ޣައްޒާ ހުސްކުރުމަށް ޓްރަމްޕް ގެންގުޅުއްވާ ޕްލޭން ދޫކޮށްލުމަށް 70 ށް ވުރެ ގިނަ މަދަނީ ޖަމްއިއްޔާ އިން ގޮވާލައިފި

މަދަނީ ޙައްޤުތަކަށް މަސައްކަތް ކުރާ 70 އަށް ވުރެ ގިނަ ޖަމްޢިއްޔާ އިންނާއި ގްރޫޕްތަކުން، އެމެރިކާގެ ރައީސް ޑޮނަލްޑް ޓްރަމްޕް ޣައްޒާ ސްޓްރިޕް ހިފުމަށާއި ފަލަސްޠީނުގެ ރައްޔިތުން އުރުދުން އަދި މިޞްރު ފަދަ އަވައްޓެރި ޤައުމުތަކަށް މަޖުބޫރުން ބަދަލުކުރުމުގެ ޕްލޭން ދޫކޮށްލުމަށް ގޮވާލައިފިއެވެ.

ޓްރަމްޕަށް ފޮނުވި ސިޓީއެއްގައި، އެ ފަރާތްތަކުން ބުނެފައިވަނީ ގާތްގަނޑަކަށް ދެ މިލިއަން ފަލަސްޠީނު މީހުން، އެމީހުންގެ އަމިއްލަ ވަޠަނުން ބޭރުކުރުމާ ގުޅޭގޮތުން އޭނާ މި ފަހަކުން ހުށަހަޅުއްފައިވާ ހުށަހެޅުން ތަކާމެދު "ފުން ކަންބޮޑުވުން" އޮތް ކަމުގައެވެ.

އެމީހުން އެމެރިކާގެ މިހާރުގެ ސަރުކާރަށް ގޮވާލާފައިވަނީ މެދުއިރުމަތި ހަމަނުޖެހުމަކަށް ވައްޓާލަފާނެ ސިޔާސަތުތަކެއް ގެންގުޅުމުގެ ބަދަލުގައި ޣައްޒާގައި ހަނގުރާމަ ހުއްޓުވުމަށް މަގުފަހިކުރި، ކުރީގެ ޑިޕްލޮމެޓިކް މަސައްކަތްތަކުގެ މައްޗަށް ބިނާކޮށް ކުރިއަށް ދިއުމަށެވެ.

"ކުރުކޮށް ދަންނަވާނަމަ، ޣައްޒާގެ ނަސްލު ސާފުކޮށް އެމެރިކާ އިން ޣައްޒާ ގެ ބިން ހިސޯރުކޮށްފި ނަމަ އަރަބި އަދި މުސްލިމު ދުނިޔޭން އަކަމަށް ބޮޑު ރައްދެއް ދޭނެއެވެ. އަދި އެމެރިކާގެ ސިފައިން ދާއިމީ ހަނގުރާމަ އެއްގައި ބަނދެވި، އެމެރިކާގެ ވަސީލަތްތައް ހުސްވެގެންދާނެއެވެ. އަދި ސުލްޙަވެރިކަމާއެކު ފަލަސްޠީނުގެ މިނިވަން ދައުލަތެއް ޤާއިމުކުރުމުގެ އުއްމީދު ނިމުމަކަށް އަންނާނެއެވެ. އަދި މީގެ ސަބަބުން އެ ސަރަޙައްދުގައި އިތުރު ހަމަނުޖެހުންތައް އުފެދިގެންދާނެއެވެ،" މަދަނީ ޙައްޤުތަކުގެ ގްރޫޕްތަކުން ހުކުރު ދުވަހު ޢާންމުކުރި ސިޓީގައި ބަޔާންކޮށްފައިވެއެވެ.

ސޮއިކުރި ފަރާތްތަކުގެ ތެރޭގައި ކައުންސިލް އޮން އެމެރިކަން-އިސްލާމިކް ރިލޭޝަންސް (ކެއަރ)، އެމެރިކަން މުސްލިމްސް ފޮރ ޕެލެސްޓައިން (އޭއެމްޕީ)، ކޯޑްޕިންކް، ޕީސް އެކްޝަން، އަދި ޔޫއެސް ކައުންސިލް އޮފް މުސްލިމް އޯގަނައިޒޭޝަންސް (ޔޫއެސްސީއެމްއޯ) ގެ އިތުރުން އެތައް ޖަމްޢިއްޔާތަކަކާއި ވަކާލާތުކުރާ ގްރޫޕްތަކެއް ހިމެނެއެވެ.

"ޣައްޒާއަކީ އެންމެ މަތީ އަގު ހުށަހަޅާ ފަރާތަކަށް ވިއްކާ 'ބޮޑު ރިއަލް އެސްޓޭޓް ސައިޓެއް' ނޫނެވެ،" ސިޓީގައި ބަޔާންކޮށްފައިވެއެވެ. "އެއީ އެތައް މިލިއަން ފަލަސްޠީނު މީހުން އެތައް ޖީލުތަކަކަށް އެތަނުގައި ދިރިއުޅެމުން އައިސްފައިވާ ބިމެކެވެ."

ސިޓީގައި ޓްރަމްޕަށް ގޮވާލާފައިވަނީ އެ ސަރަޙައްދުގެ ބައިވެރިންނާއެކު މަސައްކަތްކޮށްގެން އެތަނުގެ ރައްޔިތުން ބަދަލުނުކޮށް ޣައްޒާ އަލުން ބިނާކުރުމަށެވެ.

"މަނިކުފާނުގެ ސަރުކާރުން ޣައްޒާ އިން މީހުން ބޭރުކުރުމާއި ހިސޯރު ކުރުމުގެ ހުށަހެޅުން ދޫކޮށްލުމަށް އަޅުގަނޑުމެން ގޮވާލަމެވެ. އޭގެ ބަދަލުގައި މަނިކުފާނަށް ކުރެއްވޭނެ ކަމަކީ އަރަބި އަދި މުސްލިމު ދުނިޔެ އާއެކު މަސައްކަތްކޮށް ފަލަސްޠީނު ރައްޔިތުން އެމީހުންގެ ކާބަފައިންގެ ބިމުން ބޭރު ނުކޮށް ޣައްޒާ އަލުން ބިނާކުރުމަށް ޙަޤީޤަތާ އެއްގޮތް ހުށަހެޅުމެއް އެކުލަވާލެއްވުމެވެ،" ސިޓީގައި ވެއެވެ.

މި ސިޓީގައި ހިމެނެނީ ދާއިމީ ހަނގުރާމަ ހުއްޓުވުމަކަށް ގޮވާލުމާއި، އިންސާނީ އެހީގެ ދަށުން ޣައްޒާ އަލުން ބިނާކުރުމާއި، ފަލަސްޠީނު ދައުލަތެއް ޤާއިމުކުރުމަށް ތަރައްޤީކުރުމުގެ ބައިނަލްއަޤްވާމީ ފަންޑެއް އުފެއްދުމާއި، އެމެރިކާއިން ފަލަސްޠީނު ދައުލަތެއް ފުރިހަމަ އަށް ބަލައިގަތުމާއި، އަދި އިސްރާއީލުން ހިސޯރުކުރުމާއި ނަސްލީ ތަފާތުކުރުމުގެ ސިޔާސަތުތަކަށް ނިމުމެއް ގެނައުމެވެ.