އަހަރަކަށްވުރެ އަހަރެއް މާލެ ސިޓީ ކައުންސިލަށް ބްލޮކް ގްރާންޓުގެ ގޮތުގައި ލިބޭ ފައިސާ ވަނީ މަދުވެފައި - އާޒިމް

އަހަރަކަށްވުރެ އަހަރެއް މާލެ ސިޓީ ކައުންސިލަށް ބްލޮކް ގްރާންޓުގެ ގޮތުގައި ދައުލަތުގެ ބަޖެޓުން ލިބޭ ފައިސާ މަދުވެފައިވާ ކަމަށް މާލެ ސިޓީގެ މޭޔަރ އާދަމް އާޒިމް ވިދާޅުވެއްޖެއެވެ.

މޭޔަރ ޢާޒިމް މި ފަދައިން ވިދާޅުވީ، ބުރާސްފަތި ދުވަހުގެ ރޭ ލޮނުޒިޔާރަތް ޕާކުގައި އޮތް މިއަހަރުގެ ރައްޔިތުންގެ ބައްދަލުވުމުގައެވެ.

އާޒިމް ވިދާޅުވީ ބްލޮކް ގްރާންޓްގެ ގޮތުގައި ސަރުކާރުން ދެއްވި އަދަދު 2024 ވަނަ އަހަރު 18 މިލިއަން ރުފިޔާ މަދު ކަމަށެވެ. 2025 ވަނަ އަހަރުގެ ބަޖެޓުން ލިބެންވާ ބްލޮކް ގްރާންޓުވެސް 23 މިލިއަން ރުފިޔާ މަދުން ލިބިފައި ކަމަށް އާޒިމް ވިދާޅުވިއެވެ.

އާޒިމް ވިދާޅުވީ ކައުންސިލްގެ މައިގަނޑު ޒިންމާތަކުގެ ތެރެއިން ރައްޔިތުންގެ އަސާސީ ހިދުމަތްތަކާއި، ރަށްވެހި ހިދުމަތްތައް ފޯރުކޮށްދިނުމަށް ހަރުދަނާ ގޮތެއްގައި ދެމެހެއްޓުމަކީ އަބަދުވެސް އެންމެ އިސްކަންދޭ އެއް މަސްއޫލިއްޔަތު ކަމަށެވެ. މީގެ ތެރޭގައި މިހާރު ހިނގަމުންދާ މަސައްކަތްތައް ކުރުމަށްޓަކައި ވެސް މި އަހަރުގެ ބަޖެޓުގައި ޖުމްލަ 78 މިލިއަން ރުފިޔާ ކަނޑައެޅިފައިވާނެ ކަމަށެވެ. މީގެ އިތުރުން ތަރައްގީގެ މަޝްރޫއުތައް ކުރިއަށްގެންދިއުމަށް 104 މިލިއަން ރުފިޔާ ހިމަނާފައިވާނެ ކަމަށެވެ.

2024 ވަނަ އަހަރު މާލެ ސިޓީ ކައުންސިލަށް އާމްދަނީގެ ގޮތުގައި ލިބިފައިވަނީ 399 މިލިއަން ރުފިޔާ. މީގެ ތެރޭގައި ހިމެނެނީ ބްލޮކް ގްރާންޓުގެ ގޮތުގައި ދައުލަތުން ލިބުނު 189 މިލިއަން ރުފިޔާއާއި ވެހިކަލް ފީގެ ގޮތުގައި ލިބުނު 121 މިލިއަން ރުފިޔާއާއި، އެހެނިހެން ގޮތްގޮތުން ލިބުނު 89 މިލިއަން ރުފިޔާ. މީގެ ތެރެއިން ހަރަދުކުރެވިފައިވަނީ 360 މިލިއަން ރުފިޔާ. އެހެންކަމުން ކައުންސިލްގެ ހަރަދުތައް ކުޑަކުރަން އެޅި ހަރުދަނާ ފިޔަވަޅުތަކާއެކީގައި ފާއިތުވި 2024 ވަނަ އަހަރު ނިންމާލީ 39 މިލިއަން ރުފިޔާގެ އަރަންޏާއެކު. 2025 ވަނަ އަހަރު ކައުންސިލަށް ލިބޭނެ އާމްދަނީއަކީ 503 މިލިއަންެ ރުފިޔާ. ބްލޮކް ގްރާންޓުގެ ގޮތުގައި ދައުލަތުގެ ބަޖެޓުން ލިބޭ 171 މިލިއަން ރުފިޔާއާއި، ވެހިކަލް ފީގެ ގޮތުގައި ލިބޭނެ ކަމަށް ލަފާކުރެވޭ 140 މިލިއަން ރުފިޔާއާއި، ކުލީގެ ގޮތުގައި ލިބޭނެ 40 މިލިއަން ރުފިޔާއާއި އެހެނިހެން ގޮތްގޮތުން ލިބޭނެކަމަށް ލަފާކުރާ 153 މިލިއަން ރުފިޔާ.

މާލެ ސިޓީގެ މޭޔަރ އާދަމް ޢާޒިމް

އާޒިމް ވިދާޅުވީ މާލެ ސިޓީ ކައުންސިލަކީ ރައްޔިތުންނަށް ހިދުމަތް ފޯރުކޮށްދިނުމުގައި އެންމެން ގުޅިގެން އަމަލީ ގޮތުން މަސައްކަތްކޮށް ކާމިޔާބު ހާސިލްކުމުގައި ނަމޫނާ ކައުންސިލެއް ކަމަށެވެ. އާޒިމް ވިދާޅުވީ ވޭތުވެދިޔަ އަހަރު ހާސިލްކުރި ކާމިޔާބީތަކުން އެކަން ފެންނަން ހުންނާނެ ކަމަށެވެ.

އާޒިމް ވިދާޅުވީ މާލެ ސިޓީ ކައުންސިލްގެ 4 ވަނަ ދައުރުގެ ބާކީ އޮތްބައިގައި ވެސް، ވޭތުވެދިޔަ ތަނުގައި ވުވައްޒަފުން ދެއްވި އެއްބާރުލުން ދެއްވައި، ގުޅިގެން މަސައްކަތްކޮށް މާލެ ސިޓީގެ ރައްޔިތުން އުފާވާ ކަހަލަ ޚިދުމަތްތަކެއް ދިނުމަށް މަސައްކަތްކޮށް ދެއްވުމަށް، ހުރިހާ މުވައްޒަފުންނަށް އިލްތިމާސްކުރައްވައިފައެވެ.