އީރާނުގެ ނައިބު ރައީސް ދެވަނަ ފަހަރަށް އިސްތިއުފާ ދެއްވައިފި

އީރާނުގެ ނައިބު ރައީސް މުހައްމަދު ޖަވާދު ޒާރިފް އެ ގައުމުގެ ނައިބު ރައީސް ކަމުން އިސްތިއުފާ ދެއްވައިފިއެވެ.

އީރާނުގައި ކުރިން ޚާރިޖީ ވަޒީރު ކަން ވެސް ކުރެއްވި ޒާރިފް އެ ގައުމުގެ ނައިބު ރައީސް ކަމުގެ އިސްތިއުފާ ދެއްވި މިއީ ދެވަނަ ފަހަރެވެ.

ޖުލައި މަހު އީރާނުގެ ރައީސް ކަމަށް ވަޑައިގެންނެވި ޕެެޒެޝްކިއާންގެ އެއް ނައިބު ރައީސްގެ ގޮތުގައި އައްޔަން ކުރެއްވި ޒާރިފް މަގާމަށް އައްޔަނު ކުރެވުނުތާ ދެ ހަފްތާއެއްހާ ދުވަހުގެ ތެރޭގައި، އޮގަސްޓް މަހުގެ ފުރަތަމަ ދުވަހު އިސްތިއުފާ ދެއްވިއެވެ. އެހެން ނަަމަވެސް ފަހުން އެ މަހު ވަޒީފާ އަށް އަލުން ނުކުންނަވަން ފެއްޓެވިއެވެ.

އީރާނުގެ 2015 ވަނަ އަހަރުގެ ނިއުކްލިއަރ އެއްބަސްވުން ވުޖޫދަށް ގެނައުމުގައި މުހިންމު ދައުރެއް އަދާކުރެއްވި، އެ ޤައުމުގެ ކުރީގެ ފޮރިން މިނިސްޓަރ މުހައްމަދު ޖަވާދު ޒާރިފް ނައިބު ރައީސް ގެ މަޤާމުން އިސްތިއުފާ ދެއްވައިފިކަމަށް އީރާނުގެ ސަރުކާރުގެ މީޑިއާއިން ހޯމަ ދުވަހު ވަނީ ޔަގީން ކޮށްދީފައެވެ.

އައި.އާރް.އެން.އޭ ނިއުސް އެޖެންސީން ބުނެފައިވާ ގޮތުގައި، ޒާރިފްގެ އިސްތިއުފާގެ ސިޓީ ރައީސް މަސްއޫދު ޕެޒެޝްކިއާން އަށް ލިބިވަޑައިގެންފައިވާ ކަމަށާއި، ނަމަވެސް އަދި އިސްތިއުފާގެ ސިޓީ އަށް ޖަވާބެއް ދެއްވާފައި ނުވާ ކަމަށެވެ.

އެކްސް ޕްލެޓްފޯމްގައި ކުރެއްވި ޕޯސްޓެއްގައި ޒާރިފް ވިދާޅުވެފައިވަނީ، އެމަނިކުފާނުގެ ޚިދުމަތުގެ 40 އަހަރުގެ ތެރޭގައި، ނައިބު ރައީސް ކަމުގެ މަގާމުގައި އެމަނިކުފާނާށާއި އާއިލާއަށް އެންމެ ހަޑިހުތުރު ފުރައްސާރަ އާއި ބިރުދެއްކުންތަކާ ކުރިމަތިލާން ޖެހުނު ކަމަށާއި، ޚިދުމަތުގެ އެންމެ ހިތި ދުވަސްވަތައް ހޭދަކުރައްވަން ޖެހުނު ކަމަށެވެ.

އީރާނުގެ ސަރުކާރަށް އިތުރު ފިއްތުންތަކާ ކުރިމަތިނުވުމަށްޓަކައި، ޖުޑީޝަރީގެ އިސްވެރިޔާ، އޭނާ އިސްތިއުފާ ދެއްވުމަށް ލަފާ ދެއްވުމުން އެކަން ވަގުތުން ޤަބޫލުކުރެއްވި ކަމަށް ޒަރީފް ވިދާޅުވިއެވެ.

އީރާނުގެ ކުރީގެ ރައީސް ހަސަން ރޫހާނީގެ ވެރިކަމުގައި 2013 އިން 2021 އަށް ޒާރިފް ހުންނެވީ ފޮރިން މިނިސްޓަރުކަމުގެ މަޤާމުގައެވެ. 2015 ގައި ޖޮއިންޓް ކޮމްޕްރިހެންސިވް ޕްލޭން އޮފް އެކްޝަންގެ ނަމުގައި ނިއުކްލިއަރ އެއްބަސްވުން އެކުލަވާލުމުގެ ދިގު މަޝްވަރާތަކުގައި މުހިންމު ދައުރެއް އަދާކުރެއްވުމާއެކު، ބައިނަލްއަޤްވާމީ މައިދާނުގައި އެމަނިކުފާނަށް މަޝްހޫރު ކަން ލިބިގެން ދިޔައެވެ.

ނަމަވެސް، ގިނަ ފަރާތްތަކެއް ބައިވެރިވި މި އެއްބަސްވުމުން 2018 ގައި އެމެރިކާގެ ރައީސް ޑޮނަލްޑް ޓްރަމްޕްގެ ވެރިކަމުގައި އެ އެއްބަސްވުމުން އެމެރިކާ ވަކިވެ، އީރާނުގެ މައްޗަށް ހަރުކަށި ފިޔަވަޅުތައް އަޅުއްވުމާއެކު، އެންމެ ފަހުން މި އެއްބަސްވުން ވަނީ ނިމުމަކަށް އައިސްފައެވެ.