ޣައްޒާ އަލުން ބިނާކުރުމަށް އަރަބި ލީޑަރުން ހުށަހަޅާ ޕްލޭނަށް ފްރާންސް އިން ތާއީދު
މި ޕްލޭނުގެ ދަށުން ޣައްޒާ ސަރަހައްދު ހިންގުމުގައި ފަލަސްތީނު އޮތޯރިޓީ ބައިވެރިވާން ޖެހޭނެ ކަމަށާއި، ހަމާސް އެއްކޮށް އެކަހެރިކުރަން ޖެހޭނެ ކަމަށް ވެސް ފްރާންސް އިން ބުނެފައިވޭ.
15 މަސް ދުވަހުގެ ދިގުލީ ހަނގުރާމައިގައި ޣައްޒާ ވަނީ މުޅިން ހަލާކުވެ ފުނޑުފުނޑުވެފައި
ޣައްޒާ އަލުން ބިނާކުރުމަށް އަރަބި ލީޑަރުން ހުށަހަޅާފައިވާ ޕްލޭނަށް ފްރާންސް އިން ތާއީދުކޮށްފިއެވެ. މި ޕްލޭނުގެ ދަށުން ޣައްޒާ ސަރަހައްދު ހިންގުމުގައި ފަލަސްތީނު އޮތޯރިޓީ ބައިވެރިވާން ޖެހޭނެ ކަމަށާއި، ހަމާސް އެއްކޮށް އެކަހެރިކުރަން ޖެހޭނެ ކަމަށް ވެސް ފްރާންސް އިން ބުނެފައިވެއެވެ.
ފްރާންސްގެ ފޮރިން މިނިސްޓްރީގެ ތަރުޖަމާނު ކްރިސްޓޯފް ލެމޮއިން ވިދާޅުވީ އަރަބި ލީޑަރުން ހުށަހަޅާފައިވާ ޕްލޭނަކީ "ޣައްޒާ ހަނގުރާމައަށް ފަހު އަލުން ބިނާކުރުމާއި، ވެރިކަން ހިންގުމާއި، ސަލާމަތީ ބޭނުންތަކަށް އެކަށީގެންވާ އަދި އިތުބާރުހުރި އަސާސެއް" ކަމަށެވެ.
އަރަބި ލީޑަރުން މި ހަފްތާގެ ކުރީކޮޅު ފާސްކުރި ޕްލޭންގައި، ޣައްޒާ އަލުން ބިނާކުރުމަށް ޓްރަސްޓް ފަންޑެއް މެދުވެރިކޮށް ފައިސާ ހޯދުމާއި، ފަލަސްތީނު އޮތޯރިޓީ އަނބުރާ ޣައްޒާގެ ވެރިކަމަށް ގެނައުން ހިމެނެއެވެ. ފަލަސްތީނު އޮތޯރިޓީ އަކީ 2007 ގައި ހަމާސް އިން ބާރު ހޯދުމުގެ ކުރިން ޣައްޒާ ހިންގި ފަރާތެވެ.
އެމެރިކާގެ ރައީސް ޑޮނަލްޑް ޓްރަމްޕް ހުށަހެޅުއްވި، އެމެރިކާ އިން ޣައްޒާ ކޮންޓްރޯލް ކުރުމުގެ ޕްލޭނަށް ފަލަސްތީނުގެ ރައްޔިތުންނާއި، އަރަބި ގައުމުތަކާއި، ގިނަ ޔޫރަޕިއަން ސަރުކާރުތަކުން ދެކޮޅު ހަދާފައިވެއެވެ. އަދި ޣައްޒާގެ ރައްޔިތުން އެމީހުންގެ ވަޒަނުން ނެރުމަށް ކުރެވޭ އެއްވެސް މަސައްކަތަކަށް އިދިކޮޅު ހަދާނެ ކަމަށް ބުނެފައިވެއެވެ.
