ޔަމަނުގެ ހުޅަނގު ސަރަޙައްދުގެ ބޮޑު ބަޔަކާއި އެ ޤައުމުގެ ވެރިރަށް ކޮންޓްރޯލު ކުރާ، އީރާނުގެ އެހީތެރިކަން ލިބިގެން ހަރަކާތްތެރިވާ ޙޫތީން، ޣައްޒާ އަށް ދެކޮޅަށް ހަމަލާތައް އަލުން ފަށައިފިނަމަ އިސްރާއީލަށް ހަމަލާ ދޭން ތައްޔާރަށް ތިބިކަމަށް އެ ޖަމާޢަތުގެ ލީޑަރު ޢަބްދުލް މަލިކް އަލް-ޙޫތީ އަންގާރަ ދުވަހު ޓީވީ މެދުވެރިކޮށް ދެއްވި ޚިތާބެއްގައި ވިދާޅުވެއްޖެއެވެ.
ޣައްޒާ އަށް އިސްރާއީލުން ހަމަލާތައް ދެމުން ދިޔަ އިރު ޙޫތީން ވަނީ އިސްރާއީލުގެ އަދި އިސްރާއީލާއި އެމެރިކާ އާއި ގުޅުން ހުރި އެތައް އުޅަނދުތަކަށް ރަތް ކަނޑުގައި ހަމަލާދީފައެވެ. އެ ޖަމާއަތުން ބުނެފައިވަނީ އެ ހަމަލާތަކަކީ އިސްރާއީލާއި ޙަމާސްއާ ދެމެދު ހިނގަމުންދާ ހަނގުރާމައިގައި ޣައްޒާގެ ފަލަސްޠީނު ރައްޔިތުންނާ އެއްބައިވަންތަ ވުމުގެ ގޮތުން ދިން ހަމަލާތަކެއް ކަމުގައެވެ.
"އަޅުގަނޑުމެންގެ އަތްތައް ވަނީ ބަޑީގެ ޓްރިގަރުގައި އަޅުވައިގެންނެވެ. ޣައްޒާގައި އިސްރާއީލުން އަނެއްކާވެސް ހަމަލާތައް ފަށައިފިނަމަ، އަޅުގަނޑުމެން ވަގުތުން އިސްރާއީލުގެ އަދުއްވުންނާ ދެކޮޅަށް ހަމަލާތައް ވަރުގަދަ ކުރަން ތައްޔާރަށް ތިބީމެވެ،" އަލް-ޙޫތީ ގެ ޚިޠާބުގައި ވިދާޅުވެފައިވެއެވެ.
ޣައްޒާގެ ހަނގުރާމަ ހުއްޓާލުމުގެ އެއްބަސްވުން ވަނީ ނާޒުކު ހާލަތެއްގައެވެ. މިއީ އިސްރާއީލުން އެ އެއްބަސްވުމާ ޚިލާފުވެއްޖެ ކަމަށް ބުނެ، ފަލަސްޠީނުގެ ޙަމާސްއިން އިސްރާއީލުގެ ރަހީނުން ދޫކުރުން ހުއްޓާލުމާ ގުޅިގެންނެވެ.
މިކަމަށް ރައްދު ދެމުން، އިސްރާއީލުގެ ދިފާޢީ ވަޒީރު ޔޯވް ގަލަންޓް ވަނީ އިސްރާއީލު ސިފައިން އެންމެ މަތީ މިންވަރަށް ތައްޔާރީ ހާލަތުގައި ތިބުމަށް އަމުރުކޮށްފައެވެ.
ޙޫތީންނަކީ އީރާނުން އެކުލަވާލާފައިވާ އިސްރާއީލާއި ހުޅަނގާ ދެކޮޅު ސަރަޙައްދީ އިއްތިހާދު ކަމުގައިވާ "އެކްސިސް އޮފް ރެސިސްޓަންސް" ގެ ބައެކެވެ. އެމީހުން ވަނީ އިސްރާއީލާ ދިމާލަށް، މިސައިލްތަކާއި ޑްރޯންތައް ވެސް ދޫކޮށްފައެވެ.
