އެމެރިކާ އާއެކު އީރާނުން މަޝްވަރާ ކުރަން ބޭނުން ނުވާ ކަަމަށް އީރާނުގެ ރޫހާނީ ލީޑަރު އާޔަތުﷲ ޚާމަނާއީ ވިދާޅުވެއްޖެއެވެ.

އެމެރިކާގެ ނަން ވިދާޅުނުވެ އާޔަތުﷲ އެމެރިކާ ސިފަ ކުރެއްވީ ހަނގާ ކުރާ ބައެއްގެ ގޮތުގައެވެ.

އިރާނުގެ ސުޕްރީމް ލީޑަރު ވިދާޅުވީ މަޝްވަރާ ކުރުމަށް ކަމަށް ބުނެ ހަނގާ ކުރާ ބައެއް ސަރުކާރު ތަކުން ވާހަކަ ދައްކަނީ މައްސަލަތައް ހައްލުކުރުމަށް ނޫންކަމަށެވެ. މިއީ އެމީހުންގެ އަމިއްލަ ބޭނުންތަކެއް ހާސިލު ކުރަން ކުރާ މަސައްކަތެއް ކަމަށް ވިދާޅުވިއެވެ.

ހޮނިހިރު ދުވަހު ތެހެރާންގައި ބޭއްވުނު ދައުލަތުގެ ތިން ބާރުގެ އިސްވެރިންނާއި ސަރުކާރުގެ އެހެނިހެން އިސް އޮފިޝަލުންނާއެކު ބޭއްވުނު ބައްދަލުވުމެއްގައި، ހަނގާކުރާ ގައުމުތަކުން އެ ކުރާ އުއްމީދުތައް އިސްލާމިކް ރިޕަބްލިކުން ހާސިލެއް ނުކޮށްދޭނެ ކަމަށް ވިދާޅުވިއެވެ.

އިރާނުގެ ލީޑަރު ވިދާޅުވީ ހަނގާކުރާ ގައުމުތަކުން މަޝްވަރާ ކުރުމަށް އެ ބުނާ ކަންތައްތަަކަކީ ހަމައެކަނި ނިއުކްލިއަރ މައްސަލަ އެކަނި ނޫންކަމަށެވެ. އޭގެ ބަދަލުގައި، މިއީ އިރާނުގެ ދިފާއީ އަދި ބައިނަލްއަގުވާމީ ގާބިލިއްޔަތުތަކާ ގުޅޭގޮތުން އެމީހުންގެ އައު ބޭނުންތަކެއް ހާސިލު ކުރުަމަށް ކުރާ މަސައްކަތެއްކަމަށް ވިދާޅުވިއެވެ.

ޔޫރަޕިއަން ގައުމުތަކުން އިރާނާ ދެކޮޅަށް ކުރާ ތުހުމަތުތަކަށް ފާޑުވިދާޅުވެ، އިރާނުން ނިއުކްލިއަރ އެއްބަސްވުމުގެ ޝަރުތުތައް ފުރިހަމަ ނުކުރާ ކަމަށް ބުނުމަކީ ހަމެޖެހޭ ވާހަަކަ އެއް ނޫން ކަމަށް ވެސް އީރާނުގެ ލީޑަރު ވިދާޅުވިއެވެ.

ނިއުކްލިއަރ އެއްބަސްވުމުގެ ދަށުން އީރާނުން ވައުދުވި ކަންކަން ނުކުރާކަމަށް ހުޅަނގުން ބުނާއިރު، ހުޅަނގުން އެއްބަސްވި ކަންކަން ފުރިހަމަ ކުރިތޯ އާޔަތުﷲ ވަނީ ސުވާލު އުފައްދަވާފައެވެ.

ހުޅަނގެ ހަޟާރަތުގެ ސިފަތަކަކީ އިސްލާމް ދީނާ ބީރައްޓެހި ސިފަ ތަކެއް ކަމަށް ވުމާއެކު ހުޅަނގުގެ އުސޫލުތައް އީރާނަށް ބަލައިނުގަނެވޭ ކަމަށް ވެސް އާޔަތުﷲ ވިދާޅުވިއެވެ.

އީރާނަށް ކުރިމަތިވެފައިވާ އިގްތިސާދީ ގޮންޖެހުންތަކާ ގުޅޭގޮތުން ވާހަކަފުޅު ދައްކަވަމުން، ގައުމުގެ މާލީ ސިޔާސަތު އިސްލާހުކުރުމާއި ގައުމީ ފައިސާގެ އަގު ހިފެހެއްޓުމުގެ މުހިންމުކަން ފާހަގަކުރެއްވިއެވެ. އަދި މައްސަލަތައް ހައްލުކުރުމަށް ސަރުކާރުގެ ތިން ބާރާއި ހަތިޔާރުއެޅި ބާރުތަކުގެ މެދުގައި އެއްބާރުލުން އިތުރުކުރުމަށް ގޮވާލެއްވިއެވެ.