދީ ވެސް ވިދާޅުވެފައި ވަނީ އެއީ ޤާނޫނުއަސާސީ އާއި ޚިލާފު މަސައްކަތެއް ކަމަށާއި އާދައިގެ މެޖޯރިޓީ އަކުން ވެރިކަމަށް އާދެވޭނެ މަގު ފަހި ކުރުމަކީ ކަނޑައެޅިގެން ޤާނޫނުއަސާސީގައި އިސްތިގުރާރުވެފައިވާ އަސާސީ މަބްދައަކާއި ޚިލާފުވުން ކަމަށެވެ.

މީގެ އިތުރުން އެއީ ޑިމޮކްރެޓިކް ނިޒާމާއި ވެސް ޚިލާފު ކަމެއް ކަމަށް އެ މަނިކުފާނު ވަނީ ވިދާޅުވެފައެވެ. ޑިމޮކްރެޓިކް ނިޒާމު ފުނޑާލަން މަސައްކަތް ކުރުމަކީ ރައީސުލްޖުމްހޫރިއްޔާގެ ހުވަޔާ ހިލާފުވާނެ ކަމެއް ކަމަށާއި އެއީ އަޒުލުކުރަން ޖެހޭ ވަރުގެ ކަމެއެއް ކަމަށް އެ މަނިކުފާނު ވަނީ ވިދާޅުވެފަ އެވެ.

ރައީސް ޑރ.މުހައްމަދު މުއިއްޒު ވަނީ ރިޔާސީ އިންތިހާބުގެ ދެވަނަ ބުރު އުވާލަން ހުށަހަޅުއްވާނެކަން އާއްމުކޮށް އިޢުލާންކުރައްވާފައެވެ. އެކަން އެ މަނިކުފާނު ހާމަކުރެއްވީ 2024 ވަނަ އަހަރުގެ ޖުމްހޫރީ ދުވަހުގެ ޖަލްސާގައި ވާހަކަ ދައްކަވަމުންނެވެ. ރައްޔިތުން އެގޮތަށް ދެކޭ ނަމަ އިންތިޚާބު ބާއްވާނީ އެއްބުރު އޮންނަ ގޮތަށް ކަމަށް ރައީސް ވަނީ އޭރު ވިދާޅުވެފަ އެވެ.