މިނިސްޓްރީ އޮފް ހޯމް ލޭންޑް ސެކިއުރިޓީގެ ޑެޕިއުޓީ މިނިސްޓަރު އަމާނީ މުހައްމަދު އާންމުންގެ ބަޔަކަށް ފުރައްސާރަ ކޮށްފިއެވެ.
މިކަން ހިނގީ ހޮނިހިރު ދުވަހު އޮތް ބައި-އިލެކްޝަން ގެ ވޯޓުލުން ހިނގަމުން ދަނިކޮށް މާފަންނު މަދަރުސާގެ ގޯތި ތެރޭގައި ކަމަށް މައުލޫމާތު ލިބިފައިވެއެވެ.
މަންޒަރު ދުށް މީހަކު ކިޔައިދިން ގޮތުގައި، އަމާނީ ވަނީ ވަރަށް ހުތުރު އެއްޗެހި ގޮވާ އެތަނުގައި އެމީހުންނާ ދިމާލަށް އަޑުގަދަ ކޮށްފައެވެ.
އެ ސަރަހައްދުގައި އެވަގުތު ހުރި މީހަކު ކިޔައިދިން ގޮތުގައި އަމާނީ އައިސް އަޑުގަދަ ކޮށް އެއްޗެހި ގޮވީ އެތަނުގައި އެ ވަގުތު ތިބި އެމްޑީޕީގެ ސަޕޯޓަރުން ތަކެއް، މިނިސްޓަރު ޒަމީރު ފާސް ނެތި އެތަނުގެ ތެރެއަށް ވެންނެވުމުން "ފާސް ނެތި އެގޮތައް ވަދެވޭހޭ؟" ބުނި އަޑު އިވިގެން އެކަމާ ރުޅި އައިސްގެން ކަމަށް ހީވާ ކަމަށެވެ.
އޭގެ އިރުކޮޅެއް ކުރިން، މާފަންނު މަދަރުސާގެ މައި ދޮރުން ކުޑަތަންކޮޅެއް އެތެރޭގައި ތިބި އެމްޑީޕީގެ ސަޕޯޓަރުންނާ އިލެކްޝަންސްގެ އޮފިޝަލުން އައިސް ވާހަކަ ދެއްކި ކަމަށް އޭނާ ބުންޏެވެ.
"އިލެކްޝަންސްގެ އޮފިޝަލަކު އައިސް ބުނަނީ ތިތަނުގައި ނުތިބޭނޭ ފާސް ނެތި، އެހެން ބުނުމުން އެމީހުން މި ބުނަނީ މިތިބީ ސްކޫލް ދޮރުކައިރީގައި ނޫންހޭ، ފާސް ނެތް މީހުން ކްލާސްތަކުގެ ދޮރުމަތީގައި ވެސް އެބަތިބި ނޫންހޭ؛" ކަމަށެވެ.
އޭނާ ކިޔައިދިން ގޮތުގައި އެމީހުން އެހެން ބުނުމުން އެ އޮފިޝަލް "އާނ އެންމެ ރަނގަޅޭ" ބުނެފައި އެނބުރި ދިޔަ ކަމަށެވެ.
"އެހެން އެކަން ވެފައި ވަނިކޮށް މިނިސްޓަރަކު ފާސް ނުލާ ވަދެގެން ދާތީ އެމީހުން މި ބުނަނީ ފާސްނުލާ އެގޮތައް ވަދެގެން ދެވޭހޭ؟ އެހެން ބުނި އަޑު އިވިގެން ސަރުކާރުގެ ބޮޑު މީހަކު އައިސް ވަރަށް ހަޅޭއްލަވާ އަޑުގަދަ ކުރަން ފެށީ؛" އޭނާ ކިޔައިދިނެވެ.
މިހާދިސާ ހިނގި ވަގުތު ނަގާފައިވާ އެތައް ވީޑިއޯ އެއް ވެސް ސޯޝަލް މީޑިއާ ގައި ވަނީ ވައިރަލް ވެފައެވެ. އެތަނުން އެއް ވީޑީއޯ އިން ފެންނަ ގޮތުގައި ހުއްޓިގެން މަޑުމަޑުން ތިބި އަންހެނުންތަކަކާ ދިމާލަށް އަތް އުކަމުން, ފުލުހުންނަށް އިޝާރާތްކޮށް "މިތަނުން ނެރޭށޭ" ގޮވާ، "ބޮޑެތި ވަގުން" ނޭ ގޮވާ ހަޅޭއްލަވާ މަންޒަރު ފެނެއެވެ.
އޭނާ އަތްއުކާ އަޑުގަދަ ކޮށް ހަޅޭއްލަވަމުން ދިޔައިރު، ފުލުހުންވެސް ހަމަ ޖެހިލައިގެން އޭނާ ކުރާނެ ކަމެއް ކުރަން ދޫކޮށްލައިގެން ތިބޭ މަންޒަރު ފެނެއެވެ.
އެތަނުގައި ގިނަ އަދަދެއްގެ އާންމުންވެސް އުޅެމުންދާ މަންޒަރު ވީޑިއޯ އިން ފެނެއެވެ.
އަމާނީ ރުޅިއައިސްގެ ހަޅޭއްލެވެމަށް ފަހު އެ ސަރަހައްދުން ދުރަށް ދިއުމުން އެތަނުގައި ހުރި މީހަކު "އަހަރެމެން ތިފެންވަރަކަށް ނުވެއްޓޭނެ" އޭ ބުނާ އަޑުވެސް އިވެއެވެ.
މީގެ ކުރިންވެސް ސަރުކާރުގެ މަތީ ފެންވަރުގެ ވެރިންތަކެއްގެ މިފަދަ މައްސަލަ އެއް ފެންމަތިވެފައިވެއެވެ. އޭރު އެމީހުން ފުރައްސާރަ ކޮށްފައިވަނީ އިންޑިއާގެ ބޮޑު ވަޒީރު ނަރެންދްރަ މޯދީ އަށެވެ. އެކަމާ ގުޅިގެން ދެ ގައުމުގެ ގުޅުމަށް ބުރޫ އަރާ ރާއްޖޭގެ ފަތުރުވެރިކަމަށް ވެސް އޭގެ ސަބަބުން ނޭދެވޭ އަސަރު ކުރިއެވެ. އެ ހާދިސާ އަށް ފަހު ރާއްޖެ އަށް އިންޑިއާ އިން އަންނަމުން ދިޔަ ފަތުރުވެރިންގެ އަދަދު ވަރަށް ބޮޑަށް ދަށަށް ގޮސް އޭގެ ފަހުން އަދިވެސް އިންޑިއާ އިން ރާއްޖެ އަށް ޒިޔާރަތް ކުރާ މީހުންގެ އަދަދު ކުރީގެ އަދަދު ތަކާ އެއްވަރު ނުވާކަން ޓޫރިޒަމް މިނިސްޓްރީގެ ތަފާސް ހިސާބުތަކުން ފާހަގަ ވެއެވެ.
