އައްޑޫ ބިޔުރޯ

އައްޑޫގެ ކަރަންޓުގެ މައްސަލައަށް ދާއިމީ ހައްލެއް ނުލިބި އަހަރަކަށްވުރެ ގިނަ ދުވަސްވެފައިވަނިކޮށް، މިރޯދަ މަހު ކަރަންޓްގެ މައްސަލައަށް ހައްލު ލިބޭނެ ކަމަށް ސަރުކާރުން ބުނި ނަމަވެސް އެކަމަށް ހައްލެއް ނުލިބި އޮއްވާ، ފެނަކަ ކޯޕަރޭޝަން ލިމިޑެޓްގެ މެނޭޖިން ޑިރެކްޓަރ މޭޖަރ ރިޓަޔަރޓް މުޙައްމަދު ނަޖާހް އައްޑޫ ސިޓީއަށް ވަޑައިގެންނެވުމުން ޒުވާނުން ނިކުމެ މުޒާހަރާކޮށްފިއެވެ.

ބުދަ ދުވަހުގެ ރޭ ދަންވަރު އައްޑޫ ގަން އިންޓަރނޭޝަނަލް އެއަރޕޯޓް ސަރަހައްދަށް ގިނ އަދަދެއްގެ ޒުވާނުން އެއްވެ ސަރުކާރާއި ދެކޮޅަށް ވަނީ އަޑު އުފުލާފައެވެ. އެގޮތުން މިހާރުން މިހާރަށް އައްޑޫ ސިޓީއަށް ދިމާވެފައިވާ ކަރަންޓްގެ މައްސަލައަށް އަވަސް ހައްލެއް ބޭނުންވާ ކަމަށްވެސް ޒުވާނުން ވަނީ ބުނެފައެވެ.

އަދި ފެނަކަ އެމްޑީގެ މަޤާމުގައި ހުންނެވި ނަޖާހް ވަގުތުން އިސްތިއުފާ ދިނުމަށްވެސް މުޒާހަރާގެ ބައިވެރިން ވަނީ ގޮވާލާފައެވެ.

ރޯދަ މަހަށް އައްޑޫ ސިޓީގެ ކަރަންޓްގެ މައްސަލަ އަށް ހައްލު ހޯދައިދޭނެ ކަމަށް ރައީސް ޑރ. މުހައްމަދު މުއިއްޒު ވިދާޅުވި ނަމަވެސް އައްޑޫގެ ކަރަންޓްގެ މައްސަލަ އަށް ދާއިމީ ހައްލެއް ހޯދައިދިނުމަށް ސަރުކާރުން އެކަށީގެންވާ ގޮތެއްގައި މަސައްކަތްކޮށްފައި ނުވާ ކަމަށް އައްޑޫ ސިޓީ ކައުންސިލުންވެސް ބުންޏެވެ.

ފެނަކަ އެމްޑީ އައްޑޫ ސިޓީއަށް ވަޑައިގެންނެވިިއިރު، އެސިޓީގެ ބައެއް ދާއިރާތަކުގެ ރައްޔިތުންގެ މަޖިލީހުގެ މެމްބަރުންވެސް ވަޑައިގެންނެވިއެވެ.

އައްޑޫ ސިޓީ މޭޔާރ އަލީ ނިޒާރު ރާއްޖެޓީވީގެ ފަށާއިރު ޕްރޮގްރާމުގައި ވިދާޅުވީ، އައްޑޫގެ ކަރަންޓްގެ މައްސަލަ ހައްލު ކުރުމަށްވުރެ މުހިއްމު ކަމެއް ސަރުކާރަށް މިވަގުތު އޮވެގެން ނުވާނެ ކަމަށެވެ.

ހަފްތާއެއް ވަންދެން ކަރަންޓް މެދުނުކެނޑި އޮތުމަށްފަހު އަންގާރަ ދުވަހުން ފެށިގެން އަނެއްކާވެސް އެސިޓީގެ އެކި ސަރަހައްދުތަކުން ވަނީ ކަރަންޓް ކަނޑަން ފައްޓާފައެވެ.