ޣައްޒާ އަލުން އިމާރާތް ކުރުމަށް ޕްލޭން ތައްޔާރު: މިސްރު

ޣައްޒާ އަލުން އިމާރާތްކުރުމުގެ ޕްލޭން ތައްޔާރުވެއްޖެ ކަމަށް މިސްރުން ބުނެފިއެވެ.

މިޞްރުގެ ފޮރިން މިނިސްޓަރ ބަދުރު އަބްދުއްލަތީ ވިދާޅުވީ މާރޗް 4 ގައި ބޭއްވޭ ކުއްލި އަރަބި ސަމިޓްގައި ހުށަހެޅުމަށް، ފަލަސްޠީނު ރައްޔިތުން އެމީހުންގެ ބިމުގައި ދެމިތިބޭނެ ކަން ކަށަވަރުކުރާ ޣައްޒާ އަލުން އިމާރާތްކުރުމުގެ ޕްލޭން ތައްޔާރުވެފައިވާ ކަމަށެވެ.

މި ޕްލޭނަކީ ހަމައެކަނި މިޞްރު ނުވަތަ އަރަބި ޤައުމުތަކުގެ ޕްލޭނެއް ނޫން ކަމަށާއި، ބައިނަލްއަޤްވާމީ އެހީތެރިކަމާއި ފަންޑިންގ ލިބިގެން ކުރިއަށް ގެންދެވޭނެ ޕްލޭނެއް ކަމަށް އޭނާ ވިދާޅުވިއެވެ.

އެމެރިކާގެ ކުރީގެ ރައީސް ޑޮނަލްޑް ޓްރަމްޕް ހުށަހެޅުއްވި، ޣައްޒާގެ ކޮންޓްރޯލް އެމެރިކާއިން ނަގައި ފަލަސްޠީނުގެ ރައްޔިތުން އެހެން ތަނަކަށް ބަދަލުކުރުމުގެ ޕްލޭނާ ދެކޮޅަށް އަރަބި ޤައުމުތަކުން ވަނީ ތެދުވެފައެވެ.

ޔޫރަޕިއަން ޔޫނިއަންގެ މެޑިޓެރޭނިއަން ކޮމިޝަނަރ ޑުބްރަވްކާ ޝުއިކާއާއެކު ބޭއްވި ނޫސްވެރިންގެ ބައްދަލުވުމެއްގައި އަބްދުއްލަތީ ވިދާޅުވީ، އަރަބި ސަމިޓުން މި ޕްލޭން ފާސްވުމަށްފަހު، އެހީދޭ މައި ޤައުމުތަކާއެކު މަޝްވަރާތައް ފެށޭނެ ކަމަށެވެ.

ހަނގުރާމައިގެ ސަބަބުން ހަލާކުވެފައިވާ ޣައްޒާ އަލުން އިމާރާތްކުރުމުގައި ޔޫރަޕްގެ ދައުރު ވަރަށް މުހިންމު ކަމަށް މިނިސްޓަރު ފާހަގަކުރެއްވިއެވެ. އަދި ޖެނުއަރީ މަހު ސޮއިކުރެވުނު ހަނގުރާމަ ހުއްޓުމުގެ އެއްބަސްވުމުގެ ދެވަނަ ފިޔަވަހި ފެށުމަށް މިޞްރުން ދަނީ މަސައްކަތްކުރަމުން ކަމަށް ވެސް އޭނާ ވިދާޅުވިއެވެ.

އަރަބި ސަމިޓަށްފަހު ސައުދީ އަރަބިއްޔާ ގައި އިސްލާމީ ގައުމުތަކުގެ އެއްބާރުލުމުގެ ޖަމްއިއްޔާގެ ކުއްލި މިނިސްޓީރިއަލް ބައްދަލުވުމެއް ބޭއްވުމަށް ހަމަޖެހިފައިވާ ކަމަށާއި، އެ ބައްދަލުވުމުގެ ނަތީޖާތައް ދުނިޔެއަށް ހުށަހެޅުމަށް މަސައްކަތްކުރާނެ ކަމަށް މިސްރުގެ ފޮރިން މިނިސްޓަރު ވިދާޅުވިއެވެ.