ޖޭއެސްސީން ފަނޑިޔާރު އަޒްމިރަލްދާ، ސުއޫދު އަދި މަހާޒު ސަސްޕެންޑްކޮށްފި
މި ނިންމުން ނިންމާފައި ވަނީ ބުދަ ދުވަހު އޮތް ޖޭއެސްސީގެ ބައްދަލުވުމުގައި ކަމަށް ރާއްޖެ އެމްވީ އަށް ވަނީ އެނގިފަ
ދިވެހިރާއްޖޭގެ ސުޕްރީމް ކޯޓު
ސުޕްރީމް ކޯޓުގެ ފަނޑިޔާރުންގެ ތެރެއިން ތިން ފަނޑިޔާރަކު ސަސްޕެންޑްކުރުމަށް ޖުޑީޝަލް ސަރވިސް ކޮމިޝަނުން ނިންމައިފިއެވެ.
އެނގިފައިވާ ގޮތުން ސަސްޕެންޓް ކުރި ތިން ފަނޑިޔާރުންނަކީ ފަނޑިޔާރު ހުސުނުއް ސުޢޫދާއި، ފަނޑިޔާރު މަހާޒު އަލީ ޒާހިރުގެ އިތުރުން ޑރ. އަޒްމިރަލްދާ ޒާހިރު އެވެ.
މި ނިންމުން ނިންމާފައި ވަނީ ބުދަ ދުވަހު އޮތް ޖޭއެސްސީގެ ބައްދަލުވުމުގައި ކަމަށް ރާއްޖެ އެމްވީ އަށް ވަނީ އެނގިފައެވެ.
މި ތިން ބޭފުޅުން ސަސްޕެންޑްކޮށްފައި މި ވަނީ ރައްޔިތުންގެ މަޖިލީހުގެ މެމްބަރުންގެ ގޮނޑި ގެއްލޭ ގޮތައް ގާނޫނު އަސާސީ އަށް ގެނައި ބަދަލުގެ މައްސަލައިގައި މެންބަރުން ވަކިނުކުރެވޭ ގޮތަށް ސުޕްރީމް ކޯޓުން ވަގުތީ އަމުރެއް ނެރެދިނުމުގެ މައްސަލަ ބުދަ ދުވަހަށް ތާވަލްކޮށްފައި ވަނިކޮށެވެ.
މި ތިން ފަނޑިޔާރުން ވަކިކުރަން ޖޭއެސްސީން ނިންމި އިރު މަޖިލީހުގެ މެމްބަރުންގެ ގޮނޑި ގެއްލޭ ގޮތައް ގާނޫނު އަސާސީ އަށް ގެނައި ބަދަލުގެ މައްސަލައިގައި މެންބަރުން ވަކިނުކުރެވޭ ގޮތަށް ސުޕްރީމް ކޯޓުން ވަގުތީ އަމުރެއް ނެރެދިނުމުގެ މައްސަލައިގެ އަޑުއެހުމަށް ވަކީލުން ތިބީ ކޯޓަށް ހާޒިރުވެކަން ފާހަގަކޮށްލެވެއެވެ. އެހެންކަމުން މި އަޑު އެހުން ފެށުމަށް ކުޑަ ވަގުތުކޮޅަކަށް ވެފައި ވަނިކޮށް ކުއްލި ގޮތަކަށް ސުޕްރީމް ކޯޓުގެ ފަނޑިޔާރުންތަކެއް ސަސްޕެންޑްކުރުމުން އެކަމާއި މެދު ޖޭއެސްސީ އަށް ވަނީ ވަރަށް ބޮޑަށް ފާޑުކިޔުން އަމާޒުވެފައެވެ.
ޖޭއެސްސީން މިފަދަ ނިންމުމެއް ނިންމާފައި މި ވަނީ ސުޕްރީމްކޯޓުގެ ފަނޑިޔާރުންގެ އަދަދު މަދުކުރުމަށް މަޖިލީހުން ބިލެއް ފާސްކޮށްފައިވާ ދަނޑިވަޅެއްގައެވެ. އެހެންނަމަވެސް ފަނޑިޔާރުން ވަކިކުރެވޭނީ ޖޭއެސްސީން ފަނޑިޔާރުންގެ ސުލޫކީ މައްސަލަ އެއް ބަލާ މަޖިލީހަށް ފޮނުވުމުން އެކަން މަޖިލީހުން ފާސްކޮށްގެން ކަމަށް ޤާނޫނުއަސާސީގައި ބުނެފައިވާ އިރު، އެ ނޫން ގޮތަކަށް ޖޭއެސްސީން ފަނޑިޔާރުންތަކެއް ވަކިކުރަން ޖެހޭ ފަދަ ހާލަތެއް އެ އިސްލާހުގެ ސަބަބުން މެދުވެރިވާތީ މަޖިލީހުގެ ކައުންސެލް ޖެނެރަލް ވަނީ އެކަމުގެ ކަންބޮޑުވުން ފާޅުކުރައްވާފައެވެ.
މަޖިލީހުގެ ޖުޑީޝަރީ ކޮމިޓީން އަންގާރަ ދުވަހުގެ ރޭ ނިންމީ ބިލް މަޖިލީހުގެ ތަޅުމުން ފާސްކުރާ އިރު ކައުންސެލް ޖެނެރަލްގެ ކޮމެންޓާއި މެދު ގޮތެއް ކަނޑައެޅުމަށެވެ. ނަމަވެސް އެ ކަންބޮޑުވުންތަކަށް ނުބަލާ، މަޖިލީހުގެ ތަޅުމުން ވަނީ ސުޕްރީމްކޯޓުގެ ފަނޑިޔާރުންގެ އަދަދު މަދު ކުރާ އިސްލާހު ބުދަ ދުވަހު ފާސްކޮށްފައެވެ.
